ڕاگه‌یه‌ندراوی فه‌رمی
  بزوتنەوەی گۆڕان: پشتیوانی مامۆستایان دەكەین
لەبارەی ناڕەزایەتییەكانی مامۆستایان‌و فەرمانبەرانی هەرێمی كوردستان‌و هەڵوتانەسەر خۆپیشاندەرانەوە، بزوتنەوەی گۆڕان راگەیەندراوێكی بڵاوكردەوە، ئەمە دەقەكەیەتی:

راگەیەنراوێك بۆ رای گشتی

ئێمە لە بزوتنەوەی گۆڕان هەمو شێوازەكانی توندوتیژی‌و گرتن‌و هەڵكوتانەسەر خۆپیشاندەران‌و چالاكوانانی مەدەنی بەتوندی ئیدانە دەكەین. ئەم جۆرە رەفتارانە نەك هەر چارەسەری كێشەكان ناكەن، بەڵكو دەبنە مایەی كاردانەوەو پشێویی زیاترو ئاشتیی كۆمەڵایەتی دەخەنە مەترسییەوە.

لای هەموان رونە حكومەتی هەرێمی كوردستان نەیتوانیوە لانی كەم كێشەی موچەی مامۆستایان‌و موچەخۆران چارەسەر بكات. هاوكات لەم وەرزی سەرماو سۆڵەدا دیسان وەك سەردەمانی بانگەشە بۆ ساوایەتیی حكومەت. كێشەكانی نەبونی سوتەمەنی‌و كەمبونەوەی بڕی كارەباو چەندین كێشەی تر بەرۆكی هاوڵاتییانی گرتۆتەوە.

لەئێستادا بەهۆی دابین نەكردنی موچەو مافی مامۆستایانەوە پرۆسەی خوێندن‌و بایكۆت لە سنوری پارێزگاكانی سلێمانی‌و هەڵەبجەو ئیداری راپەڕین‌و گەرمیان پەكی كەوتوەو بایكۆت بەردەوامە.

 ئەم بایكۆتكردنەش مەترسیی جدیی لەسەر خوێندنی ئەمساڵی ئەم دەڤەرانە دروست كردوە. ئەگەر حكومەت‌و دەسەڵاتدارانی هەرێم بە تەنگ دواڕۆژی خوێندكارانەوەن‌و نایانەوێت خوێندنی ئەمساڵیان بفەوتێت ئەوا دەبێت راستگۆیانەو بە جدی‌و بەپەلە بەدەنگ خواست‌و داواكارییەكانی مامۆستایان‌و موچەخۆرانەوە بچن.

دەسەڵاتدارانی هەرێم لەلایەك بەپاساوی بێ بنەما خۆیان لە چارەسەری كێشەكان لە هەرێم‌و بەغداد دەدزنەوەو لەلایەكی تریشەوە شێوازەكانی گەندەڵی‌و بەتاڵانبردنی نەوت‌و سامانی وڵات بەردەوامە، بۆیە بەرپرسیارێتیی مێژویی‌و سیاسیی دواكەوتنی خوێندن‌و بەردەوامبونی ئەم بارودۆخە لەئەستۆی ئەواندایە.

لە كۆتاییدا جارێكی دیكەش پشتیوانیی تەواوی داوا رەواكانی مامۆستایان‌و موچەخۆران‌و شێوازی شارستانییانەی دەربڕینی ناڕەزایەتییەكانیان دەكەین.

بزوتنەوەی گۆڕان
2016/12/2
03/12/2016
زیاتر...
په‌ڕه‌یله‌ 7
ژماره‌ی بابه‌ت