فراکسیۆنه‌کان
  سەرۆکی پەرلەمانی کوردستان، رۆژ بەڕۆژ هەوڵی بەرتەسکردنەوەی ئازادی رۆژنامەگەریی دەدرێت

سەرۆکی پەرلەمانی کوردستان رایدەگەیەنێت: رۆژ بەڕۆژ هەوڵی بەرتەسکردنەوەی ئازادی رۆژنامەگەریی دەدرێت، لەوەش خراپتر، چەندین رۆژنامەنوسی ئازاو بوێر تیرۆرکراون.

لە ساڵیادی رۆژنامەگەریی کوردیدا، د.یوسف محەمەد سادق، پەیامێک ئاراستەی رۆژنامەنوسان دەکات و نیگەرانی خۆی پیشاندەدات لەوەی کە؛  لەم چەند ساڵەی رابردودا هەرێمی کوردستان لەلایەن رێکخراوە ناوخۆیی و نێودەوڵەتییەکانەوە، بە شوێنێکی مەترسیدار بۆ کارو پیشەی رۆژنامەنوسی ئاماژەی بۆ کراوە.

پەیامی سەرۆکی پەرلەمان بۆ ساڵیادی رۆژنامەگەریی کوردی

ئەمڕۆ یادی (119)ەهەمین ساڵەی رۆژنامەگەریی کوردییە، لە دەرچونی یەکەمین ژمارەی رۆژنامەی (کوردستان) لە لایەن بنەماڵەی بەدرخانییەکان لە قاهیرەی پایتەختی میسر، تا ئێستا رەوتی رۆژنامەگەریی کوردی، قۆناغی جیاوازی بڕیوە. پاش راپەرین، مەودایەکی فراوان بۆ کار و پیشەی رۆژنامەگەریی رەخسا، بەڵام بەداخەوە، پاشتر، رۆژنامەنووسان قوربانی گەورەیان بە خوێن و گیانی خۆیان بەخشی لە پێناو پیشەکەیاندا.

لەو سەردەمەوە تائێستا، رۆژ بەڕۆژ هەوڵی بەرتەسکردنەوەی ئازادی رۆژنامەگەریی دەدرێت. لەوەش خراپتر، چەندین رۆژنامەنوسی ئازاو بوێر تیرۆرکراوە.! بە ئاستێک لەم چەند ساڵەی رابردودا هەرێمی کوردستان لەلایەن رێکخراوە ناوخۆیی و نێودەوڵەتییەکانەوە، بە شوێنێکی مەترسیدار بۆ کارو پیشەی رۆژنامەنوسی ئاماژەی بۆ کراوە.!

لەبەرامبەر ئەمەشدا، دژ بەو چەند کەناڵە ئازا و ئەهلییانە، چەند کەناڵ و ئۆرگانێکی زەبەلاح بە پارەی میللەت و بە پشتیوانی و سێبەری حیزب، خەریکی گەوجاندن و شاردنەوە و ئاوەژ وکردنەوەی راستییەکانن.

لە کۆتایدا و لەم یادە پرشنگدارەدا سڵاو دەنێرین، بۆ گیانی پاکی رۆژنامەنوسە شەهیدەکان، سڵاو بۆ ئەو رۆژنامەنوس و دەنگە دلێرانەی، پێشمەرگانە و ئازایانە، لەم بارودۆخە سەخت و دژوارەدا، شەڕی دژ بە گەندەڵی و دزینی قوتی هاوڵاتیان دەکەن.

د. یوسف محەمەد سادق
سەرۆکی پەرلەمانی کوردستان
22-4-2017
23/04/2017
زیاتر...
په‌ڕه‌یله‌ 23
ژماره‌ی بابه‌ت