ڕاگه‌یه‌ندراوی فه‌رمی
  گۆڕان بەشداریی کۆبونەوەکەی ئەمڕۆی پەرلەمان ناکات
جڤاتی نیشتیمانی بزوتنەوەی گۆڕان بڕیاریدا کە فراکسیۆنی گۆڕان بەشداریی کۆبونەوەی ئەمڕۆی پەرلەمانی کوردستان نەکات و فراکسیۆنی گۆڕانیش لە بینای پەرلەمان هەڵوێستی خۆی رون دەکاتەوە.

د.شۆڕش حاجی، ئەندامی خانەی راپەڕاندنی بزوتنەوەی گۆڕان رایگەیاند: جڤاتی نیشتیمانی دوای دو رۆژ کۆبونەوە، بڕیاریدا فراکسیۆنی گۆڕان بەشداریی کۆبونەوەی ئەمڕۆی پەرلەمانی کوردستان نەکات.

لەو لێدوانەیدا بۆ (تۆڕی میدیای گۆڕان)، د.شۆڕش حاجی ئاشکرای کرد؛ ئەو رێکارانەی گیراوەتەبەر بۆ بڕیاردان لەسەر پرسێکی چارەنوسساز ناتەندروستە و بە رێکاری نایاسایی کراوە و پێمانوایە ئەمە نایێتە مایەی ئاسایی کردنەوەی پەرلەمانی کوردستان دوای دوساڵ لە داخستنی و یەکڕیزی نیشتیمانی.

وتیشی :"کۆبونەوەی جڤاتی نیشتیمانی بزوتنەوەی گۆڕان بەردەوام دەبێت بۆ تاوتوێی ئەگەر و پێشهاتەکان و بڕیاری پێویستیان لەبارەوە دەدرێت".

هاوکات، برزۆ مەجید سەرۆکی فراکسیۆنی گۆڕان لە پەرلەمانی کوردستان رایگەیاند: دوای بڕیاری جڤاتی نیشتیمانی لەسەر بەشداریی نەکردن لە کۆبونەوەی نایاسایی ئەمڕۆی پەرلەمان، ئێوارەی ئەمڕۆ لە باڵەخانەی پەرلەمانی کوردستان فراکسیۆنەکەمان دیدو بۆچون و رای خۆی دەخاتەڕو لەسەر هۆکارەکانی پەکخستنی پەرلەمان و ئەو رۆڵەی دەیوییست ببینێت و بێدەنگبونی حیزبەکان بەرامبەر کودەتاکەی پارتی کە هۆکارەکەی چی بو و هەروەک ئەو هەوڵانەی کە بە نایاسایی دراون و پرۆسەی سیاسی بەکوێ دەگات بەم هەوڵانەوە.

وتیشی:" ئەو هەوڵانەی لەئێستادا بۆ ئاسایی کردنەوەی پەرلەمان دراون ئامانج و مەبەستەکەی رون نییە، چونکە لەبنەمادا دەبو پەرلەمانی کوردستان بڕیار لەسەر ریفراندۆم بدات و رێکارەکانی دیاریی بکات و یاسای بۆ دەربکات، بۆیە پێمانوایە بڕیاری ئاسایی کردنەوەی پەرلەمان لەئێستادا رون نییە کە مەرام و ئامانجی چییە".
15/09/2017
زیاتر...
په‌ڕه‌یله‌ 8
ژماره‌ی بابه‌ت