فراکسیۆنه‌کان
  هۆشیار عەبدوڵا، پێویستە کۆمەڵگای نێودەوڵەتی لەسەر دۆخی هەرێم بێتە سەرخەت
هۆشیار عەبدوڵا پەرلەمانتاری بزوتنەوەی گۆڕان لەئەنجومەنی نوێنەرانی عێراق داوا لە کۆمەڵگای نێودەوڵەتی دەکات ڕۆڵی خۆی بگێڕێت و لەسەر دۆخی هەرێمی کوردستان بێتە سەرخەت و (وەصایە)ی نێودەوڵەتی بەسەر هەرێمدا بسەپێنێت.

هۆشیار عەبدوڵا ئاماژەی بەوەش کرد، چیتر گەلی کوردستان سەبرو ئارامی لەبەرامبەر بەڵێنە درۆکانی هەردوو حکومەتی بەغدا و هەولێر نەماوە کە سێ ساڵە بەگوێی دا دەدرێت و بەدەستیانەوە دەناڵێنێت.

هۆشیار عەبدوڵا لەبەیاننامەیەکدا کە ئەمڕۆ دوو شەمە (5ی ئازار) بڵاویکردۆتەوە، ڕایگەیاندووە: دوای ئەوەی نێچیرڤان بارزانی سەرۆکی حکومەتی هەرێمی کوردستان ڕایگەیاند کە پشکی هەرێم لەبودجەی 2018 بەشی موچەی فەرمانبەرانی هەرێمی کوردستان ناکات و هاوکات دوای  ئەوەی حەیدەر عەبادی سەرۆک وەزیرانیش خۆی دزیوەتەوە لە جێبەجێکردنی بەرپرسیارێتیە ئیتیحادییەکانی بەرامبەر گەلی کوردستان و مەسەلەی موچەی فەرمانبەرانی هەرێمی وەک کارتێکی هەڵبژاردن بەکارهێناوە، هەربۆیە ئێستا کاتی ئەوەهاتووە کۆمەڵگای نێودەوڵەتی  ڕۆڵی خۆی بگێڕێت و  ڵەسەر دۆخی هەرێم بێتەسەرخەت و (وەصایەی)ی نێودەوڵەتی بەسەر هەرێمدا بسەپێنێت، ئەویش بەهۆی پێشێلکردن و بەدینەهێنانی مافەکانی گەلەکەی کە کراوەتە قوربانی ململانێ سیاسییە دروستکراوەکانی نێوان هەردوو حکومەتی بەغدادو هەولێر.

ئەو پەرلەمانتارەی بزوتنەوەی گۆڕان ئەوەشی ڕوونکردۆتەوە: بەدرێژایی ساڵانی ڕابوردوو بەبێ ئەوەی هیچ ئاسەوارێکی داهاتەکەی دیاربێت نەوت لەهەرێمی کوردستان بەقاچاخ فرۆشراوە و حکومەتەکەی عەبادیش بێدەنگی لێکردووە، تەنانەت عەبادی نەک هەربێدەنگ بووە لەوەی کەلە هەرێم  ڕوویداوە بەڵکو لەسەرحسابی هاوڵاتیەکانیشی کە هیچ دەسەڵاتێکیان نەبووە و بەهۆی سیستەمی پاشەکەوتی زۆرە ملێی موچەکانیانەوە لەنەهامەتیدا ژیاون، موجامەلەی دەسەڵاتدارانی هەرێمیشی کردووە.

هۆشیار عەبدوڵا ئەوەشدەخاتەڕوو: دوای ئەوەی نیچیرڤان بارزانی سەرۆکی حکومەتی هەرێم بەشێوەیەکی ڕوون و ئاشکراو بێ پەردە ڕایگەیاند کە حکومەتەکەی ناتوانێت لەو پشکەی کە بۆ کوردستان لەبودجە دانراوە موچەی فەرمانبەران دابینبکات و ئەوەشی خستۆتە ڕوو کەوا ئەو پارەیە بەشی موچە ناکات، کەواتەهەموو ئەمانە بەمانای ئەوەدێن بەمنزیکانە توڕەیی شەقامی کوردستانی دەتەقێتەوە و چیتر خەڵک بەرگەی بەردەوامی دۆخێکی وەها ناگرێت، چونکە ئیتر گەلی کوردستان ناتوانێت لەمە زیاتر ئارام بگرێت و بەردەوام بێت بەتایبەت دوای ئەوەی سێ ساڵە بەڵێنی درۆی هەردوو حکومەتی بەغدا و هەولێر بەگوێ دا دەدرێت و بەدەستیانەوە دەناڵێنێت.
05/03/2018
زیاتر...
په‌ڕه‌یله‌ 30
ژماره‌ی بابه‌ت