هه‌واڵ و چالاكی‌
   بۆچی رێکخەری گشتی کۆبونەوەی لەگەڵ کونسوڵی تورکیا رەتکردەوە
رێکخەری گشتی بزوتنەوەی گۆڕان، کۆبونەوە و دیدار لەگەڵ کونسوڵی تورکیا رەتدەکاتەوە، ئەوەش بەهۆی داگیرکردنی شاری عەفرین لەلایەن ئەو وڵاتە و لێدوانێکی بیناڵی یەڵدرم کە سلێمانی بە پشتیوانی تیرۆر ناوبردوە و هەروەها بەزاندنی سنوری باشوری کوردستان لەلایەن سوپای تورکیاوە.

رۆژنامەی ئاوێنە لە ژمارە (619)ی رۆژی سێشەممەیدا بڵاوی کردەوە، هەفتەی رابردو عومەر سەید عەلی رێکخەری گشتی بزوتنەوەی گۆڕان، کۆبونەوەیەکی لەگەڵ هاکان کەراچای کونسوڵی گشتی تورکیا لە هەرێمی کوردستان رەتکردوەتەوە، وەک هەڵوێستێک بەرامبەر سیاسەتەکانی تورکیا دژی رۆژئاوا و باشوری کوردستان.

رۆژنامەکە بڵاوی کردەوە؛ هەفتەی رابردو لەکاتی سەردانی شاری سلێمانی، بڕیاربوە هاکان کەراچای سەردانی بزوتنەوەی گۆڕان بکات و لەگەڵ عومەر سەید عەلی رێکخەری گشتی کۆببێتەوە، بەڵام بەماوەیەکی کەم پێش وادەی دیاری کراوی کۆبونەوەکە، رێکخەری گشتی کۆبونەوەکەی رەتکردوەتەوە.

سەرچاوەیەک بە رۆژنامەکەی راگەیاندوە؛ هۆکاری رەتکردنەوەی کۆبونەوە لەگەڵ کونسوڵی گشتی تورکیا، لەلایەن عومەر سەید عەلییەوە، لەبەر سێ هۆ بوە، یەکەم لێدوانی بیناڵی یەڵدرم سەرۆک وەزیرانی تورکیا کە رایگەیاندبو: رێگەنادەن ئاسمانی تورکیا بۆ گەشتی ئاسمانی بۆ شاری سلێمانی بەکاربهێنرێت، چونکە سلێمانی پشتیوانی تیرۆر دەکەن، ئەوەش دوای پشتیوانی سلێمانی لە رۆژئاوای کوردستان و خۆپیشاندان دژی داگیرکردنی ئەو شارە لەلایەن سوپای تورکیا و راگەیاندنی سێ رۆژ ماتەم لەلایەن پارێزگاری سلێمانی و داگرتنی ئاڵای بزوتنەوەی گۆڕان بۆ نیوە بەهۆی داگیر کردنی عەفرینەوە.

هۆکارێکی دیکەی رەتکردنەوەی  کۆبونەوەکە، داگیرکردنی شاری عەفرینی رۆژئاوای کوردستان بو لەلایەن سوپای تورکیا و میلیشیاکانی سەر بەو وڵاتە، کە بزوتنەوەی گۆڕان ئیدانەی کرد و داوای لە هێزە نێودەوڵەتییەکان کرد رێگریی لە هێرشی تورکیا بکەن بۆ سەر ئەو بەشەی رۆژئاوای کوردستان.

سێیەم هۆکاری رەتکردنەوە دیداری کونسوڵی تورکیا لەلایەن عومەر سەید عەلییەوە، بەهۆی بەزاندنی سنوری هەرێمی کوردستان بوە لەلایەن سوپای تورکیاوە، کە چەندین کیلۆمەتر سنوری هەرێمی بەزاندوە و سەرقاڵی دروست کردنی بنکە و بارەگانی نوێیە، بەتایبەتی لە سنوری بادینان و ناوچەی خواکوڕک و سێگۆشەی سنوریی تورکیا- عێراق- ئێران.

رۆژنامەی ئاوێنە بڵاوی کردوەتەوە؛ کونسوڵی گشتی تورکیا ئەو هەنگاوەی رێکخەری گشتی بە بێڕێزی لەقەڵەمداوە و رایگەیاندوە کە ئەو بۆ رونکردنەوەی سیاسەتی تورکیا هاتوە، چونکە بزوتنەوەی گۆڕان زۆر دژی سیاسەتی تورکیا قسە دەکەن و لێدوانی توند دەدەن.

کونسوڵی تورکیا ئاماژەی بەوەکردوە کە "ئەوان شەڕی تیرۆر دەکەن و کەسی مەدەنی لە عەفرین نەکوژراوە و کورد پێشتر لە دەستی یەپەگە و یەپەدە رایان کردوە و ئێستا گەڕاونەتەوە شارەکە".
بەپێی رۆژنامەی ئاوێنە؛ ژمارەیەک هەڵسوڕاوی گۆڕان لەبری رێکخەری گشتی لەگەڵ کونسوڵی گشتی تورکیا کۆبونەتەوە و پێیانڕاگەیاندوە کە؛ کورد هەموی یەک نەتەوەن و سیاسیەتی رەسمی بزوتنەوەی گۆڕان پشتیوانی کردنە لە کوردانی سەرجەم پارچەکان بۆ گەیشتن بە مافی خۆیان، تورکیا ماف دەدات بەخۆی بەرگریی لە تورکمان لە عێراق یان ئازەربایجان، یان رۆهینگەکانی میانمار بکات و لەسەریان بێتە دەنگ، کوردیش هەمان مافی هەیە بۆ بەرگریی و پشتیوانی لە یەکتری.

04/04/2018
زیاتر...
په‌ڕه‌یله‌ 31
ژماره‌ی بابه‌ت