دەستوری ناوخۆی بزوتنەوەی گۆڕان_پەسەندکراوی کۆنگرەی یەکەم
دەستوری ناوخۆی بزوتنەوەی گۆڕان
پەسەندکراوی کۆنگرەی یەکەم
هەولێر ٢٦ - ٢٧ / ١٢ / ٢٠١٣


پێڕستی دەستوری ناوخۆی بزوتنەوەی گۆڕان

بەشی یەکەم: پێناسه‌
بەشی دوەم: هەڵسوڕاو و پشتیوان
بەشی سێیەم: بازنە
بەشی چوارەم: رایەڵە
بەشی پێنجەم: ئەنجومەنی قەزا
بەشی شەشەم: هەڵبژاردنی دەستەی بەڕێوەبەری بازنە، رایەڵە، ئەنجومەنی قەزا
بەشی حەوتەم: رەوەندی کوردی   
بەشی هەشتەم : جڤاتی گشتی
بەشی نۆیەم: جڤاتی نیشتمانی
بەشی دەیەم: کۆنفرانسی پارێزگاکان
بەشی یانزەیەم : کۆنفرانسی نیشتمانی


بەشی یەکەم: پێناسه‌

یەکەم، ناوی رێکخراوەکە: بزوتنه‌وه‌ی گۆڕان
دوەم، پێناسه‌كه‌ی‌: رێكخراوێكی سیاسی خاوه‌ن كه‌سایه‌تی مەعنەوییە؛ لە کۆبونەوەی ئاره‌زومه‌ندانه‌ی ئەو هاوڵاتیانە پێکدێ کە لە دەوری بەرنامەی سیاسی ودەستوری ناوخۆی بزوتنەوەی گۆران کۆبونەتەوە.
سییەم، دروشمه‌كه‌ی: گۆڕان
چوارەم، لۆگۆكه‌ی: بازنه‌یه‌كه‌ به‌ڕه‌نگی نیلی؛ له‌ ناوه‌ڕاستیدا وێنه‌ی مۆمێكی سپی هه‌یه‌؛ كه‌ ئاگرێكی به‌ هه‌ردوو ره‌نگی زه‌رد و نارنجی له‌سه‌ره‌ و له‌ژێریدا ناوی بزوتنه‌وه‌كه‌ به‌ هه‌ردوو ره‌نگی نارنجی و سپی و ‌به‌ پیتەکانی كوردی و عه‌ره‌بی و ئینگلیزی نوسراون.
پێنجەم، شوێنی چالاکی: هه‌رێمی کوردستان، عێراقی فیدڕاڵ و هه‌رجێیه‌ک کە هاوڵاتیانی کوردستانی لێبێ. لە ئێستادا، مەکۆی سه‌ره‌کی له‌ شاری سلێمانیه‌.

بەشی دوەم: هەڵسوڕاو و پشتیوان

مادەی یەکەم: هه‌ڵسوڕاو
یەکەم، هه‌ر هاوڵاتیه‌ك بخوازێت دەتوانێت ببێتە‌ هه‌ڵسوڕاو گه‌ر ئه‌م مه‌رجانه‌ی تیادا بێت:
١–١: هەژدە ساڵی ته‌مه‌نی ته‌واو كردبێت.
١–٢: كار بۆجێبه‌جێكردنی به‌رنامه ‌و به‌دیهاتنی ئامانجه‌كانی بزوتنەوەی گۆڕان بكات.
١–٣: لە هەمان کاتدا ئەندامی هیچ  حیزبێکی تری کوردستانی، عێراقی یان هەرێمی نەبێت.
١ـ٤: بڕیاری تاوانبارکردنی بە تاوانێکی ئابڕوبەر لە دادگا ناوخۆیی و دەرەکیەکان دەرنەچوبێت و بەشدار نەبوبێت لە تاوانی کۆمەڵکوژیدا.

دوەم، ده‌رچوون له‌ هه‌ڵسوڕاوێتی:
هه‌ڵسوڕاو له‌ هه‌ڵسوڕاوێتی بزوتنەوه‌ی گۆڕان ده‌ر‌ده‌چێت:
٢–١: ئەگەر خۆی ئاره‌زومه‌ندانه‌ داواكاری پێشكه‌ش بكات.
٢–٢: ئەگەر زیانی ماددی یا مه‌عنه‌وی له ‌بزوتنه‌وەکە بدات و بەو‌ هۆیه‌وه‌ بڕیاری دورخستنه‌وه‌ی له‌ لایه‌ن ژوری یاسایی  ده‌ربچێت.
٢ـ٣: ئەگەر مەرجەکانی هەڵسوڕاوێتی لەدەست بدا.
سێیەم، مافه‌كانی هه‌ڵسوڕاو:
٣–١: هه‌ڵسوڕاو، گه‌ر مه‌رجی پێویستی تێدابوو، بۆی هه‌یه‌ داوابكات بۆ هه‌مو ئاسته‌كانی رێكخراوه‌یی بزوتنه‌وه‌ی گۆڕان و ئه‌نجومه‌ن و ده‌زگا و دامه‌زراوه‌كانی هه‌رێم و دەوڵەتی عێراقی فیدڕاڵ بپاڵێورێت.
٣–٢: هه‌ڵسوڕاو بۆی هه‌یه‌ له‌ ریفراندۆم و هەڵبژاردنە ناوخۆیی یه‌كانی بزوتنه‌وه‌كه‌دا ده‌نگ بدات و خۆی بپاڵێوێت.

مادەی دوەم:  پشتیوان
١. هه‌ر هاوڵاتیه‌ك ئاره‌زوی كاری رێکخراوەیی نه‌بوو له ‌ناو یه‌كێك له‌ ئۆرگانەکانی بزوتنه‌وه‌كه‌دا به‌ڵام ئاماده‌بو خۆبه‌خشانه‌ پشتیوانی ماددی و مه‌عنه‌وی، سیاسی و جەماوەری بزوتنه‌وه‌كه‌ بكات، پێی ده‌وترێت پشتیوان و ده‌كرێت ناوی له ‌تۆماری پشتیواناندا بنوسرێت.
٢. پشتیوان مافی ده‌نگدان وخۆپاڵاوتنی له‌ هه‌ڵبژاردنه‌ ناوخۆ‌ییه‌كانی بزوتنه‌وه‌كه‌دا نی یه‌ به‌ڵام گه‌ر لێوه‌شاوه‌یی  له ‌بوارێكدا هەبێ و مه‌رجی پێویستی تێدابێت، ده‌توانێت داوابكات بۆ هه‌مو ئاسته‌كانی ئه‌نجومه‌ن و ده‌زگا و دامه‌زراوه‌كانی هه‌رێم و دەوڵەتی عێراقی فیدڕاڵ بپاڵێورێت.
٣. ئەگەر پشتیوان ئارەزوی هەبو ببێتە هەڵسوڕاو، پێوستە پێش سێ مانگ لە هەڵبژاردنە ناوخۆییەکان ناوی خۆی تۆماربکات.
٤. پشتیوان دەتوانێت لە هەمو دەزگاکانی بزوتنەوەکەدا کاربکات.
٥. پشتیوان دەتوانێت رەخنە و پێشنیار دەربارەی کار و هەڵوێستی بزوتنەوەی گۆڕان و هەڵسوڕاوەکانی ئاڕاستەی هەمو ئاستە رێکخراوەییەکانی بزوتنەوەکە بکات.
٦. پێکهێنانی ئەنجومەنی پشتیوان لەسەر ئاستی شارەکان بە رێنماییەکی تایبەت رێکدەخرێت.
بەشی سێیەم: بازنە

مادەی یەکەم: پێناسەی بازنه
یەکەم، بازنه‌ یەکەی رێکخراوەیی سەرەکی بزوتنەوەی گۆڕانە بۆ رێکخستنی هەڵسوڕاوان و پەیوەندی لەگەڵ دەنگدەران و بەشداریکردن لە هەڵبژاردنە گشتیەکانی کوردستان و عێراقی فیدڕاڵدا.
دوەم، سنوری کاری بازنە بە دو جۆر دیاری دەکرێت:
٢–١: سنوری بەڕێوەبەرایەتی شار و شارۆچکەکان بە پێی نەخشەی ئیداری کوردستان ودەوڵەتی عێراقی فیدڕاڵ.
٢–٢: سنوری جوگرافی ناوه‌ندی تۆمارکردنی ده‌نگدان بە پێی نەخشەی کۆمیسیۆنی باڵای هەڵبژاردنەکان.
سێیەم، هه‌مو بازنه‌یه‌ک بۆ ناسینه‌وه‌ و جیاکردنه‌وه‌ی له‌ بازنەیەکی تر، ژماره‌یه‌کی تایبه‌ت به‌ خۆی ئه‌بێ کە ئه‌شێ به‌ هه‌مان ژماره‌ی ئه‌و گوند، ناحیە، گه‌ڕه‌ک و قوتابخانه‌یەوه‌ بێ که‌ بنکه‌ی تۆماری ده‌نگده‌رانی لێیە.
چوارەم،  لە سنوری جوگرافیای هەندێک شوێن کە بنکەی دەنگدەرانی کۆمسێۆنی لێ نیە دەشێ بازنە بە ناوی شوێنەکەوە بکرێتەوە.
 
مادەی دوەم: دیاریکردنی ژمارەی بازنەکان
١. قەزاکانی پارێزگاکانی کوردستان بە گوێرەی رێژەی دانیشتوان دابەشکراون بۆ سێ پلەی شارەوانی: پلەی ئەلف و بێ و جیم.
٢. بزوتنەوەی گۆڕان لە پۆلێنکردنی ئەنجومەنەکانی قەزاکاندا پێڕەوی هەمان دابەشکردنی کردوە.
٣. ژمارەی بازنەکان بە پێی پۆلێنکردنی شارەکان دیاری ئەکرێت.

مادەی سێیەم:  پێکهاتەی ئەنجومەنی بازنە
یەکەم، دەستەی بەڕێوەبەر لە پێنج ئەندام پێکدێت.
١–١: بازنه‌وان، بەرپرسی ئه‌نجومه‌نی بازنه‌یە.
١–٢: سکرتێری بازنه، کات و شوێنی کۆبونه‌وه‌ی ئه‌نجومه‌ن رێکده‌خات و ئه‌ندامه‌کانی لێ ئاگادارده‌کاتەوە؛ کۆنوسی کۆبونه‌وه‌کان ئاماده‌ ده‌کات؛ ئاماری ناوی هه‌ڵسوڕاوانی بزوتنەوەی گۆڕان رێکدەخات و دەیپارێزێت؛ و راپۆرتی مانگانە ئامادەدەکات. دەبێ سکرتێری بازنه خوێندەوار بێت و شارەزای کۆمپیوتەر بێت.
١–٣: به‌ڕێوه‌به‌ری کارگێڕی، به‌رپرسه‌ له‌ کاروباری دارایی و پێداویستیه‌ لۆجستیه‌کانی بازنه‌که‌ی.
١–٤: بەرپرسی ئافرەتان، بەرپرسە لە کاروباری رێکخراوەیی ئافرەتان لە سنوری بازنەدا. دەبێ بەرپرسی ئافرەتان خوێندەوار بێت.
١ـ٥: بەرپرسی ئامار و هەڵبژاردن.
دوەم، بنکه‌وانه‌کان:
٢–١: بنكه‌، یه‌كه‌ی بنه‌ڕه‌تیی پێكهێنانی بازنه‌یه‌ و ده‌بێت لانی كه‌می ژماره‌ی هه‌ڵسوڕاوان تیایدا له‌ حه‌وت کەس كه‌متر نه‌بێت. ئەرک و دەسەڵات و مافی بنکە بە رێنماییەک، لە لایەن ژوری پەیجوری و ئەنجومەنی قەزاوە، دیاری دەکرێن.
٢–٢: بنکەوان، سه‌رپه‌رشتی ئه‌نجومه‌نی بنکه‌ جیاوازه‌کانی سنوری ناوه‌ندی تۆمارکردنی ده‌نگده‌ران (مرکز تسجیل الناخبین) ی سه‌رده‌می هه‌ڵبژاردن ئه‌کات. ژماره‌ی بنکه‌وانه‌کانی ناو بازنه‌ به‌ پێی جیاوازی ژمارەی ناوەندەکانی دەنگدان جیاوازن.
سێیەم، هەمو هەڵسوڕاوانی ئەنجومەنی بازنە، ئەگەر مەرجەکانیان تێدا بێ، بۆیان هەیە خۆیان بۆ ئەندامەتی دەستەی بەڕێوەبەری بازنە کاندیدبکەن.

مادەی چوارەم: کۆبونه‌وه‌ی بازنە
یەکەم، دەستەی بەڕێوەبەری ئەنجومەنی بازنە بۆ راپەڕاندنی کاروبارەکانی لانی که‌م دو هه‌فته‌ جارێک و هه‌ر کاتێکیش پێویستی کرد کۆده‌بێته‌وه‌.
دوەم، ئه‌نجومه‌نی بازنه‌ بۆ ئاگاداربون له‌ ئاڵوگۆڕی دۆخی ناوچه‌که‌ی و هه‌ڵسه‌نگاندنی کاروباره‌کانی، مانگی جارێک کۆدەبێتەوە.
سێیەم، بازنه‌وان لە کۆبونەوەی مانگانەی ئەنجومەنی قەزادا نوێنه‌رایه‌تی بازنه‌که‌ی ده‌کا؛ ئەگەر نەیتوانی، ئەشێ سکرتێر لە جیاتی ئەو نوێنەرایەتی بازنەکەی بکات.
چوارەم، ئەنجومەنی بازنە بۆ راپه‌ڕاندنی کاره‌کانی له‌ دۆخی ئاسایی دا له‌ "مه‌کۆی بزوتنه‌وه‌ی گۆڕان" دا جێگه‌یه‌کی تایبه‌ت به‌ خۆی ده‌بێ و له‌ کاتی پێویستیشدا، به‌ تایبه‌تی له‌ کاتی هه‌ڵبژاردندا، بۆی هه‌یه‌ بەڕاوێژ لەگەڵ ئەنجومەنی قەزادا بنکە و باره‌گا بکاته‌وه‌.
مادەی پێنجەم: ئەرکەکانی بازنه‌
 یەکەم، راگرتنی پێوه‌ندی به‌رده‌وام له‌گه‌ڵ دانیشتوانی سنوری بازنه‌که‌دا لە رێگای به‌شداریکردن لە بۆنە کۆمەڵایەتی و کلتوری و نیشتمانیەکان، بڵاوکردنه‌وه‌ی راگه‌یه‌نراوه‌کانی گۆڕان و به‌ستنی کۆڕ و کۆبونه‌وە.
دوەم، پێشنیارکردنی ناوی کاندید بۆ هه‌ر هه‌ڵبژاردنێک (پارله‌مان، پارێزگا، شاره‌وانی، هتد) که‌ ئه‌نجام ئه‌درێت.
سێیەم، ئامادەکردنی ژماره‌ی پێویستی هه‌ڵسوڕاو بۆ راهێنانی بریکاری وێستگه‌کان و بانگه‌شه‌ی هه‌ڵبژاردن، به‌ هاوکاری بنکه‌کان و وێستگەکان و گروپه‌کانی پشتیوان.
چوارەم، ئاگادارکردنی بەڕێوەبەری میدیای ئه‌نجومه‌نی قەزا له‌ هه‌ر روداوێک کە له‌ سنوری بازنه‌که‌یاندا رودەدات.
پێنجەم، رێکخستنی هەڵسوڕاو و پشتیوانان لە سنوری چالاکی خۆیدا.
شەشەم. چاودێریکردنی دۆخی هەڵبژاردنەکان و تۆماری دەنگدەران.
حەوتەم، دابینکردنی چاودێری پێویست بۆ سەر سندوقەکان بە هەماهەنگی ژوری هەڵبژاردن.

بەشی چوارەم: رایەڵە

مادەی یەکەم: پێناسەی رایەڵە
 یەکەم، رایه‌ڵه‌؛ یەکەیەکی بنچینەییە لە بزوتنەوەی گۆران، لەسەر بنەمای پیشەیی و پێگەی جەماوەریی رێک دەخرێت، که‌ناڵی پەیوە‌ندی بزوتنه‌وه‌ی گۆڕانه‌ له‌گه‌ڵ پیشه‌و توێژە جیاوازه‌کانی کۆمه‌ڵگادا.
دوەم، سنوری کاری رایه‌ڵه‌ هه‌مو هاوپیشه‌کانی ده‌گرێته‌وه‌ کە له‌ سنوری شار یا قه‌زایه‌کدا کاردەکەن .
سێیەم، هه‌مو ئه‌نجومه‌نی رایه‌ڵه‌کان بۆ ناسینه‌وه‌ و جیاکردنه‌وه‌یان له‌ یه‌کتری دەبێ ناوێکیان هەبێت کە بگونجێ له‌ گه‌ڵ پیشه‌که‌یان یا پێگەی کۆمه‌ڵایه‌تی یان.
چوارەم، له‌ هه‌ندێ شار یا قه‌زادا که‌ یه‌کێ یا هه‌ندێ له‌و پیشانه‌ی لێ نیه‌ یان لێیه‌تی و به‌ ژماره‌ که‌من، ئه‌گه‌ر ژماره‌یه‌کی به‌رچاوی له‌و پیشه‌یه‌ تێدا نه‌بو،‌ پێویست ناکات رایه‌ڵه‌یان بۆ دروست بکرێ ئه‌شێ له‌گه‌ڵ رایه‌ڵه‌که‌ی نزیکی خۆی دا یه‌کبخرێن.

مادەی دوەم: دیاریکردنی ژمارەی رایەڵەکان
یەکەم،
١–١: قەزاکانی پارێزگاکانی کوردستان بە گوێرەی رێژەی دانیشتوان دابەشکراون بۆ سێ پلەی شارەوانی: پلەی ئەلف و بێ و جیم.
١–٢: ناوچە کوردستانیە دابڕێنراوەکان بە رێنمایی تایبەت رێکدەخرێن.
دوەم، بزوتنەوەی گۆڕان لە پۆلێنکردنی ئەنجومەنەکاندا پەیڕەوی هەمان جۆرە دابەشکردنی کردوە.
سێیەم، ژمارەی رایەڵەکان بە پێی پۆلێنکردنی شارەکان بەم شێوەیە دیاری دەکرێن:
٣ –١:بۆ پێکهێنانی رایەڵە لە قەزای پلەی ئەلف دا دەبێ لانی کەم ٢٥ ئەندامی هەبێ.
قەزاکانی پلەی ئەلف بریتین لە:
ناوەندی قەزای سلێمانی، ناوەندی قەزای هەولێر، ناوەندی قەزای دهۆک و ناوەندی قەزای کەرکوک.
٣–٢: بۆ پێکهێنانی رایەڵە لە قەزای پلەی بێ دا دەبێ لانی کەم ١٥ ئەندامی هەبێ.
قەزاکانی پلەی بێ بریتین لە:
پارێزگای سلێمانی: قەزای پشدەر، قەزای رانیە، قەزای کەلار و قەزای چەمچەماڵ.
پارێزگای هەولێر: قەزای کۆیە، قەزای سۆران و قەزای مێرگەسور.
پارێزگای دهۆک: قەزای زاخۆ.
پارێزگای کەرکوک: قەزای دوبز.
٣–٣: بۆ پێکهێنانی رایەڵە لە قەزای پلەی جیم دا دەبێ لانی کەم ٧ ئەندامی هەبێ.
قەزاکانی پلەی جیم بریتین لە:
پارێزگای سلێمانی: قەزای قەرەداخ، قەزای شارەزور، قەزای سەیدسادق، قەزای هەڵەبجە، قەزای شارباژێڕ، قەزای پێنجوین، قەزای ماوەت، قەزای دەربەندیخان، قەزای دوکان و قەزای کفری.
پارێزگای هەولێر: قەزای رەواندوز، قەزای دەشتی هەولێر، قەزای شەقڵاوە، قەزای چۆمان و قەزای خەبات.
پارێزگای دهۆک: قەزای سێمێل، قەزای ئامێدی، قەزای شێخان و قەزای ئاکرێ.
پارێزگای کەرکوک: قەزای داقوق.
چوارەم، هەر رایەڵەیەک ژمارەی ئەندامەکانی نەگەیشتە ژمارەی دیاریکراوی خاڵی سێیەم، پێویستە لە گەڵ رایەڵەیەکی نزیک لە پیشەکەی خۆی دا یەکبگرێت.
٤–١: رایەڵە لەسەر ئاستی ناحیە دروست ناکرێت، پێویستە یەک رایەڵەی سەرتاسەریی هەبێت بۆ یەک پیشەی دیاری کراو لە سنوری قەزاکەدا.
٤–٢: ناحیەکان نوێنەریان لە ئەنجومەنی رایەڵە سەرەکیەکەدا دەبێ.
پێنجەم، لە سنوری هەر قەزایەکدا بۆ هەر پیشەیەکی دیاریکراو پێویستە یەک رایەڵە هەبێ.

مادەی سێیەم: پێکهاتەی ئەنجومەنی رایەڵە 
ئه‌نجومه‌نی رایه‌ڵه‌ پێکدێت له‌:
یەکەم، دەستەی بەڕێوەبەر:
١–١: رێکخه‌ری رایه‌ڵه‌؛ سه‌رپه‌رشتی کاروباره‌کانی ئه‌نجومه‌نی رایه‌ڵه‌ ده‌کات.
١–٢: سکرتێری رایه‌ڵه؛ کات و شوێنی کۆبونه‌وه‌ی ئه‌نجومه‌ن رێکده‌خات و ئه‌ندامه‌کانی لێ ئاگادار ده‌کات؛ کۆنوسی کۆبونه‌وه‌کان ئاماده‌ ده‌کات؛ تۆماری ناوی هه‌ڵسوڕاوان رێکدەخات و ده‌پارێزێ؛ دەبێ خوێندەوار بێت و شارەزای کۆمپیوتەر بێت.
١–٣: به‌ڕێوه‌به‌ری کارگێڕی؛ به‌رپرسه‌ له‌ کاروباری دارایی و پێداویستیه‌ لۆجستیه‌کانی رایه‌ڵه‌که‌.
دوەم، ئه‌ندامانی ئه‌نجومه‌نی رایه‌ڵه‌؛ به‌ پێی پێویستیه‌کانی فراوانی پیشه‌که‌ ژمارەیان دیاری ده‌کرێ‌.

مادەی چوارەم:  کۆبونەوەی رایەڵە
 یەکەم، دەستەی بەڕێوەبەری ئه‌نجومه‌نی رایه‌ڵه‌ بۆ راپەڕاندنی کاروبارەکانی، لانی کەم مانگی یەک جار یان لە کاتی پێویستدا کۆدەبێتەوە.‌
دوەم، ئەنجومەنی رایەڵە بۆ ئاگاداری له‌ ئاڵوگۆڕی دۆخی پیشه‌که‌ی و ناوچه‌که‌ی و هه‌ڵسه‌نگاندنی کاروباره‌کانی رایه‌ڵه‌که‌ی، مانگی جارێک کۆدەبێتەوە.
سێیەم، رێکخه‌ری رایه‌ڵه‌، لە کۆبونەوەی مانگانەی ئه‌نجومه‌نی قه‌زادا نوێنەرایەتی رایەڵەکەی دەکا. ئه‌شێ لە بری رێکخەری رایەڵە، سکرتێر بەشداربێت.
چوارەم، ئه‌نجومه‌نی رایه‌ڵه‌ بۆ راپه‌ڕاندنی کاره‌کانی له‌ دۆخی ئاسایی دا له‌ "مه‌کۆی بزوتنه‌وه‌ی گۆڕان" دا جێگه‌یه‌کی تایبه‌ت به‌ خۆی ده‌بێ و له‌ کاتی پێویستیشدا، به‌ تایبه‌تی له‌ کاتی هه‌ڵبژاردندا، بۆی هه‌یه‌ بەهاوکاری لەگەڵ ئەنجومەنی قەزادا بنکە و باره‌گا بکاته‌وه‌.

مادەی پێنجەم: ئەرکەکانی رایەڵە
یەکەم، ئاماده‌کردنی پڕۆژه‌ی هه‌ڵسه‌نگاندن و تۆژینه‌وه‌ له‌ بواره‌ جیاوازه‌کانی ژیانی کۆمه‌ڵگادا وه‌کو:
١–١: هه‌ڵسه‌نگاندنی ئه‌دای کاری حکومەت و کەرتی تایبەت له‌ بواری ئه‌و پیشه‌یەدا.
١–٢: ئاماده‌کردنی پڕۆژه‌ی زانستی بۆ چاکسازی له‌ سیسته‌می کاری پیشه‌ی پێوه‌ندیداردا وه‌کو: سیسته‌می په‌روه‌رده‌، ته‌ندروستی، قه‌زائی، ژێرخان، ته‌کنۆلۆجی، بازاڕ، کشتوکاڵ، پیشه‌سازی و رۆشنبیری.
دوەم، پێشنیارکردنی ناوی کاندیدی شایستە بۆ هه‌ر هه‌ڵبژاردنێک (پارله‌مان، پارێزگا، شاره‌وانی، رێکخراوه‌کانی کۆمه‌ڵی شارستانی و هتد) و بۆ هەر دەزگا و دامەزراوەیەکی هەرێم و دەوڵەتی عێراقی فیدراڵ.
سێیەم، ئامادەکردنی ژماره‌ی پێویستی هه‌ڵسوڕاو بۆ وێستگه‌کان و بۆ بانگه‌شه‌ی هه‌ڵبژاردن، به‌ هاوکاری هاوپیشەکانی لە گروپه‌کانی پشتیوانی رایەڵە.

بەشی پێنجەم: ئەنجومەنی قەزا

مادەی یەکەم: پێناسەی ئەنجومەنی قەزا
ئەنجومەنی قەزا چەتری رێکخراوەیی بزوتنەوەی گۆڕانە، هەر ئەندامێکیان بە تەنیا و هەمویان بە کۆمەڵ بەرپرسیارن لە راپەڕاندنی ئەرکە گشتیەکانی بزوتنەوەی گۆڕان و پاراستنی یەکڕیزی و ناوبانگی بزوتنەوەکە لە سنوری قەزاکەیاندا.

مادەی دوەم: جیاوازی قەزاکانی هەرێمی کوردستان
یەکەم، شارەوانی قەزاکانی پارێزگاکانی هەرێمی کوردستان بە گوێرەی رێژەی دانیشتوان دابەشکراون بۆ سێ پلەی ئیداری: پلەی ئەلف و پلەی بێ و پلەی جیم.
دوەم، بزوتنەوەی گۆڕان لە پۆلێنکردنی ئەنجومەنەکانی قەزاکان دا پەیڕەوەی هەمان شێوە- دابەشکردنی کردوە.
سێیەم، بزوتنەوەی گۆڕان لە پێکهێنانی ئەنجومەنەکاندا تایبەتمەندی پێکهاتەی دانیشتوانی قەزاکان لە بەرچاودەگرێ.
چوارەم، ئەنجومەنەکانی ناوچە  کوردستانیە دابڕێنراوەکان دۆخی تایبەتییان دەبێ و مامەڵەی تایبەتی‌یان لە گەڵ دەکرێ.

مادەی سێیەم: پلەی ئیداری قەزاکان
یەکەم، ئەنجومەنی قەزای پلەی ئەلف
١–١: لە پارێزگای سلێمانی بریتیە لە:  ناوەندی قەزای سلێمانی.
١–٢: لە پارێزگای هەولێر بریتیە لە: ناوندی قەزای هەولێر.
١–٣: لە پارێزگای دهۆک بریتیە لە: ناوەندی قەزای دهۆک.
١–٤: لە پارێزگای کەرکوک بریتیە لە: ناوەندی قەزای کەرکوک.
دوەم، ئەنجومەنی قەزای پلەی بێ
٢–١: لە پارێزگای سلێمانی بریتیە لە: قەزای پشدەر، قەزای رانیە، قەزای کەلار و قەزای چەمچەماڵ.
٢–٢: لە پارێزگای هەولێر بریتیە لە: قەزای کۆیە، قەزای سۆران و قەزای مێرگەسور.
٢–٣: لە پارێزگای دهۆک بریتیە لە: قەزای زاخۆ.
٢–٤: لە پارێزگای کەرکوک بریتیە لە: قەزای دوبز.


سێیەم.ئەنجومەنی قەزای پلەی جیم
٣–١: لە پارێزگای سلێمانی بریتیە لە: قەزای قەرەداخ، قەزای شارەزور، قەزای سەیدسادق، قەزای هەڵەبجە، قەزای شارباژێڕ، قەزای پێنجوین، قەزای ماوەت، قەزای دەربەندیخان، قەزای دوکان و قەزای کفری.
٣–٢: لە پارێزگای هەولێر بریتیە لە: قەزای رەواندوز، قەزای دەشتی هەولێر، قەزای شەقڵاوە، قەزای چۆمان و قەزای خەبات.
٣–٣: لە پارێزگای دهۆک بریتیە لە: قەزای سێمێل، قەزای ئامێدی، قەزای شێخان، قەزای ئاکرێ و قەزای بەردەڕەش.
٣–٤: لە پارێزگای کەرکوک بریتیە لە: قەزای داقوق.

مادەی چوارەم: پێکهاتەی ئەنجومەنی قەزا
ئەنجومەنی قەزا پێکدێ لە:
یەکەم، ئەندامانی دەستەی بەڕێوەبەر
دوەم، بازنەوانەکان
سێیەم، رێکخەری ئەنجومەنی رایەڵە
چوارەم، ئەندامی تەواوکار (ئەگەر هەبو)

مادەی پێنجەم:
ژمارەی دەستەی بەڕێوەبەری ئەنجومەنی قەزای پلەی ئەلف و پلەی بێ و پلەی جیم پێکدێت لە ٧ ئەندام.
یەکەم، باژێڕوان:
١–١: به‌رپرسی یه‌که‌می ئەنجومەنی قەزایە.
١–٢: نوێنەرایەتی قەزاکەی دەکا لە جڤاتی نیشتمانی بزوتنەوەی گۆڕاندا.
١–٣: دەبێ نیشتەجێی سنوری ئەو قەزایە بێ؛ سەرچاوەیەکی ژیانی هەبێ؛ خوێندەوار بێ؛ تەمەنی لە ٢٥ ساڵ کەمتر نەبێ و لە ناوچەکەدا ناسراو بێ.

دوەم، سکرتێر:
٢–١: به‌رپرسه لە دیاریکردنی کات و شوێنی کۆبونه‌وه‌، تۆمارکردنی بابه‌ته‌کانی ناو کۆبونه‌وه‌ و بڕیار و راسپارده‌کان، هەماهەنگی نێوان هه‌مو بازنە و رایەڵەکانی سنوری قەزاکه‌یان.
٢–٢: دەبێ نیشتەجێی سنوری ئەو قەزایە بێ، سەرچاوەیەکی ژیانی هەبێ، دەبێ خوێندەوار بێت و لە بەکارهێنانی کۆمپیوتەر بزانێ.
سێیەم، بەرپرسی ئافرەتان:
٣–١: بەرپرسە لەکاروباری رێکخراوەیی ئافرەتان.
٣–٢: دەبێ نیشتەجێی سنوری ئەو قەزایە بێ و خوێندەوار بێت.
چوارەم، بەڕێوەبەری کارگێڕی:
٤–١: به‌رپرسه‌ له‌ راپه‌ڕاندنی کاروباری کارگێڕی، دارایی، ژمێریاری و دابینکردنی پێداویستی لۆجستی باره‌گا و بنکه‌کان.
٤–٢: دەبێ نیشتەجێی سنوری ئەو قەزایە بێ؛ سەرچاوەیەکی ژیانی هەبێ و شارەزایی هەبێ لە کاروباری کارگێڕیی دا.
پێنجەم، بەڕێوەبەری میدیا:
٥–١: بەرپرسە لە کاروباری میدیایی سنوری قەزاکەی و پەیوەندی لە گەڵ دەزگاکانی راگەیاندن. ئه‌گه‌ر پێویستی کرد هه‌واڵی کۆبونه‌وه‌ گرنگەکانی ئەنجومەنی قەزا و بڕیاره‌کانی، بە هەماهەنگی لەگەڵ ژوری رۆژنامەوانی بۆ رای گشتی بڵاوده‌کاته‌وه.‌
٥–٢: دەبێ نیشتەجێی سنوری ئەو قەزایە بێ؛ لەکاری میدیایی شارەزابێت؛ سەرچاوەیەکی ژیانی هەبێ؛ خوێندەوار بێت و لە بەکارهێنانی کۆمپیوتەر بزانێ.
شەشەم، بەڕێوەبەری پەیوەندی گشتی:
٦–١: به‌رپرسه‌ له‌ په‌یوه‌ندی له‌گه‌ڵ: حیزب و رێکخراوه‌ سیاسیه‌کان، رێکخراوەکانی کۆمەڵی شارستانی و داوودەزگاکانی حکومەت.
٦–٢: دەبێ نیشتەجێی سنوری ئەو قەزایە بێ؛ سەرچاوەی ژیانی هەبێت؛ خوێندەوار بێت و لەبەکارهێنانی کۆمپیوتەر شارەزابێت.
حەوتەم، نوێنەری ژوری هەڵبژاردن: بەرپرسە لەکاروباری هەڵبژاردنی قەزاکە؛ بە شێوازی دانان دەبێت و ئەندامی دەستەی بەڕێوەبەرە.
هەشتەم، نوێنەری ژوری پەیجوری: کاری هەڵسەنگاندن و بەدواداچون لە سنوری قەزادا دەکات، دەتوانێت بەشداری بکات لە کۆبونەوەکانی ئەنجومەندا بەڵام ئەندامی دەستەی بەڕێوەبەر نیە.

مادەی شەشەم: ئەندامی تەواوکار
یەکەم، ئەندامی تەواوکار بە پێی رێژەی دەنگی بە دەستهاتوی گۆڕان لە هەڵبژاردنی گشتی دا لە هەر قەزایەکدا لە چاو ژمارەی کورسیەکانی ناو پەرلەماندا، دیاری دەکرێ.
دوەم، لە گەڵ هەڵبژاردنی ئەندامانی دەستەی بەڕێوەبەری قەزادا، هەڵبژاردنی بۆ دەکرێت.
سێیەم، ژمارەی ئەندامی تەواوکار لەگەڵ گۆڕانی رێژەی دەنگی بەدەستهاتوی گۆڕاندا لە هەڵبژاردنی گشتی دا دەکرێت بگۆڕدرێت.
چوارەم، ئەرکەکانی ئەندامی تەواوکار:
٤–١: لەگەڵ باژێڕوان نوێنەرایەتی قەزاکەی دەکات لە جڤاتی نیشتمانیدا.
٤–٢: ئەندامی ئەنجومەنی قەزاکەی دەبێ.
٤–٣: لە کاتی ئامادەنەبونی باژێڕواندا کارەکانی رایی دەکا.
٤–٤: بە پێی شارەزایی، جڤاتی نیشتیمانی کاری پێ دەسپێرێ.
مادەی حەوتەم: کۆبونەوەی دەوریی
یەکەم، تێکڕای ئەندامانی ئەنجومەنی قەزا هەمو مانگێ کۆبونەوەی ئاسایی دەکەن هەروەها لە کاتی پێویستدا لە سەر داوای نیوەی ئەندامەکانی یان دوسێیەکی ئەندامانی ئەنجومەنی بازنەکان و ئەنجومەنی رایەڵەکان.
دوەم، دەستەی بەڕێوەبەر لانی کەم مانگی ٢ جار کۆبونەوەی ئاسایی خۆی دەکات.
سێیەم ، لە کۆبونەوەکاندا کار بە بنەمای "سەرکردایەتی بە کۆمەڵ" دەکرێ و، بڕیارەکان بە پێی بنەمای "زۆرایەتی رەها" دەدرێن .
چوارەم، کۆبونەوەی مانگانەی ئەنجومەنی قەزا بە سەرپەرشتی  باژێڕوان دەبێت و گەر ئەو نەیتوانی، ئەشێ بە سەرپەرشتی سکرتێر بێ.
پێنجەم، کۆبونەوەی مانگانەی نوێنەرانی قەزاکان بە سەرپەرشتی  باژێڕوان دەبێت و گەر ئەو نەیتوانی، ئەشێ بە سەرپەرشتی سکرتێر بێ.
مادەی هەشتەم: پەیوەندی ئەنجومەن و پەرلەمانتار
دەستەی بەڕێوەبەری ئەنجومەنی قەزا پەیوەندی ئەنجومەنەکەیان لە گەڵ نوێنەرەکانی قەزاکەیان لە فراکسیۆنەکانی گۆڕان لە پەرلەمانی کوردستان، ئەنجومەنی نوێنەرانی عێراق و ئەنجومەنی پارێزگا، بەشێوەیەکی دەوری رێکدەخا. ئەگەر قەزاکەیان لە یەکێ لەو دامەزراوە هەڵبژێردراوانەدا نوێنەری نەبو، ئەوا پەیوەندی ئەنجومەنەکەیان لەگەڵ نوێنەرەکانی نزیکترین قەزادا رێکدەخا:
یەکەم، بۆ ئامادەبون و بەشداری کردنیان لە کۆبونەوەی دەوری و کۆبونەوەی پێویست و لە چالاکی کۆڕ و کۆبونەوە فراوانەکانی ئەنجومەندا.
دوەم، بۆ ئاگاداربونی ئەنجومەنی قەزا لە چالاکیەکانی ئەوان و بەهێزکردنی پەیوەندییان لەگەڵ دامەزراوەکانی بزوتنەوەی گۆڕان و خەڵکی ناوچەکە لە سنوری قەزاکەیاندا.

مادەی نۆیەم: رەوتی کۆبونەوەکان
یەکەم، نەریتی سیاسی لە ناو بزوتنەوەی گۆڕاندا، وا پێویست دەکا لە کۆبونەوەکاندا دەربڕینی بیروبۆچون و گفتوگۆ هەرچۆنێک بێ ئازاد بێ؛ بریندارکەر نەبێ؛ گوێ لە یەکتری بگیرێت؛ رێگە بە یەکتری بدرێت بە راشکاوی قسەبکرێت؛ رێز لە بیر و رای جیاوازی یەکتری بگیرێت بەڵام دەشبێ پارێزگاری لە تایبەتمەندی و نهێنیبونی هەندێ لە باسەکان بکرێت.
دوەم، هەر ئەندامێ بە پێچەوانەی ئەمەوە رەفتاری کرد لێپرسینەوەی لە گەڵ دەکرێ.                                 
مادەی دەیەم: لێپرسینەوە
هەر هەڵسوڕاوێک لە پرەنسیپە گشتیەکانی بزوتنەوەی گۆڕان لایدا و زیانی بە بزوتنەوەکە گەیاند، یان کەمتەرخەمی کرد لەکارەکانیدا، دوای هەڵسەنگاندنی لادانەکەی لەلایەن ژوری پەیجوری و ژوری یاسایەوە، جۆری لێپرسینەوەکەی دیاری دەکرێت.

مادەی یانزەیەم: رونکردنەوە
یەکەم، دەستەی بەڕێوەبەر پاش راوێژ بە ژور و ئۆرگانە پەیوەندیدارەکانی بزوتنەوەی گۆڕان، بۆی هەیە لە کاتی پێوستدا رونکردنەوە لە سەر هەندێ پرسی پەیوەندیدار بە قەزاکەیانەوە بدا.
دوەم، باژێڕوان یان هەر هەڵسوڕاوێکی دەستەی بەڕێوەبەر، کە لە لەلایەن دەستەکەوە راسپێردرابێ، بۆی هەیە لە بۆنە گشتیەکاندا، لە چوارچێوەی بەرنامەی سیاسی بزوتنەوەی گۆڕان و پەیام و هەڵوێست و لێدوانە فەرمیەکانی دا، بەنوسراو یان بە زارەکی، هەڵوێست و ئامانجەکانی بزوتنەوەی گۆڕان رونبکاتەوە.
مادەی دوانزەیەم: رێکەوتنی سیاسی
دەستەی بەڕێوەبەر بۆی نیە رێککەوتنی سیاسی و یاداشتی هاوبەش لەگەڵ هیچ لایەنێکی سیاسی دا ئیمزابکات.

مادەی سیانزەیەم: تواناسازی هەڵسوڕاوان
دەستەی بەڕێوەبەر، بۆ گەشەپێدانی ئاستی تواناسازی و فراوانکردنی شارەزایی ئەندامانی ئەنجومەنی قەزا و هەڵسوڕاوەکانی  سنوری قەزاکەی بە هەماهەنگی لەگەڵ ژورەکانی بزوتنەوەی گۆڕان بە گشتی و لە گەڵ هەر ژورێک لە بواری پسپۆڕیەکەی دا بە تایبەتی ، بۆی هەیە خولی راهێنان، ۆرکشۆپ، کۆڕ و کۆبونەوە سازبکات.

مادەی چواردەیەم: سەرچاوەی ژیانی هەڵسوڕاوەکان
یەکێ لە مەرجەکانی سپاردنی کار بە هەڵسوڕاوانی بزوتنەوەی گۆڕان ئەوەیە کە سەرچاوەیەکی ژیانی هەبێ، ئەمە بە واتای ئەوە نیە بزوتنەوەی گۆڕان هاوکاری دارایی هەڵسوڕاوەکانی ناکا. بەڵکو مەبەست ئەوەیە کاتێ ئەو هەڵسوڕاوە ئیتر کاری رێکخراوەیی ناکا، بتوانێ بگەڕێتەوە سەرکارەکەی پێشوی و رێکخراوەکان و ئۆرگانەکانی گۆڕان نەبنە جێگەی کۆبونەوەی کەسانێ کە هیچ پیشەیەکیان نەبێ جگە لە حیزبایەتی و، موچەی حیزبی ببێ بە تەنیا سەرچاوەی ژیانی خۆیان و خێزانەکانیان؛ بەوەش رێ لە نوێبونەوەی ئۆرگانەکان بگیرێ.

بەشی شەشەم: هەڵبژاردنی دەستەی بەڕێوەبەری بازنە، رایەڵە، ئەنجومەنی قەزا

مادەی یەکەم: سەرپەرشتی هەڵبژاردن
یەکەم، ژوری هەڵبژاردن، بە هەماهەنگی لەگەڵ ژوری پەیجوری، بەرپرسە لە رێکخستنی پڕۆسەی هەڵبژاردن.
دوەم، هەڵبژاردن، لە سەرەتای دەسپێکردنەوە تا دەرچونی ئەنجامەکانی، لە لایەن لیژنەیەکەوە کە لە سێ ئەندام پێکهاتوە  ئەنجام دەدرێ.
٢–١: پارێزەرێکی ئەندامی سەندیکای پارێزەران، بەرپرس.
٢–٢: کارمەندێکی رێکخراوێکی کۆمەڵگای شارستانی، ئەندام.
٢–٣: نوێنەرێکی ژوری هەڵبژاردنی بزوتنەوەی گۆڕان، ئەندام.
سێیەم، هیچ کام لەو سێ ئەندامەی سەرپەرشتی پڕۆسەی هەڵبژاردن دەکەن، بۆی نیە خۆی کاندید بکات، یان بە قازانجی هیچ کاندیدێک پڕۆپاگاندە بکات.
چوارەم، هەڵبژاردن بە دەنگدانی نهێنی و راستەوخۆ، لە یەک رۆژدا لە کاتژمێر ٨ ی بەیانیەوە تا کاتژمێر ٦ ی ئێوارە، ئەنجام دەدرێ.
پێنجەم، بۆ ئەوەی رێگە بە دەنگدەر بدرێ لە پڕۆسەی دەنگداندا بەشداری بکا، دەبێ لە کاتی هەڵبژاردندا ناسنامەیەکی باوەرپێکراوی کەسێتی پیشان بدات.

مادەی دوەم: شێوازی هەڵبژاردن
یەکەم، هەر هەڵسوڕاوێکی بزوتنەوەی گۆڕان لە هەر ئاستێکی رێکخراوەیی دا بێ، ئەگەر ناوی لە تۆماری دەنگدەراندا نوسرابێ و مەرجەکانی تێدا بێ، بۆی هەیە بەشداری لە هەڵبژاردنەکاندا بکا،
دوەم، دەتوانێت خۆی کاندیدبکا بۆ هەر یەکێ لە ئەرکەکانی ئەندامەتی دەستەی بەڕێوەبەری بازنە، ئەنجومەنی رایەڵە و ئەنجومەنی قەزا.
سێیەم، پشتیوان دەتوانێ سێ مانگ پێش هەڵبژاردنەکان ناوی خۆی لە لیستی تۆماری دەنگدەراندا تۆمار بکات، تا مافی دەنگدان و خۆکاندیدکردنی هەبێت بۆ هەر یەکێ لە پۆستەکان، ئەگەر مەرجەکانی تێدابێ.
چوارەم، خۆکاندیدکردن بۆ پۆستەکانی دەستەی بەڕێوەبەری بازنە، رایەڵە، قەزا بە تەنها دەبێ و، هەریەکەیان بە تەنیا و بە دیاریکراوی بۆ یەکێ لە پۆستەکان خۆی کاندید دەکا.

مادەی سێیەم: رێکخستنی تۆماری دەنگدەران
یەکەم، ژوری پەیجوری، بە هەماهەنگی لەگەڵ ژوری هەڵبژاردندا، بەرپرسە لە رێکخستنی تۆماری دەنگدەران.
دوەم، تەنها ئەو هەڵسوڕاوانەی ناویان لە تۆماری دەنگدەراندا نوسراوە، لە پڕۆسەی هەڵبژاردندا مافی دەنگدانیان هەیە.
سێیەم، یەک مانگ پێش بانگەشەی هەڵبژاردن تا دوای پڕۆسەی هەڵبژاردن، تۆمارکردنی ئەندامی نوێ رادەگیرێت.
چوارەم، پێویستە لیستی تۆماری دەنگدەران بە شێوەیەکی دەوری و مانگانە رێکبخرێتەوە.


پێنجەم، لەهەڵبژاردنی دەستەی بەرێوەبەری بازنەدا ئەو هەڵسوڕاوانەی ناویان لە تۆماری دەنگدەراندا تۆمار دەکرێت بریتیە لە:
٥–١: ئەندامانی دەستەی بەڕێوەبەری ئێستا
٥–٢: ئەندامانی ئەنجومەنی بازنە (بنکەوان)
٥–٣: ئەندامانی ئەنجومەنی بنکە (وێستگەوان)
٥–٤: ئەندامانی ئەنجومەنی وێستگە (کە بە رێنمایی تایبەتی رێکخراوە)
شەشەم، لەهەڵبژاردنی دەستەی بەرێوەبەری رایەڵەدا، ئەو هەڵسوڕاوانەی ناویان لە تۆماری دەنگدەراندا تۆمار دەکرێت:
٦–١: ئەندامانی دەستەی بەڕێوەبەری ئێستا.
٦–٢: رێکخەری رایەڵە.
٦–٣:ئەندامانی ئەنجومەنی رایەڵە.
٦–٤: ئەندامانی رایەڵە.
حەوتەم، لەهەڵبژاردنی دەستەی ئەنجومەنی قەزادا، ئەو هەڵسوڕاوانەی ناویان لە تۆماری دەنگدەراندا تۆمار دەکرێت:
٧–١: ئەندامانی دەستەی بەڕێوەبەری ئێستا.
٧–٢: بازنەوان و ئەندامانی دەستەی بەڕێوەبەری بازنە، کە بە پێی دەستوری ناوخۆ هەڵبژێردراون.
٧–٣: رێکخەر و ئەندامانی دەستەی بەڕێوەبەری رایەڵە، کە بە پێی دەستوری ناوخۆ هەڵبژێردراون.

مادەی چوارەم:  داوا و سکاڵا و تانە
یەکەم، ئەگەر هەڵسوڕاوێک، کە پێشتر ناوی لە بەر هەر هۆیەک لە تۆماری دەنگدەراندا نەنوسرابو، ویستی بەشداری پرۆسەکە بێ، چ بۆ خۆکاندیدکردن یا بۆ دەنگدان، بۆی هەیە داواکەی بەنوسراو بباتە لای ژوری یاسایی.
دوەم، داوا وسکاڵا و تانەلێدان لە سەرجەم پڕۆسەی هەڵبژاردنەکە، لە کردنەوەی دەرگای خۆپاڵاوتنەوە تا راگەیاندنی ئەنجامی هەڵبژاردنەکان، بە نوسراو تۆماردەکرێ و دەدرێت بە ژوری یاسایی.
سێیەم، ژوری یاسایی، بە راوێژ لەگەڵ ژوری پەیجوری و ژوری هەڵبژاردندا، دوا بڕیار لەسەر داوا و تانە وسکاڵاکان دەدات.

مادەی پێنجەم: پوچەڵکردنی دەنگ
هیچ دەنگدەرێ بۆی نیە، لە پڕۆسەیەکی هەڵبژاردنی دیاری کراودا، لە یەک جار زیاتر دەنگبدا. بەپێچەوانەوە دەنگەکەی پوچەڵ دەکرێتەوە و لێپرسینەوەی لەگەڵدا دەکرێت.

مادەی شەشەم: خۆناساندن
یەکەم، مێدیاکانی گۆڕان بەرپرسن لە رێکخستنی لایەنی میدیایی پڕۆسەکە.
دوەم، هەمو کاندیدەکان بۆ خۆناساندن بە هەڵسوڕاوانی گۆڕان، لە سایتی فەرمی و لە دەزگاکانی راگەیاندنی بزوتنەوەی گۆڕاندا، هەلی یەکسانیان بۆ دەڕەخسێندرێ لەو سنورەی کە هەڵبژاردنەکەی تێدا دەکرێت.

مادەی حەوتەم: جێگرتنەوە
ئەگەر ئەندامێکی هەڵبژێردراو لە بەر هەر هۆیەک ئەرکەکانی بەجێ نەهێنا، پاش ئاگادارکردنەوەی ئەگەر هەر بەردەوام بو لەکەمتەرخەمیەکانی، لەکۆبونەوەی فەرمی ئەنجومەندا بە نوێنەرایەتی ئەندامێکی ژوری پەیجوری بە یەکێ لەم دو رێگایە شوێنەکەی پڕدەکرێتەوە:
یەکەم، بە دانانی ئەو کاندیدەی کە لە ریزبەندی ناوەکان لە هەڵبژاردندا دوای ئەو زۆرترین دەنگی هێناوە.
دوەم، ئەگەر ئەو کەسە لە لایەن زۆرایەتی ئەندامانی ئەنجومەنەکەوە پەسەندنەکرا و لە ریزبەندی ناوەکاندا کەسی تر نەبو، ئەوسا دوبارە هەڵبژاردنەوەی بۆ دەکرێتەوە.

مادەی هەشتەم: ماوەی کارایی
یەکەم، خولی هەڵبژاردن دو ساڵ جارێک دەبێت،
دوەم، دەستەی بەڕێوەبەری بازنە، رایەڵە و قەزا لە دوو خولی هەڵبژاردن زیاتر ناتوانێت بۆ هەمان پۆست خۆی کاندید بکاتەوە.


بەشی حەوتەم: رەوەندی کوردی

مادەی یەکەم :ئەنجومەنی وڵات
یەکەم، پێناسەی ئەنجومەنی وڵات:
١–١: لە هەر وڵاتێکی دەرەوەی کوردستان رەوەندی کوردی لێ نیشتەجێ بێ، ئەشێ "ئەنجومەنی وڵات" ی لێ دابمەزرێندرێ.
١–٢: لە هەمو وڵاتێکدا ئەشێ چەندین "ئەنجومەنی بازنە" هەبن، بەڵام دەبێت تەنیا یەک "ئەنجومەنی وڵات" هەبێ.
١–٣: ئەنجومەنی وڵات چەتری رێکخراوەیی بزوتنەوەی گۆڕان دەبێت لەو وڵاتەدا، هەر ئەندامێکیان بە تەنیا و هەمویان بە کۆمەڵ بەرپرسیار دەبن لە راپەڕاندنی ئەرکە گشتیەکانی بزوتنەوەی گۆڕان و پاراستنی یەکڕیزی و ناوبانگی بزوتنەوەکە لە ناو رەوەندی کوردی سنوری وڵاتەکەیاندا.
دوەم، ئەرکەکانی ئەنجومەنی وڵات:
٢–١: دانانی پلانی ساڵانە بۆ ئەنجامدانی چالاکی رۆشنبیری، کۆمەڵایەتی، هونەری و سیاسی.
٢–٢: بەهێزکردنی پەیوەندی نێوان رەوەندی کوردی تاراوگە و خەڵکی کوردستان و دامەزراوەکانی ناو هەرێم.
٢–٣: بەشداری چالاکانە لە هەڵبژاردنە گشتیەکانی عێراقی فیدڕاڵ و هەرێمی کوردستاندا.
٢–٤: هەوڵدان بۆ گەیاندنی نوێنەری رەوەندی کوردی بە دامەزراوەکانی وڵاتانی نیشتەجێ لەوانە: پەرلەمان، شارەوانی، رێکخراوەکانی کۆمەڵگای شارستانی و حیزبە سیاسیەکان.
٢–٥: هاندانی سەرمایەداران و پسپۆڕانی رەوەندی کوردی بۆ کارکردن لە کوردستان، لە بواری سەرمایەگوزاریی، زانست، تەکنەلۆجیا و ئامادەکردنی پڕۆژەی جۆراوجۆردا.
٢–٦: دۆزینەوەی کادری دەوڵەتیی شارەزا لە بوارە جیاوازەکانی ژیاندا.
٢–٧: هەوڵدان بۆ دروستکردنی نەواتی لۆبی کوردی.
٢–٨: چاودێری کاری دەستەی بەڕێوەبەر و دڵنیابون لە جێبەجێکردنی راسپاردەکانی ئەنجومەنی وڵات، لە ماوەی نێوان دو کۆبونەوەی ئەنجومەنی وڵاتدا.
 سێیەم، پێکهاتەی ئەنجومەنی وڵات:
ئەنجومەنی وڵات پێکدێ لە:
٣–١: ئەندامانی دەستەی بەڕێوەبەر
٣–٢: بازنەوانەکانی سەرانسەری وڵاتەکە
٣–٣: رێکخەری رایەڵەکان (ئەگەر هەبون)

مادەی دوەم: بنکە و ئەنجومەنی بازنە
یەکەم، پێناسەی بنکە و بازنه‌:
بنکە یەکەی بنەڕەتیی پێکهێنانی بازنەیە. بازنه‌ یەکەی رێکخراوەیی سەرەکی بزوتنەوەی گۆڕانە بۆ پەیوەندی لەگەڵ رەوەندی کوردی نیشتەجێی شارێ یا چەند شار و ناوچەی وڵاتێک.
دوەم، دیاریکردنی سنوری بازنە:
٢–١: سنوری کاری بازنە بە سنوری جوگرافی دیاری دەکرێ، بەم جۆرە:
٢–١–١: سنوری هەر شارەوانیەک کە ٢٥ هەڵسوڕاو یا زیاتری لێ بێ.
٢–١–٢: سنوری چەند شارەوانیەکی نزیک لە یەک، کە پێکەوە ٢٥ هەڵسوڕاو یا زیاتریان لێ بێ. ئەگەر کەمتر بون، دەکرێت لەگەڵ نزیکترین بازنەی جوگرافی یەکبگرن یان وەکو بنکە کاربکەن.
٢–٢، هەمو بازنەیەک ئەشێ بە پێی دابەشبونی شارەوانیەکانی ناوچەکەی، هەڵسوڕاوەکانی دابەش بکا بە سەر چەند بنکەیەکدا.
٢–٢–١: لە هەر گوند و لە هەر شارەدێ و لە ناوەندی هەر شارێکدا گەر چەند هەڵسوڕاوێکی گۆڕانی لێ بێ، دەتوانن پێکەوە بنکەیەک یا چەند بنکەیەک پێک بهێنن.
٢–٢–٢: لانی کەمی ژمارەی ئەندامانی بنکە دەبێت ٧ هەڵسوڕاو بێ.
٢–٢–٣: هەمو بنکەیەک دەتوانێ چەندین گروپی پشتیوان دابمەزرێنێ.
٢–٢–٤: ئەندامانی گروپی پشتیوان و هەڵسوڕاوانی ئەنجومەنی بنکە دەتوانن، بە پێی هەلومەرجی تایبەتی خۆیان، شێوەی پەیوەندیەکانی نیوان خۆیان و جۆری کۆبونەوەکانیان رێکبخەن.
٢–٢–٥: هەمو بنکەیەک بنکەوان، سکرتێر و بەڕێوەبەری کارگێڕی لە ناو خۆیدا بە هەڵبژاردن، یا بە پێکهاتن و یا بە تیروپشک، دیاری دەکات.
٢–٣: دەستەی بەڕێوەبەر و بنکەوانەکان پێکەوە ئەنجومەنی بازنە پێکدەهێنن.
٢–٤: هەر وڵاتێ ژمارەی بازنەکانی لە ٣ بازنە کەمتر بو، بەدەر لەم رێنماییە، بە پێی هەلومەرجی تایبەتی وڵاتەکە، مامەڵەی تایبەتی لەگەڵ دەکرێ.
٢–٥: هه‌ر بازنه‌یه‌ک، بۆ ناسینه‌وه‌ و جیاکردنه‌وه‌ی، ناوێکی تایبه‌ت یان ژماره‌یه‌کی تایبه‌ت به‌ خۆی ده‌بێ. ئه‌شێ به‌ هه‌مان ناوی ئەو شارە یا ئەو ناوچەیەوە بێ کە شوێنی دانیشتنی هەڵسوڕاوەکانیەتی.
٢–٦: هەڵسوڕاوانی سنوری بازنە، بۆ راپەڕاندنی کاروباری بازنەکەیان، "دەستەی بەڕێوەبەر" هەڵدەبژێرن.
سێیەم، دەستەی بەڕێوەبەری بازنە:
دەستەی بەرێوەبەری بازنە پێکدێ لە:
٣–١، بازنه‌وان
بەرپرسی یەکەمی دەستەی بەڕێوەبەرە؛ سەرپەرشتی ئه‌نجومه‌نی بازنه‌ ده‌کات و بەرپرسە لە کاری رێکخراوەی سنورەکەی.
٣–٢، سکرتێری بازنه
٣–٢–١:  بەرپرسە لەتۆمارکردن و پاراستنی لیستی ناوی هه‌ڵسوڕاوانی بزوتنەوەی گۆڕان و پشتیوانەکانی.
٣–٢–٢: بەرپرسە لە رێکخستنی کات و شوێنی کۆبونه‌وه‌ی ئه‌نجومه‌ن؛ ئاگادارکردنی ئه‌ندامه‌کانی و ئامادەکردنی کۆنوسی کۆبونه‌وه‌کان.
٣–٢–٣: گەیاندنی هەواڵی چالاکی و کۆبونەوە و روداوە گرنگەکانی ناوچەکەیان بە ئەنجومەنی وڵات و ئەگەر پێویستی کرد بە دەزگاکانی راگەیاندنی گۆڕان.
٣–٢–٤: پێویستە خوێندەوار بێت و شارەزای کۆمپیوتەر بێت.
٣–٣، به‌ڕێوه‌به‌ری کارگێڕی
 ٣–٣–١: به‌رپرسه‌ له‌ راگرتنی داهات و خەرجی دارایی بازنە.
٣–٣–٢: بەرپرسە لە دابینکردنی پێداویستیه‌ لۆجستیه‌کانی بازنه‌که‌ی و ئامادەکردنی شوێنی کۆبونەوە.
٣–٤: بەڕێوەبەری پەیوەندی گشتی
بەرپرسە لە دروستکردنی پەیوەندی لەگەڵ ئەندامانی رەوەندی کوردی. بە راوێژ لەگەڵ پەیوەندیە کۆمەڵایەتیەکانی ئەنجومەنی وڵاتدا، بەشداری بۆنە کۆمەڵایەتی و کلتوری و نیشتیمانیەکان دەکات.
٣–٥: نوێنەری ژوری هەڵبژاردن، لە هەر بازنەیەکدا کە سندوقی هەڵبژاردنی لێ بێت، بە دانان دەبێ.

چوارەم، ئەرکەکانی بازنه‌ بریتیە لە:
٤–١: سازدان و بەشداری چالاکی و بۆنە سیاسی، کۆمەڵایەتی، نیشتیمانی و فەرهەنگیەکانی رەوەندی کوردی.
٤–٢: بەسەرکردنەوەی هەڵسوڕاوان و پەیداکردنی پشتیوانی نوێ بۆ گۆڕان.
٤–٣: کۆکردنەوەی کۆمەکی دارایی بۆ چالاکیەکانی گۆڕان.
٤–٤: ئاگادارکردنی دەستەی بەڕێوەبەری ئەنجومەنی وڵات له‌ هه‌ر روداوێک کە له‌ سنوری بازنه‌که‌ی دا رودەدات.

مادەی سێیەم: پێکهاتەی دەستەی بەڕێوەبەرى ئەنجومەنی وڵات
یەکەم، دابەشکردنی ئەرکەکان
١–١: دەستەی بەڕێوەبەر، لە نێوان دو کۆبونەوەی ئەنجومەنی وڵاتدا، بەرپرسە لە جێبەجێکردنی بڕیار و راسپاردە و ئەرکەکانی ئەنجومەن.
١–٢: ئەندامانی دەستەی بەڕێوەبەری ئەنجومەنی وڵات، بە تەنیا و هەموشیان بە کۆمەڵ، بەرپرسیارن لە راپەڕاندنی ئەرکە گشتیەکانی بزوتنەوەی گۆڕان و پاراستنی یەکڕیزی و ناوبانگی بزوتنەوەکە لە سنوری وڵاتدا.
١–٣: بۆ ئەوەی تێکەڵاویی لە کار و فرمانەکانی ئەندامانی دەستەی بەڕێوەبەری ئەنجومەنی وڵاتدا رونەدا؛ نابێت هیچ لەو ئەندامانە دەست وەربدەنە کاروباری ئەوی تریان؛ و هەر یەکێ لەوان ئەرک و سنوری کارەکانی خۆی بزانێ، پێویستە بە وردی پێڕەوی خاڵی دوەمی ئەم مادەیە بکرێ.
دوەم، پێکهاتەی "دەستەی بەڕێوەبەر" ی ئەنجومەنی وڵات و ئەرکەکانی:
دەستەی بەڕێوەبەری ئەنجومەنی وڵات پێکدێ: لە ٧ ئەندام.
٢–١: بەرپرسی ئەنجومەن
٢–١–١: به‌رپرسی یه‌که‌می ئەنجومەنی وڵاتە.
٢–١–٢: بەرپرسە لە پاراستنی پەیوەندی هاوڕێیەتی و تەبایی و سازان لە نێوان سەرجەم ئەندامانی دەستە و ئەنجومەن و هەڵسوڕاوەکانی بزوتنەوەی گۆڕان لەو وڵاتەدا.
٢–١–٣: هاوکاری ئەندامانی دەستەی بەڕێوەبەرە بۆ ئەوەی هەریەکەیان لە سنوری ئەرکەکەی خۆی دا کارەکانی ئەنجام بدا.
٢–١–٤: بە هەماهەنگی لەگەڵ ژوری هەڵبژاردن و ژوری رەوەندی کوردی، بەرپرسە لە بەڕێوەبردنی پڕۆسەی هەڵبژاردنە گشتی و راپرسیە گشتیەکانی عێراقی فیدڕاڵ و و هەرێمی کوردستان.
٢–٢: سکرتێری ئەنجومەن
٢–٢–١: به‌رپرسه‌ له‌ دیاریکردنی کات و شوێنی کۆبونه‌وه‌؛ تۆمارکردنی بابه‌ته‌کانی ناو کۆبونه‌وه‌ و بڕیار و راسپارده‌کانی.
٢–٢–٢: هەماهە‌نگی نێوان هه‌مو بازنە و رایەڵه‌کانی سنوری وڵاتەکه‌ی دەکات.
٢–٢–٣: بە هەماهەنگی لەگەڵ ژوری رۆژنامەوانی هەواڵی چالاکیەکانی ئەنجومەنی وڵات و رەوەندی کوردی و روداوە گرنگەکانی وڵات لە دەزگاکانی راگەیاندن و سایتی فەرمی بزوتنەوەدا بڵاو دەکاتەوە.
٢–٢–٤: پێویستە خوێندەوار بێت و شارەزای بەکارهێنانی کۆمپیوتەر بێت.
٢–٣: بەڕێوەبەری لۆجستی
٢–٣–١: به‌رپرسه‌ له‌ راپه‌ڕاندنی کاروباری کارگێڕی، دارایی و ژمێریاری.
٢–٣–٢: بەرپرسە لە کۆکردنەوەی کۆمەکی دارایی بۆ ئەنجامدانی چالاکیەکانی بزوتنەوەکە.
٢–٣–٣: بەرپرسە لە دابینکردنی پێویستی لۆجستی ئەنجومەن و بازنەکانی؛ ئامادەکردنی شوێنی کۆڕ و کۆبونەوە و سیمینارەکانیان و شوێنی بۆنە کۆمەڵایەتی و سیاسی و فەرهەنگیەکان.
٢–٤: بەڕێوەبەری پەیوەندی کۆمەڵایەتی رەوەندی کوردی
٢–٤–١: بەرپرسە لە دروستکردنی پەیوەندی لەگەڵ توێژ و گروپە جیاوازەکانی رەوەندی کوردی و بەشداری لە خۆشی و ناخۆشیەکانی دا.
٢–٤–٢: بەرپرسە لە سازدان و بەشداریکردنی بۆنە نەتەوەیی و نیشتمانیەکانی کوردستانیانی وڵاتدا.
٢–٤–٣: بەرپرسە لە پەیوەندی لەگەڵ حیزب و رێکخراو و ناوەندە کوردستانیەکان.
٢–٤–٤: بە هەماهەنگی لەگەڵ ژوری پەیوەندی نیشتمانی، لە کۆنفرانسی نیشتیمانی و کۆبونەوەی حیزبە سیاسیە کوردستانیەکانی وڵاتەکەدا، نوێنەرایەتی بزوتنەوەی گۆڕان دەکا.
٢–٥: بەڕێوەبەری پەیوەندی گشتی
٢–٥–١: به‌رپرسه‌ له‌ په‌یوه‌ندی له‌گه‌ڵ وەزارەتی دەرەوەی وڵاتی نیشتەجێ و حیزبە سیاسیەکان، ئەندامانی پەرلەمان، رێکخراوەکانی کۆمەڵی شارستانی و دەزگاکانی راگەیاندنی ئەو وڵاتەدا.
٢–٥–٢: بە هەماهەنگی لە گەڵ ژوری پەیوەندی دیپلۆماسی و ئەنجومەنی وڵاتدا، لە کۆنفرانسی نیشتیمانی و کۆبونەوەی حیزبە سیاسیەکانی وڵاتەکەدا، نوێنەرایەتی بزوتنەوەی گۆڕان دەکا.
٢–٥–٣: بەڕێوەبەری پەیوەندی گشتی دەبێت زمانی وڵاتەکە، بە خوێندنەوە و بە نوسین، بە چاکی بزانێ.
٢–٦: رێکخەری رایەڵەی پیشەیی
٢–٦–١: رایەڵە بە جۆری پیشە و پێگەی جەماوەری دیاری دەکرێت بۆ دۆزینەوە و دامەزراندنی پەیوەندی لەگەڵ کەسایەتیە هەڵکەوتوە کوردستانیەکان لە بوارەکانی زانست و تەکنۆلۆجیا، مامۆستایانی زانکۆ، پزیشک، وەرزشکار، هونەرمەند، بازرگان، ئەندازیار، یاسایی، فەرمانبەر، کەسایەتی، پێشمەرگە، نەوەی نوێ و هتد.
٢–٦–٢: رێکخەری رایەڵەی پیشەیی دەبێت خۆی خاوەنی بڕوانامەیەکی ئاکادیمی بێ.
٢–٧: نوێنەری ئافرەتان بەرپرسە لە،
٢–٧–١: بە دواداچونی پرسی ئافرەتی کوردستانیی لەو وڵاتەدا.
٢–٧–٢: هەوڵدان بۆ دۆزینەوە و پێگەیاندنی هەڵسوڕاوی نوێی چالاکی بواری ئافرەتان لە ناو کابان، فەرمانبەران، کارمەندان و خوێندکاراندا.
٢–٧–٣: دامەزراندنی تۆڕی پەیوەندی لەگەڵ ئافرەتانی پشتیوانی گۆڕان و لەگەڵ ئافرەتانێ کە ناخوازن کاری رێکخراوەیی بکەن.
٢–٧–٤: دامەزراندنی پەیوەندی لەگەڵ رێکخراوەکانی کۆمەڵگای شارستانی تایبەت بە ئافرەتان و رێکخراوی ئافرەتانی سەر بە لایەنە سیاسیەکان.
٢–٧–٥: دەبێ خوێندەوار بێت.

مادەی چوارەم: رەوتی هەڵبژاردن
رێکخستنی تۆماری دەنگدەران:
١: دەستەی بەرێوەبەری وڵات و ئەنجومەنی بازنە، بە هاوکاری ژوری رەوەندی کوردی، بەرپرسن لە رێکخستنی تۆماری دەنگدەرانی هەر بازنەیەک بە جیا و هەر وڵاتێک بە جیا.
٢: تەنیا ئەو هەڵسوڕاوانەی ناویان لە تۆماری دەنگدەراندا نوسراوە، لە پڕۆسەی  هەڵبژاردندا مافی دەنگدانیان هەیە.

٣: ئەو هەڵسوڕاوانەی ناویان لە تۆماری دەنگدەراندا دەنوسرێ بریتین لە:
٣–١: ئەندامانی دەستەی بەڕێوەبەری بازنەکانی ئێستا.
٣–٢: ئەندامانی ئەنجومەنی بازنەکان.
٣–٣: ئەندام و هەڵسوڕاوانی بنکەکان (ئەگەر هەبون).
٤: هەر هەڵسوڕاوێکی بزوتنەوەی گۆڕان، لە هەر ئاستێکی رێکخراوەیی دا بێ، ئەگەر ناوی لە تۆماری دەنگدەراندا نوسرابێ و مەرجەکانی تێدابێ، بۆی هەیە بەشداری لە هەڵبژاردندا بکا و هەروەها بۆ هەر یەکێ لە پۆستەکانی ئەندامەتی دەستەی بەڕێوەبەری بازنە و ئەنجومەنی وڵات، خۆی کاندیدبکا.
٥: پشتیوان دەتوانێ پێش سێ مانگ لە هەڵبژاردنەکان ناوی خۆی لە لیستی تۆماری دەنگدەراندا تۆماربکا تاکو مافی دەنگدان و خۆکاندیدکردنی هەبێت بۆ هەر یەکێ لە پۆستەکانی دەستەی بەڕێوەبەری بازنە و ئەنجومەنی وڵات، ئەگەر مەرجەکانی تێدابێت.
٦: یەک مانگ پێش بانگەشەی هەڵبژاردن هەتاکو دوای پرۆسەی هەڵبژاردن، تۆمارکردنی ئەندامی نوێ رادەگیرێت.
٧: پێویستە لیستی تۆماری دەنگدەران بە شێوەیەکی دەوری نوێ بکرێتەوە.

مادەی پێنجەم: شێوەی دەنگدان
یەکەم، هەڵبژاردن لە هەمو قۆناغەکانی دا بە دەنگدانی نهێنی دەبێت. ژوری هەڵبژاردن، بەهەماهەنگی ژوری رەوەندی کوردی، بەرپرسە لە رێکخستنی قۆناغەکانی پڕۆسەی هەڵبژاردن.
دوەم، بۆ ئەوەی رێگە بە دەنگدەر بدرێ لە پڕۆسەی دەنگداندا بەشداری بکا، هەمو دەنگدەرێ پاسکۆدی تایبەت بە خۆی دەبێ.
سێیەم، لە حاڵەتی هاوتابونی دەنگەکانی دوو کاندیدا، ئەگەر یەکێکیان ئافرەت بو ئافرەتەکە بە دەرچو دادەنرێ و ئەگەر هەردوکیان پیاو بون بە پێکهاتنی هەردو کاندید یا بە تیروپشک یەکلایی دەکرێتەوە.
چوارەم، هەڵبژاردنی دەستەی بەڕێوەبەری ئەنجومەنی وڵات بە دو قۆناغ ئەنجام دەدرێ.
قۆناغی یەکەم، هەڵبژاردنی دەستەی بەڕێوەبەری بازنە.
قۆناغی دوەم، هەڵبژاردنی دەستەی بەڕێوەبەری ئەنجومەنی وڵات.

مادەی شەشەم: هەڵبژاردنی دەستەی بەڕێوەبەری بازنە
یەکەم، دەستەی بەڕێوەبەری ئەنجومەنی بازنە لە لایەن هەڵسوڕاوانی بزوتنەوەی گۆڕانەوە، کە ناویان لە تۆماری دەنگدەرانی ئەو بازنەیەدا نوسراوە، هەڵدەبژێردرێن.
دوەم، خۆکاندیدکردن بۆ پۆستەکانی دەستەی بەڕێوەبەری ئەنجومەنی بازنە بە تەنها دەبێ و، هەریەکەیان بە تەنیا و بە دیاریکراوی بۆ یەکێ لە پۆستەکانی دەستەی بەڕێوەبەر خۆی کاندید دەکا.

مادەی حەوتەم: هەڵبژاردنی دەستەی بەڕێوەبەری ئەنجومەنی وڵات
یەکەم، هەمو ئەندامانی ئەنجومەنی بازنەکان و هەڵسوڕاوانی بزوتنەوەی گۆڕان لە سنوری وڵاتەکەدا، ئەگەر مەرجەکانیان تێدا بێ، بۆیان هەیە خۆیان بۆ ئەندامەتی دەستەی بەڕێوەبەری وڵات کاندید بکەن.
دوەم، خۆکاندیدکردن بۆ پۆستەکانی دەستەی بەڕێوەبەری ئەنجومەنی وڵات بە تەنها دەبێت و، هەریەکەیان بە تەنیا و بە دیاریکراوی بۆ یەکێ لە پۆستەکانی دەستەی بەڕێوەبەر خۆی کاندید دەکا.
سێیەم، هەڵبژاردنی بەرپرس و دەستەی بەڕێوەبەری وڵات لە لایەن سەرجەم ئەندامانی دەستەی بەڕێوەبەری بازنەکانی سەرانسەری وڵاتەکەوە ئەنجام دەدرێ.

مادەی هەشتەم:  داوا و سکاڵا و تانە
یەکەم، هەر هەڵسوڕاوێک، کە پێشتر ناوی لە تۆماری دەنگدەراندا نوسرابێ بەڵام ناوی لە تۆمارەکەدا نەبێ و بیەوێت بۆ خۆکاندیدکردن یا بۆ دەنگدان بەشداری پڕۆسەکە بێ، دەتوانێت داواکەی بەنوسراو بباتە لای ژوری یاسایی.
دوەم، لیژنەیەک پێکدێت لە ژوری هەڵبژاردن، رەوەندی کوردی و ژوری یاسایی بۆ سەرپەرشتی و وەرگرتنی داوا و تانە و سکاڵاکان.
سێیەم، داوا و سکاڵا و تانەلێدان لە سەرجەم پڕۆسەی هەڵبژاردنەکە، لە کردنەوەی دەرگای خۆپاڵاوتنەوە تا راگەیاندنی ئەنجامی هەڵبژاردنەکان، بە نوسراو تۆماردەکرێ و پێشکەشی لیژنەکە دەکرێت.
چوارەم، ژوری یاسایی، بە راوێژ لەگەڵ ژوری رەوەندی کوردی و ژوری هەڵبژاردندا و لە ماوەی حەوت رۆژدا، دوا بڕیار لەسەر داوا و تانە و سکاڵاکان دەدات.

مادەی نۆیەم: رێکخستنی کۆبونەوەکان
یەکەم، کۆبونەوەی نۆرەیی
 ١–١: کۆبونەوەی بازنە
١–١–١: دەستەی بەڕێوەبەری ئەنجومەنی بازنە، بۆ راپەڕاندنی کاروبارەکانی، لانی کەم مانگی یەکجار یا هەر کاتێکی بە پێویست زانی کۆده‌بێته‌وه‌.
١–١–٢: ئەنجومەنی بازنە، لانی کەم هەر ٣ مانگ جارێ کۆدەبێتەوە.بۆ دانانی بەرنامەی کاری داهاتوی و هەڵسەنگاندنی کارەکانی ماوەی پێشوی،
١–١–٣: هەر کات دەستەی بەڕێوەبەر یا سێیەکی ئەندامانی ئەنجومەنی بازنە بە پێویستیان زانی، بۆ تاووتوێکردنی پرسێکی گرنگ، دەتوانن داوای کۆبونەوەی ئەنجومەن یا کۆبونەوەی گشتی سەرجەم هەڵسوڕاوانی بازنەکەیان بکەن.
١–٢: کۆبونەوەی ئەنجومەنی وڵات
١–٢–١: دەستەی بەڕێوەبەری ئەنجومەنی وڵات، بۆ راپەڕاندنی کاروبارەکانی، لانی کەم مانگی جارێ یا هەر کاتێکی بە پێویست زانی کۆده‌بێته‌وه.
١–٢–٢: ئەنجومەنی وڵات، بۆ دانانی بەرنامەی کاری داهاتوی و هەڵسەنگاندنی  کارەکانی ماوەی پێشوی، لانی کەم هەر ٣ مانگ جارێ کۆدەبێتەوە.
١– ٢–٣: هەر کات دەستەی بەڕێوەبەر یا سێیەکی ئەندامانی ئەنجومەنی وڵات بە پێویستیان زانی، بۆ تاووتوێکردنی پرسێکی گرنگ، دەتوانن داوای کۆبونەوەی گشتی سەرجەم هەڵسوڕاوانی وڵاتەکەیان بکەن.
١–٣: بازنه‌وان، لە کۆبونەوەکانی ئەنجومەنی وڵاتدا نوێنه‌رایه‌تی بازنه‌که‌ی ده‌کا. ئەگەر بازنەوان نەیتوانی ئامادەبێت، ئەشێ سکرتێر بەشدار بێ.
١–٤: لە کۆبونەوەکانی دەستەی بەڕێوەبەر و ئەنجومەنەکاندا، کار بە بنەمای "سەرکردایەتی بە کۆمەڵ" دەکرێ و بڕیارەکان بە پێی بنەمای "زۆرایەتی رەها" دەدرێن.
دوەم : کۆبونەوەی فراوان
٢–١: دەستەی بەڕێوەبەری وڵات، گەر بە پێویستی زانی یان لەسەر داوای سێیەکی دەستەی بەڕێوەبەری بازنەکان،  لەیەکێ لەو بارانە و لە سەر یەکێ لەو ئاستانە کە لە خوارەوە دیاری کراون، دەتوانێت داوای کۆبونەوەی فراوان، کۆنفرەنس و راپرسی بکات:
٢–١–١: ئاستی سەرجەم دەستەی بەڕێوەبەری بازنەکانی وڵاتەکەی.
٢–١–٢: ئاستی سەرجەم ئەندامانی ئەنجومەنی بازنەکانی وڵاتەکەی.
٢–١–٣: ئاستی سەرجەم هەڵسوڕاوانی گۆڕان لە وڵاتەکەی دا.
٢–١–٤: ئاستی تێکڕای جەماوەی رەوەندی کوردی.
٢–٢: ئاستەکان و بۆ یەکێ لەم کارانە:
٢–٢–١: سازدانی رەوەندی کوردی بۆ بەشداریکردن لە هەڵبژاردنی وڵاتەکەی خۆیاندا، بە مەبەستی دەنگدان بە کاندیدێکی کوردستانی بۆ شارەوانی، پەرلەمانی وڵات، پەرلەمانی ئەوروپی.
٢–٢–٢: سازدانی رەوەندی کوردی بۆ بەشداری لە هەڵبژاردنەکانی کوردستان و پشتیوانی لە لیستی گۆڕان.
٢–٢–٣: سازدانی رەوەندی کوردی بۆ پشتیوانی لە خەباتی خەڵکی کوردستان لە پێناوی خواستە سیاسی، کۆمەڵایەتی، ئابوری یەکانی.
سێیەم، رەوتی کۆبونەوەکان
٣–١: نەریتی سیاسی لە ناو بزوتنەوەی گۆڕاندا، وا پێویست دەکا لە کۆبونەوەکاندا دەربڕینی بیروبۆچون و گفتوگۆ هەرچۆنێک بێ، ئازاد بێ؛ بریندارکەر نەبێ؛ گوێ لە یەکتری بگیرێت؛ رێگە بە یەکتری بدرێت بە راشکاوی قسەبکرێت؛ رێز لە بیر و رای جیاوازی یەکتری بگیرێت، بەڵام دەبێت پارێزگاری لە تایبەتمەندی و نهێنیبونی هەندێ لە باسەکان بکرێت.
٣–٢: هەر ئەندامێ بە پێچەوانەی ئەمەوە رەفتاری کرد لێپرسینەوەی لەگەڵ دەکرێ.

مادەی دەیەم: لێپرسینەوە
هەرهەڵسوڕاوێک لە پرەنسیپە گشتیەکانی بزوتنەوەی گۆڕان لایدا و زیانی بە بزوتنەوەکە گەیاند یان کەمتەرخەمی نواند لەکارەکانیدا، دوای ئاگادارکردنی ژوری رەوەندی کوردی لەلایەن ئەنجومەنی وڵاتەوە، ژوری یاسایی بەهەماهەنگی ژوری رەوەندی کوردی هەڵسەنگاندنی لادانەکە دەکات و جۆری لێپرسینەوەکەی دیاری دەکات.

مادەی یانزەیەم: جۆری رێکخستنی پەیوەندی
یەکەم، ئەنجومەنی بازنە و ئەنجومەنی وڵات
١–١: هەمو بازنەوانەکان ئەندام دەبن لە ئەنجومەنی وڵاتدا.
١–٢: دەستەی بەڕێوەبەری ئەنجومەنی بازنە پەیوەندی لە گەڵ دەستەی بەڕێوەبەری ئەنجومەنی وڵات دەبێ.
دوەم، ئەنجومەنی وڵات و ئەنجومەنی وڵاتەکانی تر
٢–١: ئەنجومەنی وڵات بۆی هەیە لە گەڵ ئەنجومەنی وڵاتەکانی تر هەماهەنگی، هاوکاری و کاری هاوبەش بکات.
٢–٢: ئەنجومەنی ئەو وڵاتانەی نزیکن لە یەکتری، ئەگەر بە پێویستیان زانی، دەتوانن بۆ دانانی پلانی کاری هاوبەش کۆبونەوە یا کۆنفرەنسی هاوبەش ببەستن.
سێیەم، ئەنجومەنی وڵات و دامەزراوەکانی گۆڕان لە کوردستان
٣–١: دەستەی بەڕێوەبەری ئەنجومەنی وڵات پەیوەندی لەگەڵ دامەزراوەکانی گۆڕان لە کوردستان لە رێگەی ژوری رەوەندی کوردیەوە رێکدەخات.
٣–٢: ژوری رەوەندی کوردی، پەیوەندی دامەزراوەکانی گۆڕان لە کوردستان لەگەڵ دەستەی بەڕێوەبەری ئەنجومەنەکانی هەندەران رێکدەخات.
٣–٣: دەستەی بەڕێوەبەری ئەنجومەنی وڵات، بۆ هەر بابەتێکی پەیوەندیدار بە خۆی، دەتوانێ هەماهەنگی و راوێژ لەگەڵ ژورەکانی بزوتنەوەی گۆڕاندا بکا.

مادەی دوانزەیەم: راگەیاندنی رۆژنامەوانی
یەکەم، دەستەی بەڕێوەبەری ئەنجومەنی بازنە، پاش راوێژ بە ئەنجومەنی وڵاتەکەی، بۆی هەیە لە کاتی پێویستدا رونکردنەوە لە سەر هەندێ پرسی پەیوەندیدار بە سنوری بازنەکەیانەوە بدا.
دوەم، دەستەی بەڕێوەبەری ئەنجومەنی وڵات، پاش راوێژ بە ژوری رەوەندی کوردی، بۆی هەیە لە کاتی پێویستدا رونکردنەوە لە سەر هەندێ پرسی پەیوەندیدار بە وڵاتەکەیانەوە بدا.

مادەی سیانزەیەم: دوان لە بۆنە گشتیەکان دا
بەرپرسی ئەنجومەن یان هەر ئەندامێکی دەستەی بەڕێوەبەری ئەنجومەنی وڵات، کە لە لەلایەن دەستەکەوە راسپێردرابێ، بۆی هەیە لە بۆنە گشتیەکاندا لە چوارچێوەی بەرنامەی سیاسی بزوتنەوەی گۆڕان و پەیام و هەڵوێست و لێدوانە فەرمیەکانی، بەنوسراو یان بە زارەکی، هەڵوێست و ئامانجەکانی بزوتنەوەی گۆڕان لە کۆبونەوە گشتیەکانی کوردستانیانی هەندەراندا رون بکاتەوە. لە بازنەکاندا، ئەگەر دەستەی ئەنجومەنی وڵات لەوێ نەبن، دەکرێت بازنەوان یان هەر ئەندامێکی دەستەی بەرێوەبەری بازنە، کە لەلایەن دەستەکەوە راسپێردرابێت و پاش راوێژ بە ئەنجومەنی وڵاتەکەی، ئەو کارە ئەنجام بدات.

مادەی چواردەیەم: رێکەوتنی سیاسی
دەستەی بەڕێوەبەری ئەنجومەنی بازنە و ئەنجومەنی وڵات بۆی نیە رێککەوتنی سیاسی و یاداشتی هاوبەش لەگەڵ هیچ لایەنێکی سیاسی دا ئیمزابکا.

مادەی پانزەیەم: جێگرتنەوە
ئەگەر بەرپرسی ئەنجومەنی وڵات و بازنەوان یا ئەندامێکی هەڵبژێردراوی دەستەی بەڕێوەبەری ئەنجومەنی بازنە و ئەنجومەنی وڵات  لە بەر هەر هۆیەک ئەرکەکانی بەجێ نەهێنا، بە یەکێ لەم دو رێگایە شوێنەکەی پڕدەکرێتەوە:
یەکەم، بە دانانی ئەو کاندیدەی کە لە ریزبەندی ناوەکان لە هەڵبژاردندا دوای ئەو زۆرترین دەنگی هێناوە.
دوەم، ئەگەر ئەو کەسە لە لایەن زۆرایەتی ئەندامانی ئەنجومەنی بازنەوە پەسەندنەکراو کەسی تر نەبو لە ریزبەندی ناوەکاندا، ئەوسا دوبارە هەڵبژاردنەوەی بۆ دەکرێتەوە بە هەمان شێوەش بۆ ئەنجومەنی وڵات.

مادەی شانزەیەم: ماوەی کارایی
یەکەم، خولی هەڵبژاردنی دەستەی بەڕێوەبەری بازنە و ئەنجومەنی وڵات دو ساڵ جارێک دەبێت،
دوەم، هەر هەڵسوڕاوێک تەنها دەتوانێت بۆ دو خولی هەڵبژاردن بۆ هەمان پۆست خۆی کاندید بکات.


بەشی هەشتەم : جڤاتی گشتی

مادەی یەکەم: پێناسەی جڤاتی گشتی
جڤاتی گشتی چەتری پشتیوانی سیاسی و مەعنەوی، دامەزراوەی راوێژکاری بوارەکانی کاری سیاسی، رێکخراوەیی، کارگێڕی، دارایی و میدیایی بزوتنەوەی گۆڕانە.


مادەی دوەم: ئەرکەکانی جڤاتی گشتی
ئەرکه‌کانی جڤاتی گشتی بریتیه‌ له‌ دانانی نەخشەی کار و هاوکاری جڤاتی نیشتمانی بە راوێژ و راسپاردە دەربارەی:
یەکەم، هەڵسەنگاندنی پلانی گشتی جێبه‌جێکردنی به‌رنامه‌ی سیاسی بزوتنه‌وه‌ی گۆڕان .
دوەم، هەڵسەنگاندنی په‌یوه‌ندیه‌کانی بزوتنه‌وه‌ی گۆڕان له‌ سه‌ر ئاستی کوردستانی، عێراقی فیدڕاڵ، ناوچەیی، جیهانی، لەگەڵ  حیزب و رێکخراوە سیاسیەکان.
سێیەم، ئامادەکاری بۆ هەڵبژاردنەکانی ئەنجومەنی پارێزگا، ئەنجومەنی نوێنەرانی عێراقی فیدڕاڵ، پەرلەمانی کوردستان و هەڵبژاردنی هەر دامەزراوەیەکی تر.

مادەی سێیەم: پێکهاتەی جڤاتی گشتی
یەکەم، جڤاتی گشتی بزوتنەوەی گۆڕان پێکدێ لەو کەسایەتیە گشتییانەی کە لە ماوەیەکی تەمەنیاندا لە یەکێ لە بوارەکانی ژیاندا بەرپرسیارێتی دیاریان هەبوە، لەوانە:
١–١: کەسایەتی سیاسی
١–٢: کەسایەتی زانستی
١–٣: کەسایەتی کۆمەڵایەتی
دوەم، ژمارەی ئەندامانی جڤاتی گشتی نابێ لە ژمارەی ئەندامانی جڤاتی نیشتمانی زیاتر بێ.

مادەی چوارەم: کۆبونەوەکانی جڤاتی گشتی
یەکەم، کۆبونەوەی جڤاتی گشتی هەر دو مانگ جارێ هاوزەمان دەبێت لەگەڵ کۆبونەوەی جڤاتی نیشتمانی .
دوەم، بە ماوەیەکی کورت لە پێش کۆبونەوەی جڤاتی نیشتمانی دا ئەنجام دەدرێ.
سێیەم، ئەندامانی جڤات پێشتر لە بەرنامەی کۆبونەوە و کات و شوێنی کۆبونەوەکە ئاگاداردەکرێن.
چوارەم، بڕیاردان لە ناو جڤاتی گشتی دا بە زۆرینەی سادە دەبێت.


مادەی پێنجەم، کەسایەتی سیاسی
مەبەست لە کەسایەتی سیاسی، ئەوانەن کە لە یەکێ لەم بوارانەدا لە ساڵانی رابوردودا کاریان کردوە و خاوەنی ئەزمون و ناوبانگی باشن.
یەکەم، ئەندامەتی سەرکردایەتی حیزبەکانی کوردستان
دوەم، فەرماندەیەتی پێشمەرگەی کوردستان
سێیەم، ئەندامەتی ئەنجومەنی نوێنەرانی عێراقی فیدڕاڵ
چوارەم، ئەندامەتی پەرلەمانی کوردستان
پێنجەم، ئەندامەتی ئەنجومەنی پارێزگا
شەشەم، وەزیر، بریکاری وەزیر، راویژکار، بەڕێوەبەرە گشتیەکانی ئەنجومەنی وەزیرانی هەرێمی کوردستان و عێراقی
فیدڕاڵ
حەوتەم، سەفیرایەتی دەوڵەتی عێراقی فیدڕاڵ و نوێنەرەکانی حکومەتی هەرێم لە دەرەوە

مادەی شەشەم: کەسایەتی زانستی
مەبەست لە کەسایەتی زانستی، ئەوانەن کە لە یەکێ لەم بوارانەدا لە ساڵانی رابوردودا کاریان کردوە و خاوەنی ئەزمون و ناوبانگی باشن:
یەکەم، سەرۆکایەتی و مامۆستایەتی زانکۆکان و پەیمانگاکان
دوەم، دادوەرایەتی و پارێزەرایەتی و یاساناسێتی
سێیەم، هەڵکەوتوانی بواری پزیشکی، بەرێوەبەرایەتی نەخۆشخانە، ئەندازیارێتی و پەروەردەکاری

مادەی حەوتەم: کەسایەتی کۆمەڵایەتی
مەبەست لە کەسایەتی کۆمەڵایەتی، ئەوانەن کە لە یەکێ لەم بوارانەدا لە ساڵانی رابوردودا کاریان کردوە و خاوەنی ئەزمون و ناوبانگی باشن:
یەکەم، سەرۆکایەتی رێکخراوەکانی کۆمەڵگای شارستانی
دوەم، ئەندامەتی ژوری بازرگانی
سێیەم، هەڵکەوتوانی بواری هونەر و وەرزش و رۆشنبیری و پیاوانی ئاینی

مادەی هەشتەم جۆری هەڵبژاردنی کەسایەتیەکان
یەکەم، یا خۆیان داوای ئەندامەتی ئەکەن یا داوایان لێ دەکرێ.
دوەم، فۆرمی ئەندامەتی جڤاتی گشتی پڕدەکەنەوە.
سێیەم، خانەی راپەڕاندن لە کۆبونەوەی جڤاتی نیشتمانی دا کاندیدیان دەکات و بە زۆرینەی سادەی دەنگی ئەندامانی جڤاتی نیشتمانی پەسەند دەکرێن.

مادەی نۆیەم: دەستەی سەرۆکایەتی
یەکەم، جڤاتی گشتی کۆبونەوەی یەکەمی بە سەرۆکایەتی بە تەمەنترین ئەندامی ئەنجام دەدا.
دوەم، لە یەکەم کۆبونەوەی دا یان لە کۆبونەوەکانی دواتردا، دەستەی سەرۆکایەتی جڤاتی گشتی بە دەنگدانی راستەوخۆی نهێنی هەڵدەبژێرن.
سێیەم، دەستەی سەرۆکایەتی پێکدێ لە:
٣–١: سەرۆکی جڤاتی گشتی
٣–٢: جێگری سەرۆکی جڤاتی گشتی
٣–٣: سکرتێری جڤاتی گشتی
چوارەم، ئەندامانی جڤاتی گشتی، بۆ ئامادەکردنی لێکۆڵینەوە و راسپاردە و ئامۆژگاری بۆ هاوکاریکردنی دامەزراوەکانی گۆڕان و فراکسیۆنەکانی پەرلەمانی کوردستان و ئەنجومەنی نوێنەرانی عێراق و ئەنجومەنی پارێزگاکان، لیژنەی جیاواز بۆ بابەتی جیاواز پێکدەهێنن.

مادەی دەیەم: پەیوەندی جڤاتی گشتی و جڤاتی نیشتمانی
یەکەم، جڤاتی نیشتمانی و جڤاتی گشتی هاوکاری یەکتر دەبن.
دوەم، لە کاتی قەیران و روداوی چاوەڕێنەکراودا، بۆ تاووتوێکردن و ئاڵوگۆڕی بیروڕا و تێگەیشتنی هاوبەش، کۆبونەوەی هاوبەش دەکەن.
سێیەم، جڤاتی گشتی بۆی هەیە ئەندامێ یا هەندێ لە ئەندامانی جڤاتی نیشتمانی، بۆ پێشکەشکردنی رونکردنەوە لە سەر هەندێ بابەتی تایبەت، بۆ دوان و گفتوگۆ، بانگ بکا بۆ کۆبونەوەکانی، هەروەها بە پێچەوانەوە.
چوارەم، پێویستە راسپاردە و راوێژ و ئامۆژگاریەکانی جڤاتی گشتی لە لایەن جڤاتی نیشتمانیەوە رەچاوبکرێ.

بەشی نۆیەم: جڤاتی نیشتمانی

مادەی یەکەم: پێناسەی جڤاتی نیشتمانی
یەکەم، جڤاتی نیشتمانی دامەزراوەی سەرکردایەتی بوارەکانی کاری سیاسی، رێکخراوەیی، کارگێڕی، دارایی و میدیایی بزوتنەوەی گۆڕانە.
دوه‌م، جڤاتی نیشتمانی به‌رزترین ده‌سه‌ڵاته‌ له‌ نێوان دو هەڵبژاردندا.

مادەی دوەم: ئەرکەکانی جڤاتی نیشتمانی
یەکەم، سه‌رپه‌رشتی کردنی هه‌مو ده‌زگا و دامه‌زراوه‌کانی گۆڕان؛ چاودێری و هه‌ڵسه‌نگاندنی ئەدای هه‌مو ئاسته‌کانی په‌یکه‌ره‌ی رێکخراوه‌یی بزوتنه‌وه‌که.‌
دوەم، دانانی نه‌خشه‌رێگا بۆ جێبه‌جێکردنی به‌رنامه‌ و سیاسەتی بزوتنه‌وه‌ی گۆڕان.
سێیەم، رێکخستنی په‌یوه‌ندیه‌کانی بزوتنه‌وه‌ی گۆڕان له‌ سه‌ر ئاستی کوردستانی، عێراقی، ناوچەیی، نێودەوڵەتی لەگەڵ حیزب و رێکخراوە سیاسیەکان.
چوارەم، چاودێری و هه‌ڵسه‌نگاندنی ئه‌دائی فراکسیۆنه‌کانی گۆڕان و ئه‌دائی ئه‌ندامه‌کانی.
پێنجەم، ئامادەکاری بۆ هەڵبژاردنەکانی ئەنجومەنی پارێزگا، ئەنجومەنی نوێنەرانی عێراق، پەرلەمانی کوردستان و هەر هەڵبژاردنێکی تر.
شەشەم، ئامادەکاری بۆ بەستنی کۆنفرانسی نیشتیمانی بزوتنەوەی گۆڕان.
مادەی سێیەم: پێکهاتەی جڤاتی نیشتمانی
یەکەم، ئەندامانی خانەی راپەڕاندن.
دوەم، باژێڕوان و ئەندامانی تەواوکار.
سێیەم، سەرۆکی فراکسیۆنەکانی گۆڕان لە ئەنجومەنی نوێنەرانی عێراق، پەرلەمانی کوردستان و ئەنجومەنی پارێزگاکان.
چوارەم، رێکخەری ژورەکان .
پێنجەم، نوێنەری ئەنجومەنەکانی رەوەندی کوردی لە هەندەران .
شەشەم، نوێنەری کاروباری رێکخراوەیی ئافرەتان .

مادەی چوارەم: کۆبونەوەکانی جڤاتی نیشتمانی
یەکەم، جڤاتی نیشتمانی لە هەلومەرجی ئاسایی دا  دو مانگ جارێک کۆدەبێتەوە.
دوەم، لە کاتی پێویست دا، لە سەر داوای رێکخەری گشتی یان سێیەکی ئەندامەکانی کۆدەبێتەوە .
سێیەم، ئەندامانی جڤاتی نیشتمانی، دە رۆژ بەر لە دەستپێکی کۆبونەوەی ئاسایی، لە بەرنامە و کات و شوێنی کۆبونەوەکە ئاگاداردەکرێن. لەکاتی ئامادەنەبونی ئەندامێکی جڤاتدا، نوێنەرێکی ئۆرگانەکە رادەسپێرێت بەشداربێت.
چوارهەم، دەنگدان لە کۆبونەوەکانی جڤاتی نیشتمانی دا، بە پێی بابەتەکان، ئەشێ بە ئاشکرا یان بە نهێنی بێ. بە زۆرینەی سادە بڕیار دەدرێ.

مادەی پێنجەم: جێگرتنەوەی ئەندامێتی جڤاتی نیشتیمانی
هەر یەکێ لە ئەندامانی خانەی راپەڕاندن، رێکخەری ژورەکان، باژێڕوانەکان و ئەندامانی تەواوکار پۆستی باڵای لە حکومەتدا وەرگرت، بو بە وەزیر، سەفیر، وەکیلی وەزیر، راوێژکار، بەڕێوەبەری گشتی، پەرلەمانتار، یا دەستی لە کار کێشایەوە یان مرد جێگەکەی چۆڵ ئەکا بۆ کەسێکی تر و لەماوەی دوومانگدا جێگەکەی پڕدەکرێتەوە.

مادەی شەشەم: نوێنەرایەتی قەزاکان
نوێنەرایەتی قەزاکان بە دو پێوەر دیاری دەکرێ:
یەکەم، بەرکەوتی قەزا
پشکی نوێنەرایەتی دانیشتوانی قەزا لە جڤاتی نیشتمانی دا، بێ گوێدانە پلەی شارەوانی قەزاکە، یەک ئەندامە.
١–١: ئەم شوێنە بۆ باژێڕوان تەرخان دەکرێ، کە بە پێی دەستوری ناوخۆ هەڵدەبژێردرێ.
١–٢: باژێڕوانی نوێ لە کاتی گۆڕینیدا لە هەڵبژاردندا یا لە بەر هەر هۆیەکی تر، جێگەی باژێڕوانی پێشو لە جڤاتی نیشتمانی دا دەگرێتەوە.
دوەم، بەرکەوتی رێژەیی
پشکی رێژەی دەنگی بەدەستهاتوی گۆڕان لە قەزاکەدا لە چاو رێژەی کۆی دەنگی بەدەستهاتوی گۆڕان دەبێتە ئەندامی تەواوکار:
٢–١: ئەندامانی تەواوکار لە لایەن ئەندامانی ئەنجومەنی قەزاکان و دەستەی بەڕێوەبەری بازنە و رایەڵەوە هەڵدەبژێردرێن.
٢–٢: لە حاڵەتی هاوتابونی دەنگەکانی دو کاندیدا، ئەگەر یەکێکیان ئافرەت بو ئافرەتەکە بە دەرچو دائەنرێ و ئەگەر هەردوکیان پیاو بون بە پێکهاتنی هەردو کاندید یا بە تیروپشک یەکلایی دەکرێتەوە.
٢–٣: لە کاتی گۆڕینی لە هەڵبژاردندا یا لە سۆنگەی هەر هۆیەکی ترەوە، ئەندامی تەواوکاری نوێ جێگەی ئەندامی تەواوکاری پێشو دەگرێتەوە.
٢–٤: ئەندامی تەواوکاری جڤاتی نیشتمانی لە کاری رێکخراوەیی لە شوێنەکەی خۆی دا بەردەوام دەبێ.

مادەی حەوتەم: نوێنەرایەتی فراکسیۆنەکان
یەکەم، فراکسیۆنەکان بریتین لە:
١–١: فراکسیۆنی گۆڕان لە ئەنجومەنی نوێنەرانی عێراق.
١–٢: فراکسیۆنی گۆڕان لە پەرلەمانی کوردستان.
١–٣: فراکسیۆنی گۆڕان لە ئەنجومەنی پارێزگاکان.
دوەم، سەرۆکی هەر یەکێ لەم فراکسیۆنانە کە لە لایەن فراکسیۆنەکانی خۆیانەوە هەڵدەبژێردرێن، دەبنە ئەندامی جڤاتی نیشتمانی.
سێیەم، لە کاتی گۆڕینی سەرۆکی فراکسیۆندا، سەرۆکی نوێ لە ئەندامەتی جڤاتدا جێگەی سەرۆکی پێشو دەگرێتەوە.


مادەی هەشتەم: نوێنەرایەتی ژورەکان
یەکەم، ژورەکان بريتين لە:
١: ژوری پەیوەندیە گشتیەکان (سیاسی، دبلۆماسی)
٢: ژوری توێژینەوەكان (سياسى، ئابورى و ستراتيجيەكان)
٣: ژوری ناوچە کوردستانیە دابڕێنراوەکان
٤: ژوری حکومەت و پەرلەمان
٥:  ژوری سامانە سروشتیەکان .
٧: ژوری هەڵبژاردن
٨: ژوری  پەیجوری
٩: ژورى ياسايى
١٠: ژوری رۆژنامەوانی
١١: ژوری کارگێری و دارایی
١١: ژوری رەوەندی کوردی
دوەم،
٢–١: جڤاتی نیشتمانی بۆی هەیە بە پێی گۆڕانی پێویستیەکان ژوری نوێ دابمەزرێنێ و، یان هەڵبوەەشێنێتەوە و، ناوەندی کارکردنی ژورێک  لە شارێکەوە بگوێزێتەوە بۆ شارێکی تر.
٢–٢: رێکخەر و ئەندامانی ژورەکان لە سەر بنەمای پسپۆڕی دائەنرێن.
٢–٣: ژمارەی ئەندامانی ژور بە پێی پێویستی و جۆری  کار دیاری دەکرێ.
٢–٤: رێکخەری ژور لە لایەن خانەی راپەڕاندنەوە کاندید ئەکرێ و، لە کۆبونەوەی جڤاتی نیشتمانی دا بە زۆرینەی سادە پەسەند ئەکرێت لە حاڵەتی وازهێنانی یان گۆڕینی لەبەر هەر هۆیەکی تر، بەزۆرینەی رەها ئەگۆڕێن.
٢–٥: ئەندامی ژور لەسەر داوای رێکخەری ژور و بە راوێژ لەگەڵ سکرتێری  ژورەکان و خانەی راپەراندن دادەنرێت.
٢–٦: لە کاتی گۆڕینی رێکخەری ژوردا رێکخەری نوێ، جێگەی رێکخەری پێشو لە جڤاتی نیشتمانی دا دەگرێتەوە.
٢–٧: هەر ژورێ  بۆ رێکخستنی کاروبارەکانی پێڕەوێکی ناوخۆی دەبێت کەلەلایەن ژورەوە بە هەماهەنگی لەگەڵ سکرتێری ژورەکان دائەنرێت، کە تێیدا پەیکەری رێکخراوەی و مەرجەکانی رێکخەرو ئەندامەکانی و ئەرک و دەسەڵاتەکانیان دیاری دەکات.

مادەی نۆیەم: نوێنەرایەتی ئافرەتان
نوێنەرایەتی ئافرەتان لە جڤاتی نیشتمانی دا پێکدێت لە چوار ئەندام؛ بەرپرسی ئافرەتان لە ئەنجومەنی قەزاکانی پارێزگاکانی هەولێر، سلێمانی، دهۆک و کەرکوک.

مادەی دەیەم: نوێنەرایەتی رەوەندی کوردی
رەوەندی کوردی  چوار نوێنەریان دەبێت.
یەکەم، مەبەست لە هەندەران وڵاتانی دەرەوەی عێراقە.
دوەم، ئەنجومەنەکانی وڵاتانی هەندەران، بە پێی لێکچونی هەلومەرجی وڵاتەکان لە یەکتری و نزیکی جوگرافی یان لە یەکتریەوە، نوێنەری خۆیان بۆ جڤاتی نیشتمانی دیاری دەکەن.
سێیەم، ژمارە و شێوەی هەڵبژاردنی نوێنەرەکانیان بە پێی رێنمایی تایبەتی دیاری دەکرێ.

مادەی یانزەیەم: هەڵوەشاندنەوە
لە بەر هەر هۆیەک، پشێوی یا لادان لە رێبازی گشتی لە هەر بازنە، رایەڵە، ئەنجومەنی قەزاکان، ئەنجومەنەکانی وڵاتانی رەوەندی کوردی روی دا، یا لە ئەنجامی سکاڵای هەڵسوڕاوەکانیدا ژوری یاسایی بڕیاری دا، جڤاتی نیشتیمانی بۆی هەیە "ئەو یەکە رێکخراوەییە" هەڵبوەشێنێتەوە و بە مەبەستی دامەزراندنەوەی، بڕیاری هەڵبژاردنی سەرلەنوێی تێدا ئەنجام بدا.

مادەی دوانزەیەم: خانەی راپەڕاندن
خانه‌ی راپه‌ڕاندن بەرپرسی جێبەجێکردنی بڕیار و راسپاردەکانی جڤاتی نیشتمانی بزوتنه‌وه‌ی گۆڕانه‌، لە نێوان دو کۆبونەوەدا.


مادەی سیانزەیەم: هەڵبژاردنی ئه‌ندامانی خانه‌ی راپه‌ڕاندن
یەکەم، ئەندامانی خانەی راپەڕاندن، بە پێی ئەرکەکانی پێکدێ لە: رێکخەری گشتی، سکرتێرەکانی کاروباری جڤاتی نیشتمانی، فراکسیۆن، ژورەکان، باژێڕەکان، خەڵک و سەرۆکی جڤاتی گشتی.
دوەم، رێکخەری گشتی و ئەندامانی خانەی راپەڕاندن، جگە لە سەرۆکی جڤاتی گشتی، لە ناو ئەندامانی جڤاتی نیشتمانی یان لە ناو ئەندامانی جڤاتی گشتی و کەسایەتیە ناسراوەکانی بزوتنەوەی گۆڕاندا کە ئەندامی جڤاتی نیشتمانی و جڤاتی گشتی نین، کاندید دەکرێن؛ لە کۆبونەوەی جڤاتی نیشتمانی دا، بە دەنگدانی نهێنی و راستەوخۆ و به‌ زۆرینه‌ی ساده‌ ئەپەسەندرێن و به‌ زۆرایه‌تی ره‌های ده‌نگی هه‌مو ئه‌ندامه‌کانی دەگۆڕدرێن.
سێیەم، هەڵبژاردنی رێکخەری گشتی وئەندامانی خانەی راپەڕاندن دو ساڵ جارێک دەبێت.
چوارەم، رێکخەری گشتی و ئەندامانی خانەی راپەڕاندن تەنها بۆ سێ خولی هەڵبژاردن بۆیان هەیە، بۆ هەمان پۆست، خۆیان کاندیدبکەن.

مادەی چواردەیەم: پێکهاتە و ئەرکەکانی خانەی راپەڕاندن
ئەرکەکانی ئەندامانی خانه‌ی راپه‌ڕاندنی جڤاتی نیشتمانی بریتیە لە:
یەکەم، رێکخەری گشتی
١–١: سەرپەرشتی کۆبونەوەکانی خانەی راپەڕاندن و جڤاتی نیشتمانی دەکا.
١–٢: لە بەردەم جڤاتی نیشتمانی دا بەرپرسیارە.
١–٣: لە کاتی ئامادەنەبونی دا، یەکێ لە ئەندامانی خانەی راپەڕاندن رادەسپێرێ بۆ ئەنجامدانی ئەرکەکانی.
دوەم، سکرتێری کاروباری جڤاتی نیشتمانی، کە ئەرکەکانی بریتیە لە:
٢–١: دیاریکردنی کات و شوێن و کارنامەی کۆبونەوەکانی جڤاتی نیشتمانی.
٢–٢: تۆمارکردنی کۆنوسی کۆبونەوەکان، تۆمارکردنی بڕیار و راسپاردەکانی و گەیاندنی بە جێگەی پەیوەندیدار.
سێیەم، سکرتێری کاروباری فراکسیۆنەکان، کە ئەرکەکانی بریتیە لە هەماهەنگی نێوان فراکسیۆنەکان و دامەزراوەکانی بزوتنەوەی گۆڕان.
چوارەم، سکرتێری کاروباری باژێڕەکان، کە ئەرکەکانی بریتیە لە رێکخستنی پەیوەندی رۆژانەی نێوان باژێڕوان و باژێڕەکان و خانەی راپەڕاندن و وەڵامدانەوەی نامە و پەیام و پرسیارەکانیان.
پێنجەم، سکرتێری کاروباری ژورەکان، کە ئەرکەکانی بریتیە لە هەماهەنگی نێوان ژورەکان و خانەی راپەڕاندن و دامەزراوەکانی گۆڕان.
شەشەم، سکرتێری کاروباری خەڵک، کە ئەرکەکانی بریتیە لە:
٦–١: پێشوازیکردنی ئەوانەی رۆژانە سەردانی مەکۆی سەرەکی دەکەن.
٦–٢: گوێگرتن لە پێشنیار، رەخنە، ئامۆژگاری، سکاڵاکانی خەڵک و گەیاندنی بابەتەکانیان بە جێگەی پەیوەندیدار.
حەوتەم، سەرۆکی جڤاتی گشتی.

مادەی پانزەیەم: هەڵبژاردنەوەی رێکخەری گشتی
لە کاتی چۆڵبونی جێگەی رێکخەری گشتی بزوتنەوەکەدا، لە سۆنگەی وازهێنانی یان هەر هۆیەکی ترەوە، بۆ پڕکردنەوەی شوێنەکەی، یەکێ لە ئەندامانی جڤاتی نیشتمانی یا یەکێ لە ئەندامانی جڤاتی گشتی یان کەسایەتیەکی دیاری بزوتنەوەی گۆڕان لە دەرەوەی هەردو جڤات، بە دەنگدانی نهێنی و راستەوخۆ و بە زۆرایەتی رەها هەڵدەبژێرن. ئەگەر لە جاری یەکەمی هەڵبژاردندا دەنگی پێویستی نەهێنابو، بۆ جاری دوەم هەڵبژاردن بۆ یەکەمین و دوەمین کەس، کە زۆرترین دەنگیان هێناوە، دوبارە دەکرێتەوە، ئەوسا دەنگی زۆرایەتی سادە بەسە بۆ هەڵبژاردنی.

بەشی دەیەم: کۆنفرانسی پارێزگاکان

مادەی یەکەم: کۆنفرانسی پارێزگاکان
١–١: دوساڵ جارێک دەبەسترێت.
١–٢: هەر پارێزگایەک بەجیا کۆنفرانس دەبەستێت.
١–٣: شێوازی بەشداری کردن، بە رێنمایەکی تایبەت، لە لایەن جڤاتی نیشتمانیەوە دەردەچێت.


مادەی دوەم: ئەرکەکانی
٢–١: پێداچونەوە بە کاری رێکخراوەیی، سیاسی، کۆمەڵایەتی و هتد.
٢–٢: هەڵسەنگاندنی ئەدای فراکسیۆنەکان و حکومەت.
٢–٣: خستنەڕوی هەر سەرنج و پێشنیازێک بۆ داهاتوی بزوتنەوەکە، لە بوارە جیاجیاکاندا.

بەشی یانزەیەم : کۆنفرانسی نیشتمانی

مادەی یەکەم: جۆری بەستنی کۆنفرانس
کۆنفرانسی نیشتمانیی بزوتنەوەی گۆڕان لە ئەنجامی کۆبونەوەی نوێنەرانی هەڵبژێردراوی بنکە رێکخراوەیی و دامەزراوەکانیدا دەبەسترێ و به‌رزترین ده‌سه‌ڵاتی بزوتنه‌وه‌کەیه‌.

مادەی دوەم: کاتەکانی به‌ستنی کۆنفرانس
یەکەم، له‌ هه‌لومه‌رجی ئاسایی دا، کۆنفرانسی نیشتمانی ده‌بێ بەر لە هەڵبژاردنی گشتی بە ماوەیەک ببەسترێ.
دوەم، له‌ هه‌لومه‌رجی نائاسایی یان لە کاتی پێویستدا، له‌ سه‌ر داوای دوسێیه‌کی ئه‌ندامانی جڤاتی نیشتمانی یا نیوه‌ی ئەنجومەنی قەزاکان، ده‌به‌سترێ.
سێیەم، لە کاتی ئاسایدا، کۆنفرانس چوار ساڵ جارێک دەبەسرێت.

مادەی سێیەم: ئەرکەکانی کۆنفرانس
یەکەم، دانانی به‌رنامه‌ی سیاسی بزوتنەوەی گۆڕان لە بوارە جیاجیاکاندا.
دوەم، پێداچونەوەی دەستوری ناوخۆی بزوتنه‌وه‌ی گۆڕان.
سێیەم، گۆڕینی دروشمی بزوتنه‌وه‌ یا لۆگۆکه‌ی به‌ پێی گۆڕانی هه‌لومه‌رجی گشتی، ئه‌گه‌ر پێویستی کرد.
چوارەم، په‌سه‌ندن و ده‌سکاری پلاتفۆرمه‌کانی هه‌ڵبژاردنه‌کانی پارێزگا، هه‌رێم و عێراقی فیدڕاڵ.
پێنجەم، هه‌ڵسه‌نگاندنی ئه‌دائی نوێنه‌ره‌کانی له‌ ده‌زگا هه‌ڵبژێردراوه‌کانی پارێزگا، هه‌رێم وعێراقی فیدڕاڵدا.
شەشەم، هه‌ڵسه‌نگاندنی ئه‌دائی جڤاتی نیشتمانی.
مادەی چواره‌م: پێکهاته‌ی کۆنفرانس
یەکەم، ئەندامانی جڤاتی نیشتمانی و جڤاتی گشتی.
دوەم، نوێنەرانی هەڵبژێردراوی شار و قەزا و ناحیەکانی کوردستان.
سێیەم، نوێنەرانی هەڵبژێردراوی رەوەندی کوردی.
چوارەم، فراکسیۆنەکانی گۆڕان له‌ ئه‌نجومه‌نی نوێنه‌رانی عێراقی فیدڕاڵ، پەرلەمانی کوردستان و ئەنجومەنی پارێزگاکان.
پێنجەم، نوێنەرانی ژورەکان.
شەشەم، نوێنەرانی پشتیوان.

مادەی پێنجه‌م: سیستەمی هەڵبژاردنی نوێنەرایەتی کۆنفرانس
یەکەم، نوێنەرایەتی قەزاکان
١–١: هەر قەزایەك بە گوێرەی رێژەی دەنگە بەدەستهاتووەكانی گۆڕان لەو قەزایەدا لە چاو کۆی دەنگی گۆڕان لە دوایین هەڵبژاردنی گشتی دا، ئەندامی كۆنگرەی بۆ تەرخان دەكرێت.
١–٢: لە هەر بازنەیەکی هەڵبژاردندا دەنگ بۆ یەک نوێنەر دەدرێ.
١–٣: بۆ هەڵبژاردنی کاندیدەکان سەرەتای زۆرینەی سادە پێڕەودەکرێ.
١–٤: باژێڕوانەكانی قەزاكان و ئەندامانی تەواوکاری جڤاتی نیشتمانی، راستەوخۆ دەبنە ئەندامی كۆنگرە و ئەوەندەی ئەو ژمارەیە لە بەشی قەزاكە دادەشكێندرێت.
١–٥: لە هەر قەزایەكدا، كۆتای ٢٥% ی نوێنەرانی کۆنفرانسی نیشتیمانی بۆ رەگەزی مێیینە دادەنرێت. ئەگەر ژمارەی پێویست لە ئافرەت خۆی كاندید نەکردبو، ئەوا بەپێی ریزبەندی دەنگەكان، پیاوێك جێگەی دەگرێتەوە.
دوەم، نوێنەرایەتی ژورەکان
٢–١: رێكخەری ژورەكان راستەوخۆ دەبنە ئەندامی کۆنفرانس.
٢–٢: هەر ژورێک به‌ گوێره‌ی تایبه‌تمه‌ندی و سروشتی کاره‌که‌ی ژمارەی نوێنه‌ری بۆ دیاری ده‌کرێت، کە بە سازان لە ناو خۆیاندا یان بە هەڵبژاردن دەبنە ئەندامی کۆنفرانسی نیشتیمانی.
٢–٣: هەمو ئەندامێكی ژور ئازادە لە هەر بازنەیەكی هەڵبژاردندا خۆی بۆ ئەندامێتی کۆنفرانس كاندیدبكات.
سێیەم، نوێنەرایەتی رەوەندی کوردی
نوێنەرایەتی رەوەندی کوردی بە رێنماییەکی تایبەت لە لایەن جڤاتی نیشتیمانیەوە رێکدەخرێ.

چوارەم، نوێنەرایەتی پشتیوان
٤–١: تێکۆشەری دێرین کە ساڵانی تەمەنی بەشداری خەباتی رزگاری گەلی کوردستانی کردوە و ئێستا هەڵسوڕاو یا پشتیوانی بزوتنەوەی گۆڕانە، یان لە چالاکیەکانی گۆڕاندا رۆڵی دیاری هەبوە.
٤–٢: شارەزا لە بوارەكانی سیاسی، حکومی، رێكخراوەیی، یاسایی، كۆمەڵایەتی و هتد.
٤–٣: رێژەی نوێنەرایەتی پشتیوان لە کۆنفرانسدا نابێ لە رێژەی ١٠% ی ئەندامانی هەڵبژێردراو زیاتر بێ.

مادەی شەشەم: ئامادەکاری بۆ بەستنی کۆنفرانس
یەکەم، رێکخستنی تۆماری دەنگدەران
١–١: رێکخستنی تۆماری دەنگدەران ئەرکی ژوری پەیجوریە، بە هەماهەنگی ژوری هەڵبژاردن.
١–٢: تەنیا ئەو ئەندام و هەڵسوڕاوانەی ناویان لە تۆماری دەنگدەراندا نوسراوە، لە پڕۆسەی هەڵبژاردنی نوێنەرانی کۆنفرانسدا مافی دەنگدانیان هەیە.
دوەم، ئەو هەڵسوڕاوانەی لەم قۆناغەی هەڵبژاردندا ناویان لە تۆماری دەنگدەراندا دەنوسرێ بریتین لە:
٢¬–١: ئەندامانی دەستەی بەڕێوەبەری ئەنجومەنی قەزاکان.
٢–٢: بازنەوانەکان، ئەندامانی ئەنجومەنی بازنە، بنکەوانەکان و وێستگەوانەکان.
٢–٣: رێکخەر و ئەندامانی رایەڵە بە گشتی.

مادەی حەوتەم: خۆکاندیدکردن بۆ ئەندامەتی کۆنفرانسی نیشتیمانی
یەکەم، هەر هەڵسوڕاوێکی بزوتنەوەی گۆڕان لە هەر ئاستێکی رێکخراوەیی دا بێ، گەر مەرجەکانی تێدابێ، بۆی هەیە لە بازنەیەکی هەڵبژاردندا خۆی بۆ ئەندامەتی کۆنفرانسی نیشتیمانی کاندیدبکا.
دوەم، هەر هەڵسوڕاوێ ویستی خۆی کاندیدبکا،دەبێت فۆرمی تایبەت پڕبکاتەوە و پێشکەشی ژوری هەڵبژاردنی بکا.
سێیەم، پاش لێکۆڵینەوە لە هەبونی مەرجەکانی خۆکاندیدکردن ناوەکانیان ئەڕاستێنرێ.

مادەی هەشتەم: سەرپەرشتی هەڵبژاردن
یەکەم، رێکخستنی پڕۆسەی هەڵبژاردن ئەرکی ژوری هەڵبژاردنە.
دوەم، هەڵبژاردن، لە سەرەتای دەسپێکردنەوە تا دەرچونی ئەنجامەکانی، لە لایەن لیژنەیەکی ٣ کەسیەوە ئەنجام دەدرێ کە پێکدێ لە:
٢–١: پارێزەرێکی ئەندامی سەندیکای پارێزەران، سەرۆک.
٢–٢: کارمەندێکی رێکخراوێکی کۆمەڵگای شارستانی، ئەندام.
٢–٣: نوێنەرێکی ژوری هەڵبژاردنی بزوتنەوەی گۆڕان، ئەندام.
سێیەم، هیچ کام لەو ٣ کەسەی سەرپەرشتی پڕۆسەی هەڵبژاردن دەکەن بۆیان نیە خۆیان کاندید بکەن یان بە قازانجی هیچ کاندیدێ پڕۆپاگاندە بکەن.
چوارەم، نوێنەرانی کۆنفرانسی نیشتیمانی لە لایەن هەڵسوڕاوانی بزوتنەوەی گۆڕانەوە لە سنوری قەزاکەدا هەڵدەبژێردرێن.
پێنجەم، بۆ ئەوەی رێگە بە دەنگدەر بدرێ لە پڕۆسەی دەنگداندا بەشداری بکا، دەبێت لە کاتی هەڵبژاردندا "ناسنامەی باوەڕپێکراوی کەسی" پیشانبدا.
شەشەم، هەڵبژاردن بە دەنگدانی نهێنی و راستەوخۆ، لە یەک رۆژدا لە کاتژمێر ٨ ی بەیانیەوە تا کاتژمێر ٦ ی ئێوارە، ئەنجام دەدرێ. هه‌مان شه‌و به‌ ئاشکرا له‌ به‌ر چاوی کاندیدەکان جیاده‌کرێته‌وه‌ و ئه‌ژمار ده‌کرێ.
حەوتەم، بردنه‌وه‌ به‌ زۆرایه‌تی ساده‌ی ژماره‌ی ده‌نگه‌کان ده‌بێ.
هەشتەم، کاندیدی براوه‌ باجی به‌شداری کۆنفرانسی ده‌درێتێ.

مادەی نۆیەم: پوچەڵکردنی دەنگ
هیچ دەنگدەرێ بۆی نیە، لە پڕۆسەی هەڵبژاردنی ئەندامانی کۆنفرانسی نیشتیمانیدا، لە یەک جار زیاتر دەنگبدا. بەپێچەوانەوە دەنگەکەی پوچەڵ دەکرێتەوە و لێپرسینەوەی لەگەڵدا دەکرێت.

مادەی دەیەم: دیاریکردنی کاتەکان
ژوری هەڵبژاردن کاتەکانی پڕۆسەی هەڵبژاردن دیاری دەکا و هەریەکەیان لە کاتی خۆی دا رادەگەیەنێ، بەم شێوەیە:
یەکەم، دیاریکردنی ماوەی خۆکاندیدکردن بۆ ئەندامەتی کۆنفرانسی نیشتیمانی.
دوەم، دیاریکردنی ماوەی راستاندنی کاندیدەکان.
سێیەم، دیاریکردنی رۆژ و شوێنی ده‌نگدان بۆ هەڵبژاردنی ئەندامانی کۆنفرانسی نیشتیمانی.
چوارەم، دیاریکردنی رۆژی به‌ستنی کۆنفرانس.   

مادەی یانزەیەم: کاروباری لۆجستی
کاروباری لۆجستی کۆنفرانسی نیشتیمانی ئەرکی ژوری کارگێڕی و داراییە، کە بریتیە لە:
یەکەم، دابینکردنی بودجەی پڕۆسەی بەستنی کۆنفرانسی نیشتیمانی.
دوەم، ئامادەکردنی بنکەکانی دەنگدان بۆ هەڵبژاردنی ئەندامانی کۆنفرانسی نیشتیمانی.
سێیەم، ئاماده‌کردنی شوێنی به‌ستنی کۆنفرانس.

مادەی دوانزەیەم: کاروباری میدیایی
کاری میدیایی پڕۆسەی بەستنی کۆنفرانسی نیشتیمانی بە دەستەیەکی تایبەتی دەسپێردرێ بۆ بەجێهێنانی:
یەکەم، رەخساندنی هەلی یەکسان بۆ هەمو کاندیدەکان بۆ خۆناساندن بە هەڵسوڕاوانی گۆڕان، لە سایتی فەرمی و لە دەزگاکانی راگەیاندنی بزوتنەوەی گۆڕاندا،
دوەم، چاپکردن و گه‌یاندنی پڕۆژه‌ی به‌رنامه‌کانی بزوتنه‌وه‌ و دەستوری ناوخۆی بزوتنه‌وه‌که‌، پێش به‌ستنی کۆنفرانس، به‌ ئه‌ندامانی هه‌مو ئاسته‌کانی په‌یکه‌ره‌ی رێکخراوه‌یی بزوتنه‌وه‌که‌.
سێیەم، روماڵکردنی قۆناغەکانی پڕۆسەی ئەنجامدانی کۆنفرانسی نیشتیمانی.

مادەی سیانزەیەم: داوا و سکاڵا و تانە
یەکەم، ئەگەر هەڵسوڕاوێک، کە پێشتر ناوی لە بەر هەر هۆیەک لە تۆماری دەنگدەراندا نەنوسرابو، ویستی بەشداری پرۆسەکە بێ چ بۆ خۆکاندیدکردن یا بۆ دەنگدان، بۆی هەیە داواکەی بەنوسراو بباتە لای ژوری یاسایی.
دوەم، داوا و سکاڵاو تانەلێدان لە سەرجەم پڕۆسەی هەڵبژاردنەکە، لە کردنەوەی دەرگای خۆکاندیدکردنەوە تا راگەیاندنی ئەنجامی هەڵبژاردنەکان، بە نوسراو تۆماردەکرێ و دەدرێتە ژوری یاسایی.
سێیەم، ژوری یاسایی، بە راوێژ لەگەڵ ژوری پەیجوری و ژوری هەڵبژاردندا، دوا بڕیار لە سەر داوا و سکاڵا و تانەکان دەدا.
چوارەم، بەر لە هەفتەیەک لە ئەنجامدانی هەڵبژاردن، تۆماری دەنگدەران ئاشکرا دەکرێت.

مادەی چواردەیەم: ئەنجامدان و قۆناغەکانی بەستنی کۆنفرانس

یەکەم، دەستپێکردنی کۆنفرانس
١–١: کۆنفرانس له‌ لایه‌ن ئەو لیژنه‌ی ئاماده‌کاریه‌وه‌، کە لە لایەن جڤاتی نیشتیمانیەوە پێکدەهێنرێت،‌ ده‌کرێته‌وه.
١–٢: جڤاتی نیشتمانی راپۆرتی کاره‌کانی ده‌خوێنێته‌وه‌.
١–٣: کۆنفرانس پێنج کەس بۆ ده‌سته‌ی سه‌رۆکایه‌تی هەڵدەبژێرێ.
١–٤: دەستەی سەرۆکایەتی کاروبارەکانی کۆنفرانسی نیشتیمانی لە سەرەتاوە تا کۆتایی بەڕێوەدەبا.
دوەم، دابەشکردنی لیژنەکان
٢–١: ئه‌ندامانی کۆنفرانس دابه‌ش ده‌بن به‌سه‌ر چه‌ند لیژنه‌یه‌کدا.
٢–٢: هەر لیژنەیەک کار لە سەر راپۆرتی یەکێ لە دامەزراوەکان دەکا.
٢–٣: هەر لیژنەیەک هەڵسەنگاندن و بڕیار و راسپاردەکانی خۆی بۆ دانیشتنەکانی کۆتایی ئامادەدەکا.
سێیەم، دانیشتنەکانی کۆتایی
٣–١: بۆ پەسەندکردنی دوا داڕشتەی بەرنامە و دەستوری ناوخۆ.
٣–٢: بۆ پەسەندکردنی بڕیار و راسپاردەکانی کۆنفرانس.
چوارەم، راگەیاندنی کۆتایی کۆنفرانس.

دەستوری ناوخۆی بزوتنەوەی گۆڕان پەسەندکراوی کۆنگرەی یەکەم به‌ PDF
26/03/2014
زیاتر...
هیچ بابەتێک به‌رده‌ست نیه‌ .