Print WWW.GORRAN.NET
 ''پاشەكەوت'' لاببرێت .. باشكردنی بژێوی خەڵك لای گۆڕان ئەولەوییەتە
8/12/2017 10:35:12 PM
ژمارەیەك لە ئەندامانی جڤاتی نیشتیمانی و جڤاتى گشتى بزوتنەوەی گۆڕان و هەڵسوڕاوان جەختدەكەنەوە لەسەر ئەوەی كە باشكردنی ژیانی خەڵك و موچەی فەرمانبەران كاری لە پێشینەی بزوتنەوەكەیە‌ و پێیانوایە؛ دەبێت دۆخی پەرلەمان ئاسایی بكرێتەوە‌ و لەوێشەوە بریار لەسەر بڕیارە چارەنوسسازەكان بدرێت.

هەریەکە لە حاجی رێكانی و عەبدولقادر جیهان ئەندامانی جڤاتی نیشتمانی بزوتنەوەی گۆڕان بە (تۆڕى میدیاى گۆڕان) رادەگەیەنن لە کۆبونەوەى جڤاتى نیشتمانیدا جەختدەكەنەوە لەسەر ئەوەی كە باشكردنی ژیانی خەڵك و موچەی فەرمانبەران ئەولەویەتە.

هەروەک بەپێویستى دەزانن؛ دۆخی پەرلەمان ئاسایی بكرێتەوە‌ و لە پەرلەمانەوە بڕیار لەسەر پرسە چارەنوسسازەكان بدرێت.

لاى خۆیەوە؛ عەبدولڕەحمان عەبدوڵا، ئەندامی جڤاتی گشتی بزوتنەوەی گۆڕان بە (تۆڕى میدیاى گۆڕان)ى وت: "دەبێت پەرلەمانی كوردستان لە دوای ئاساییكردنەوە، لە كوێدا پەكی كەوتوە لەوێدا دەست بەكارەكانی بكاتەوە و کاربکات بۆ گۆڕینی سیستمی حكومڕانی لە سەرۆكایەتییەوە بۆ پەرلەمانی".

وتیشى:"دەبێت ئەو سیستمی پاشەكەوتی موچەیەی بەسەر خەڵكی كوردستاندا سەپێندراوە لاببرێت ‌و فەرمانبەران لەكات ‌و ساتی خۆیدا موچە وەربگرن".


لاى خۆیەوە فاخر محەمەد، بەرپرسی پەیوەندییەكانی ئەنجومەنی بزوتنەوەی گۆڕان لە هەولێر، دەڵێت:"وەك بزوتنەوەی گۆڕان پێداگری دەكەین لەسەر ئەوەی پەرلەمان دوای ئاساییكردنەوەی بڕیارێك لەسەر پاشەكەوتی موچە دەربكات ‌و رێوشوێنەكانی پێدانەوەی بە فەرمانبەران دیاری بكات".

جەختیكردەوە، دەبێت پەرلەمان لەو شوێنەی یەكخراوە دەست بە كارەكانی بكاتەوە‌ و یاسای سەرۆكایەتی هەرێم هەموار بكاتەوە و پرسى ریفراندۆمیش لە پەرلەمانەوە بڕیارى لەبارەوە بدرێت، "بەوپێیەى پەرلەمان هەڵبژێردراوی خەڵكە‌ و دەبێت لەوێوە بڕیارەكان دەربچن".