Print WWW.GORRAN.NET
  بەرنامەی لیستی گۆڕان بۆ ئەنجومەنی نوێنەرانی عێراق ٢٠١٨
4/15/2018 4:57:53 PM













گۆڕان ئیرادەیەکی بەردەوامە

                                                                 ١٤٢

                                 بەرنامەی لیستی گۆڕان بۆ ئەنجومەنی نوێنەرانی عێراق ٢٠١٨

                                 "دەستور و هاوڵاتیبونی یەکسان زامنن بۆ پێکەوە ژیان"



تەوەری یەكەم: ئامانجە نیشتیمانییەکان
پتەوكردنی پرەنسیپەكانی سیستمی فیدراڵی، لەسەر بنچینەی (دەوڵەتی هاوڵاتی، دەوڵەتی یاسا، شەراكەتی راستەقینە)، لەنێوان سەرجەم پێكهاتەكان، بەگوێرەی دەستوری هەمیشەیی عێراق.
جێبەجێکردن و چەسپاندنی پرەنسیپی جیاكردنەوەی دەسەڵاتەكانی (یاسادانان و جێبەجێكردن و دادوەری)، بە شێوازێکی تەندروست.
هە‌ڵبژاردنی كاندیدی پسپۆڕ و سەربەخۆ )تەكنۆكرات(، بۆ دەستە سەربەخۆكان و پۆستەكانی دەسەڵاتی دادوەری.
بەدامەزراوەیکردنی دامودەزگاکانی دەوڵەت و حکومەت و بنبڕکردنی هەژمون و دەستی حیزب لە دامەزراوەکاندا، لەڕێگای بەمەدەنیكردنی رۆڵ و چالاكییەكانی حیزب لە ململانێی سیاسیدا.
پشتگیریكردنی رێكخراوەكانی كۆمەڵی مەدەنی و راگەیاندنی ئازاد و پاراستنی سەربەخۆییان، لەپێناو خزمەتكردنی بەرژەوەندییە مەدەنی و پیشەییەكانی سەرجەم توێژەكانی كۆمەڵگا.
دامەزراندنی ئەنجومەنی فیدراڵی، بەپێی مادەی (٦٥)ی دەستورو بنەماو پێوەرە كارپێكراوەكانی وڵاتە فیدراڵییە پێشكەوتوەكانی جیهان، هەروەها زامنی ئەوە بکرێت نوێنەرانی هەرێم لە ئەنجومەنەكەدا مافی ڤیتۆكردنی ئەو یاسایانەیان هەبێت، كە پەیوەندییان بە هەرێمی کوردستانەوە هەیە.
چەسپاندنی تەوافوق و هاوسەنگی و شەراکەتی راستەقینە لەنێوان پێکهاتە جیاوازەکانی عێراق، لە دامەزراوەکانی دەوڵەت و حکومەتدا.

تەوەری دوەم: چاكسازی لە دامەزراوە فیدراڵی و لامەركەزییەكاندا
رێکخستنەوەی دامەزراوەكانی دەوڵەتی فیدراڵی، بەگوێرەی مادەی (١٠٥)ی دەستوری هەمیشەیی عێراق، بەبێ رەچاوکردنی جیاوازیی نەتەوەیی و مەزهەبی و بەشبەشێنەی حیزبی.
بەهێزكردنی بنەمای لامەركەزی ئیداری، لەپێناو فراوانكردنی دەسەڵاتە ئیداری و داراییەكانی یەكە كارگێرییەكان و كاراكردنی توانای جێبەجێكردنی پرۆژە خزمەتگوزارییەکان و گەشەپێدان لە یەكە ئیدارییەكاندا.
دەستەبەرکردنی مافی دانیشتوانی ئەوپارێزگایانەی لە هەرێمێکدا ڕێکنەخراون، بەگوێرەی مادەی (١١٧) و (١١٨)ی دەستوری هەمیشەیی عێراق.

تەوەری سێهەم: پەیوەندیی نێوان هەرێمی كوردستان و حكومەتی فیدراڵ
گرتنەبەری رێگەی دەستوری و یاسایی بۆ چارەسەركردنی پرس و كێشە هەڵپەسێراوەكانی نێوان هەرێمی كوردستان و بەغدا، بۆ بەدیهێنانی هاوسەنگی و شەراکەتی راستەقینە لەسەرجەم بوارەکاندا.
جەختکردنەوە لە بەشداریی هەرێمی كوردستان، لە داڕشتنی سیاسەتی دەرەوەی عێراق و كردنەوەی نوێنەرایەتی هەرێمی كوردستان لە باڵیۆزخانەو كونسوڵگەرییەكاندا، بە گوێرەی بڕگەی ٤ لە مادەی (١٢١)ی دەستوری هەمیشەیی عێراق.
کاراکردنی مادەی (١٤) ی دەستوری هەمیشەیی عێراق و یاسای زمانە فەرمییەکان، سەبارەت بە؛ زمانی كوردی زمانەکانی تر، وەكو زمانێكی فەرمی لەسەر ئاستی عێراق لە دامەزراوە فیدراڵییەكاندا.
بە پیشەییكردن و بە یاساییكردنی ئەركی دانوستان و چاودێریكردنی ئەدای نوێنەرانی گەلی كوردستان لەناو دەسەڵاتە جیاوازەكانی حكومەتی فیدراڵ و وەزارەت و دامەزراوە و دەستە سەربەخۆكانی عێراق. لەڕێگەی دامەزراندنی دەستەیەكی نیشتمانییەوە، لە پەرلەمان هەڵبژێردرێ و لە‌بەردەم پەرلەمانیشدا بەرپرسیاربێ.
بەدۆكیۆمێنتكردن و ئەرشیفكردنی دانوستانەکانی نێوان نوێنەرانی گەلی كوردستان و نوێنەرانی حكومەتە یەك لەدوا یەكەكانی عێراق، لەمێژوی دور و نزیك. بەو دانوستانانەش لەگەڵ نوێنەری حیزبەکاندا ئەنجامدراون.

تەوەری چوارەم: چارەسەركردنی كێشەی ناوچە دابڕێندراوەكان
سەرباری بڕوابونی بزوتنەوەی گۆڕان بە کوردستانی بونی ناوچە دابڕێندراوەکان، پێداگری لەسەر گێڕانەوەیان بۆ سەر هەرێمی کوردستان دەکات، لە ڕێگای:
پێداگری لەسەر ئەنجامدانی سەرژمێریی دانیشتوان، لە پارێزگای كەركوك و ناوچە دابڕێندراوەكان.بەئامانجی زەمینەسازی بۆ گەڕاندنەوەیان بۆسەر هەرێمی كوردستان، لە ماوەیەكی دیاریكراودا.
پێداگریكردن لەسەر دیاریكردنی سنوری جوگرافی هەرێمی كوردستان و چارەسەركردنی كێشەی ناوچە دابڕێندراوەكان، بەپێی ستراتیژییەكی نیشتیمانی و بەپشتبەستن بە مادەی (١٤٠)ی دەستورو بەڵگەنامەو راستییە مێژویی و جوگرافییەكان،‌ كە پەیوەندییان هەیە بە ناوچەكانی، كەركوك، موسڵ، سەڵاحەدین، دیالە و واست.
بەڕێوەبردنی ناوچە دابڕێندراوەكان، بەهاوبەشی لەنێوان هەرێم و حکومەتی فیدراڵدا. تا یەکلاکردنەوەی چارەنوسی ئەو ناوچانە بەپێی رێکارە دەستورییەکان.
دروستكردنی متمانە لە نێوان پێکهاتە ئاینی و نەتەوەییەکانی عێراق، لەسەر بنەمای شەراكەت و پێكەوەژیان و ئەزمونی مێژویی هاوبەش و زامنكردنی مافە دەستورییەكانیان.
كاركردن بۆ هەڵگرتنی ستەمی نەتەوەیی و ئاینی لەسەر هاونیشتمانییانی فەیلی و ئێزدی و شەبەك و سابئەكان. بژاردنەوەی زەرەر و زیانەكانیان و پەرەپێدانی ناوچە بنەڕەتییەکانی نیشتەجێبونیان، لە ڕوی ئابوری و كۆمەڵایەتی و رۆشنبیرییەوە.
چارەسەری كێشە هەڵپەسێردراوە پەیوەندیدارەكان، بە راگواستنی زۆرەملێ‌ (راگوازراو و كۆچپێكراو و هاوردەكان) و ناكۆكیی موڵكایەتی، كە لە ناوچە دابڕێندراوەكاندا هەیە.
كاراكردنی دادگای ناکۆکی خاوەنداری بۆ هەڵوەشاندنەوەی سەرجەم ئەو یاساو بڕیارو مەرسومانەی رژێمی پێشو، بۆ گۆڕانكاری لە سنوری ئیداری ناوچە دابڕێندراوەكاندا دەریكردون.


تەوەری پێنجەم: چاكسازی لە هێزی پێشمەرگە و سوپای عێراق و دەزگا ئەمنییەکاندا
رێكخستن و سەربەخۆکردن و بەپیشەییکردن و بەدامەزراوەییکردنی هێزەکانی پێشمەرگەی کوردستان و چەكداركردن و مەشقپێكردنیان بە شێوەیەكی سەردەمیانە. هەروەها یەكخستنیان لە چوارچێوەی هێزی پاسەوانی هەرێم و هێزی پاسەوانی سنورو بەرزكردنەوەی ئاستی گوزەرانی مونتەسیبەكانی بۆ ئاستی مونتەسیبەكانی سوپای نیزامیی عێراق، وەك بەشێك لە سیستمی بەرگریی دەوڵەتی فیدراڵ.
بەدامەزراوەییكردنی هێزە ئەمنییە هەرێمی و فیدراڵییەكان، وەك هێزێكی بێلایەن و پیشەیی، بەشێوەیەك، كە وەلائیان بۆ نیشتمان بێت و رێگەنەدرێت دەست وەربدەن لە كاروبار و ململانێ سیاسییە ناوخۆییەكانی نێوان هەرێم و حكومەتی فیدراڵ.
داکۆکیکردن لە پشکی بەشداری هاوڵاتیانی کوردستان، لە سوپای عێراق و وەزارەتی بەرگری و دامەزراوە فیدراڵییە ئەمنییەكان لەپێناو بەدیهێنانی مادەی (9)ی دەستوری هەمیشەیی عێراق.
پێداچونەوە بە گرێبەستەكانی كڕینی چەك و تەقەمەنی و پێداویستییە سەربازییەکان و لێکۆڵینەوە لە هاوکارییە سەربازییەکانی وڵاتان، بەشێوەیەكی رون (شفاف).

تەوەرەی شەشەم: چارەسەركردنی دۆزی سامانی سروشتی
دروستکردنی دامەزراوەی گشتیی چاودێریی داهاتی فیدراڵ و دەستەی راژەی فیدراڵ، بۆ بەرگریكردن لە بەركەوتەی دارایی ‌و كارگێڕیی خەڵكی كوردستان، وەك لە مادەکانی (١٠٥) و (١٠٦) و (١٠٧)ی دەستوری هەمیشەیی ‌عێراقدا هاتوە.
چارەسەركردنی كێشە پەیوەندیدارەكان بە نەوت و غاز و سامانە سروشتییەکانی دیکە، لەڕێگەی دانانی یاسایەكەوە، كە بنەما دەستورییەكان لەخۆ بگرێت و مافی هەرێم و پارێزگاکان لە بەڕێوەبردنی دۆسیەی نەوت و غاز و سامانە سروشتییەکانی تیادا پارێزراو بێت. وەک لە مادەکانی (١١١) و (١١٢)ی دەستوری هەمیشەیی عێراقدا هاتوە.
سوربون لەسەر بەشداربونی هەرێم و پارێزگا بەرهەمهێنەكان لە داڕشتنی سیاسەتى نەوتی عێراق.
گرێبەستەكانی نەوت و غاز، كە لەلایەن حكومەتی فیدراڵ و هەرێمەوە ئەنجامدەدرێن، بخرێنە ژێر چاودێریی پەرلەمانەوە .
چەسپاندنی شایستەی پترۆدۆلار، بۆ ئەو پارێزگایانەی نەوت و غاز و پاڵاوگەیان هەیە، رەنگدانەوەی لە یاسای بودجەی ساڵانەی عێراقدا.
فرۆشتنی نەوتی هەرێمی کوردستان لە رێگەی کۆمپانیای (سۆمۆ) و دانانی نوێنەری هەمیشەی هەرێم لەو کۆمپانیایەدا.
دابینکردنی موچە و پێداویستییە داراییەکانی هەرێمی کوردستان و پێداویستیی کۆمپانیاکانی بەرهەمهێنانی نەوت.
بەرهەمهێنان لە غازی سروشتی، بەمەبەستی چارەسەرکردنی کێشەی کارەباو پرۆژە پترۆکیمیاییەکان.
پەیڕەوكردنی پرەنسیپی رۆشنی (شەفافییەت) لە مامەڵەكردن لەگەڵ داهات و بودجەی گشتی فیدراڵی و حكومەتی هەرێم، لەبواری: وردەكاریەكانی بودجە و سەرچاوەكانی و چۆنێتی خەرجكردن و دابەشكردنی بەسەر كەرتە ئابورییەكانی هەرێم و پارێزگاكاندا.
نەبەستنەوەی بودجەى عێراق بەکێشە سیاسییەكانەوە، لەكاتی بونی ناكۆكی لەنێوان حكومەتی فیدراڵ و حكومەتی هەرێمدا، پەنا ببرێتە بەر دادگا، نەک بڕینی بودجەو قوتی هاوڵاتیان.
زامنكردنی پشكی هەرێم و پارێزگاکان، لە پەرەپێدان بە كەرتەكانی ئابوری، كارگێڕی گشتی، وەبەرهێنان، تەكنەلۆژیای زانیاری، كشتوكاڵ، پیشەسازی، سامانی ئاژەڵ، گەشتوگوزار وسەرچاوەكانی وزە، بە گوێرەی مادەی (١٠٦)ی دەستوری هەمیشەیی عێراق.
زامنكردنی پشكی هەرێم و پارێزگاکان، لە پرۆژە ستراتیژییە فیدراڵییەكانی كەرتی گواستنەوە و گەیاندن.
ڕێکخستنی سەرچاوەکانی ئاو و دابەشکردنی بەشێوەیەکی دادپەروەرانە. لەگەڵ پەرەپێدان بە پرۆژەی فراوانکردنی بەنداوی بچوک و گەورە.
بایەخدان بە بڵاوکردنەوەی هۆشیاریی گشتی، بۆ رێگرتن لە خراپ بەکارهێنانی ئاو لە ماڵ و لە بەرهەمهێنانی بەروبومی کشتوکاڵ و پیشەسازیدا.

تەوەری حەوتەم: دادی كۆمەڵایەتی و پەرەپێدانی سامانی مرۆیی
پێكهێنانی دەستەیەكی گشتی، بۆ زامنكردنی مافی هەرێم لە بەشداریكردنی دادپەروەرانە، لە بەڕێوەبردنی دامەزراوە فیدراڵییەكان، زەمالەی خوێندن، شاندەكان، كۆنگرە هەرێمی و نێودەوڵەتیەكان، لە ماوەیەكی دیاریكراو و بەپێی یاسایەكی تایبەت، هەروەك لەمادەی (١٠٥)ی دەستوری هەمیشەیی عێراقدا هاتوە.
جێگیركردنی سیستمێكی عادیلانە، بۆ بیمەی تەندروستی و كۆمەڵایەتی، خانەنشینی فەرمانبەران و هاوڵاتیانی بەرهەمهێن، لە هەردو كەرتی تایبەتی و گشتی، هەروەها بۆ قوربانییانی زیندوی جەنگەكان و قەیرانە سیاسی و كۆمەڵایەتی و ئابوری و تەندروستییەكان.
نەهێشتنی هەژاری و قەیرانی بێكاری، بە دۆزینەوەی هەلی كار بۆ هاوڵاتیان و ئەنجامدانی پرۆژەی گەورەی بوژاندنەوە و پەرەپێدان و تەرخانكردنی پارەی پێویست بۆیان لە بودجەی فیدراڵیدا.
قەرەبوكردنەوەی زیانلێكەوتوانی ئەنفال و كیمیاییباران و قوربانیانی دەستی رژێمی پێشو و ئاوەدانكردنەوەی ئەو ناوچانەی بەر كاولكاری كەوتون و بژاردنەوە و قەرەبوكردنەوەی ئابوری زیانەكانیان و سەرلەنوێ‌ بنیاتنانەوەیان بەشێوەیەكی هاوچەرخانە.
قەرەبوکردنەوەی زیانلێکەوتوان و کەسوکاری شەهیدان و بی سەروشوێنانی شەڕی داعش.
بایەخدان بە توانا‌ و بەهرەی هونەریی ‌و ئەدەبی ‌و رۆشنبیریی گەنجان و كاركردن بە سیستمێكی بانكیی بۆ بەخشینی قەرزی درێژخایەن، بەو گەنجانەی پرۆژەی هەرەوەزیی هاوبەش پێشكەشدەكەن، لە بواری بەرهەمهێنان ‌و داهێناندا.
بایەخدان بە مناڵان و لاوان و ئامادەكردنیان، لە ڕوی هونەری و جەستەییەوە، ئەویش بەهۆی پێشخستنی كەرتەكانی هونەر و وەرزش و دابینكردنی هەلی كاری یەكسان بۆ گەنجان، لە كەرتەكانی تایبەت و گشتی و تێكەڵاودا.
هاوكاریكردنی زیاتری خاوەن پێداویستییە تایبەتەكان و پەككەوتە و بەساڵاچوان و دەربڕینی پشتیوانی مادیی‌ و مەعنەوی ‌و كۆمەڵایەتی بۆیان.
پەرەپێدانی زانكۆكان، دامەزراوە ئەكادیمییەكان، ناوەندەكانی لێكۆڵینەوەو‌ كاركردن بۆ بەرزكردنەوەی ئاستی زانستییان و قەدەغەكردنی دەستوەردانی حیزب لە كاروباریان و زامنكردنی سەربەخۆییان و دابینكردنی بودجەی تەواو بۆیان.
نەهێشتنی هەمو جۆرەكانی توندوتیژیی جەستەیی و دەرونی و جیاكاری دژی مناڵان و ئافرەتان و خاوەن پێداویستییە تایبەتەكان و بەساڵاچوان و پەككەوتەكان و توێژە پەراوێزخراوەكانی تری كۆمەڵ.
فراوانکردنی پانتایی ئازادیی رادەربڕین و ئازادی میدیایی و رێزگرتن لە ڕای جیاواز و پشتیوانیكردنی پرۆژە رۆشنبیری و هونەریەکان و میدیای ئازاد و هەڵگرتنی كۆسپەكانی سەر رێگەیان و پاراستنی شوێنەوارو شوێنە مێژوییەكان و نۆژەنکردنەوەیان.
رەتکردنەوەی گوتاری بوغزاندنی نەتەوەیی، ئیتنی، ئاینی و مەزهەبی.
بایەخدان بە رەوەندی عێراقی لە دەرەوەی وڵات، خۆشكردنی زەمینەی كۆچی پێچەوانەی ئارەزومەندانە‌ بۆیان، بەتایبەتی بۆ زانا و پسپۆڕ و شارەزاكانیان. لەپێناو بەشداریپێكردنیان لە دروستكردنەوەی ژێرخانی ئابوری و زانستی و مرۆیی وڵاتدا.
پاراستنی ژینگەو كاركردن بۆ بڵاوكردنەوەی رۆشنبیریی ژینگەپارێزی، سەبارەت بە مەترسییەكانی پیسبونی ژینگەو شۆرەكات و بە بیابانبون و پاراستنی جەنگەڵەكان و سروشت و فراوانكردنی روبەریسەوزایی و قەدەغەكردنی ژاكاندنیان.
پشتگیریكردنی كۆمەڵی مەدەنی و كاركردن بۆ زامنكردنی سەربەخۆیی سەندیكاو رێكخراو و كۆمەڵەكان، رێكخستنی كارو چالاكییەكانیان لە رێگەی دەزگایەكی باڵای سەربەخۆوە، كە خزمەتی بەرژەوەندییە مەدەنی و پیشەییەكانی توێژەكانی كۆمەڵ بكات.
رێگرتن لە پێشێلكردنی مافەكانی مرۆڤ و سەرلەنوێ‌ داڕشتنەوەی سیستمی ئەمنی، بەپێی پێوەری پیشەیی و لێهاتویی و دڵسۆزی بۆ نیشتمان و پابەندبون بەپایەكانی دەوڵەتی مەدەنی و سەربەخۆی دەزگا ئەمنییەكان لە ئینتیما بۆ حیزب و كەس و دەستەیەكی دیاریكراو.
بەگژاچونەوەی دیاردەی تیرۆر و توندڕەوی و رەگەزپەرستی و دەمارگیری و قەدەغەكردنی جیاكاری لەنێوان هاوڵاتیان، لەسەر بناغەی نەتەوە، ئایین، مەزهەب، باوەڕ، جێندەر، ئینتیمای حیزبی و پایەی كۆمەڵایەتی، لەرێگای چەسپاندنی مافی بەشداریكردنی سەرجەم پێكهاتە و كەمینەكان لە پرۆسەی سیاسیدا.

تەوەری هەشتەم: چاکسازیی كارگێڕی و ئابوری
چاکسازی لە ئابوری عێراق، لەسەر بنەمای ئابوری سەردەمیانەو فرەییکردنی سەرچاوەکانی داهات.
پەیڕەوكردنی بنەمای رۆشنيی لە مامەڵەكردن لەگەڵ بودجەی گشتی، لەبواری؛ بودجەو سەرچاوەكانی و چۆنێتی خەرجكردنی و دابەشكردنی بەسەر كەرتە ئابورییەكان و ناوچەو هەرێمەكاندا.
رێکخستن و یەکخستنی موچەی فەرمانبەرانو خانەنشینان لەسەر ئاستی عێراق و هەرێم.
پەرەپێدانی ئابوری و بەڕێوەبردنی گشتی، بەدورگرتنیان لە قۆرخکردن و گەندەڵی و هاندانی وەبەرهێنان و تەکنەلۆژیای زانیاری و پێشخستنی كەرتەکانى كشتوكاڵ و پیشەسازی و سامانی ئاژەڵ و گەشتوگوزار.
كاراكردنی رۆڵی (دامەزراوە چاودێرییەکان و تەرخانكردنی داهاتە فیدراڵییەكان) لە پێناو دابینكردنی پشكی هەرێمی كوردستان لە مينحە و قەرزی گشتی و كۆمەك و داهاتە داراییە فیدراڵییەكان و زامنكردنی رۆشنیی و عەدالەت، هەروەك لە دەستوری هەمیشەیی عێراقدا هاتوە.
دانانی بودجەیەکی تایبەتى فیدراڵی، بۆ یارمەتیدانی جوتیاران، بەمەبەستی نیشتەجێكردنەوەیان لە گوندەكان و هاندانیان بۆ بەشداریكردنیان لە بەرزكردنەوەی ئاستی بەرهەمهێنانی بەروبومی كشتوكاڵ، لە پێناو دابینكردنی ئاسایشی خۆراك و بوژاندنەوەی ئابوریی گوندەکان.
بە بازاڕکردنی بەرهەمی کشتوکاڵی و ئاژەڵداری و یەکخستنی بازاڕی عێراق.
نەهێشتنی پاوانخوازی حیزب و بەرپرسەکان، لە بازاڕی کوردستان لە رێگای پێداچونەوە بە کۆمپانیاکانیان .
ئەنجامدانی سەرژمێری گشتی لە سەرانسەری عێراق، لە پێناو دەرکەوتنی رێژەی راستەقینەی دانیشتوان و سەرجەمپێکهاتەکان. بە گوێرەی بڕگەی ٩ لە مادەی (١١٠)ی دەستوری هەمیشەی عێراق.

تەوەرەی نۆیەم: بەگژاچونەوەی گەندەڵی
دامەزراندنی دەستەیەک، بۆ گێڕانەوەی ئەو پارانەی بە نایاسایی براونەتە دەرەوەی هەرێم و عێراق، بە گوێرەی مادەی (١٠٦)ی دەستوری هەمیشەیی عێراق.
بەگژداچونەوەی گەندەڵی و پابەندبون بە بنەمای رۆشن (شەفافییەت)ی داهاتو و بودجەی گشتی و چۆنێتی خەرجكردنی.
كاراتركردن و پشتیوانیکردن لە رۆڵی دەستە و كۆمسیۆنە سەربەخۆكانی وەك؛ دەستەی نەزاهە و دیوانی چاودێریی دارایی.
كاركردن لەسەر بنەماكانی شەفافیەت و لێپرسینەوە، پاداشت و سزا، پەرەپێدانی توانستە كەسیی و ئیداریی و ئابوریی و یاساییەكان لە تەواوی دامودەزگاكانی حكومەتی فیدراڵدا.
كاراتركردنی رۆڵی دەسەڵاتی دادوەری و داواكاری گشتی بۆ دەرخستنی كەموكورتی و لادانە یاساییەكان لە دامودەزگا فیدراڵییەكان و كەرتی تایبەت و پرۆژە خزمەتگوزارییەكان.
جەختکردنەوە لەسەر رۆڵی ئەنجومەنی نوێنەرانی عێراق، لە چاودێریكردن و لێپرسینەوە لە بەرپرسانی حكومەت و بەدواداچون بۆ چۆنێتی خەرجكردن و دابەشكردنی بودجە و پڕۆژە و گرێبەستەكان و جێبەجێکردنی یاساکان.
رێگەنەدان بە داگیرکردن و بەكارهێنانی دامودەزگا حكومییەكان، بۆ بەرژەوەندی كەسی و حیزبی، بنبڕكردنی دەستێوەردانی حیزبی لە كاری ئیداری و حكومیدا.
لێکۆڵینەوە لە هەمو ئەوانەی هاوکاری و ئاسانکارییان کردوە لەگەڵ رێکخراوی تیرۆرستی داعش، لە ڕوی سیاسی و سەربازی و ئەمنی و دارایی و بازرگانیەوە.