Print WWW.GORRAN.NET
 کاوە محەمەد: تاکە ئومێد ئێوەن کە بە دەنگتان سزای قورسی دەسەڵاتدارە فاشیلەکان بدەن
4/15/2018 11:35:02 PM
کاوە محەمەد رایدەگەیەنێت؛ تاکە ئومێد دەنگی خەڵکی هوشیار و بەویژدانی هەرێم و ناوچە دابڕێنراوەکانە کە سزای قورسی دەسەڵاتدارە فاشیلەکانی هەرێم بدەن، تا جارێکی تر کورد لەژێر باری گرانی لێکەوتەکانی ریفراندۆم و شانزەی ئۆکتۆبەر راستکەینەوە.


کاوە محەمەد، سەرۆکى لیستى ژمارە (142)ى بزوتنەوەى گۆڕان لە شارى هەولێر لە پەیامى دەستپێکى بانگەشەى هەڵبژاردندا لە شارى قەڵا و منارەوە وتى: "ئەی ئەوانەی خەمی خەڵک و خاک، رێگای ئازادی و چاکسازی کۆیکردونەتەوە و گەڕاندنەوەی ماف و کەرامەت بۆ هاونیشتیمانیان بۆتە قیبلەنوماتان، سڵاو لەئێوە و تەواوی گۆڕانخوازان".

وتیشى:"گەڕانەوەی ئەمڕۆی د. یوسف بۆ هەولێر، گەڕانەوەی ئیرادەی هەرگیز نەبەزیو و رەگداکوتاوی گۆڕان و چاکسازییە بۆ لەبن دەرهێنانی مەیل و کەڵکەڵەی پشتاپشتی دەسەڵات و خۆسەپێنی مافیا تەماعکارەکان".


دوپاتیشیکردەوە؛ هەولێر لەهەمو کاتێک زیاتر تینوە بۆ گۆڕان و کردنەوەی باوەشی گەرمی بۆ ئاڵا نیللیە پڕ لەئومێدەکەی، تا لێرەوە و لەم شارە بە شکۆ و هەیبەتەی مێژوەوە، تۆمارێکی تری وەستانەوە بەڕوی جەور و ستەم بکاتە تاج و بینێتە سەر قەڵا و منارە سەرکەشەکەی.

دەقى وتارى کاوە محەمەد:
بەناوی خوای گەورە و میهرەبان

هاونیشتیمانیانی بەڕێز .. میراتگرە حەماسەتخوڵقێنەکانی رەوانشاد کاک نەوشیروان گۆڕانخوازانی پڕ لەهێز و ئیرادە..  ئەی ئەوانەی خەمی خەڵک و خاک، رێگای ئازادی و چاکسازی کۆیکردونەتەوە و گەڕاندنەوەی ماف و کەرامەت بۆ هاونیشتیمانیان بۆتە قیبلەنوماتان.. سڵاو لەئێوە، سڵاو لەتەواوی گۆڕانخوازان لەهەر کوێیەکی سەر ئەم زەمینە بن.. بەناوی خۆم و هاوڕێیانم لەلیستی ژمارە (۱٤۲)ی بزوتنەوەی گۆڕان لەسنوری پارێزگای هەولێرەوە بەخێرهاتنێکی گەرمی هاوڕێیانمان لەلیژنەی باڵای هەڵبژاردن و یەکە بە یەکەتان دەکەین، بەتایبەت ئەوانەی لەدەرەوە و دوری شارەوە هاتون و هەولێری پایتەختی گۆڕانکاری و چەقی وەرچەرخان و چاکسازییان روناکتر و ئاوەدانتر کردەوە. بەتایبەتتریش برای بەڕێزمان کاک د.یوسف محەمەد سادق کە رون و ئاشکرایە رێگەگرتن لەو وەک سەرۆکی پەرلەمانی کوردستان لە(۱۲)ی ئوکتۆبەری ساڵی (۲٠۱٥)دا رێگەگرتنی دەسەڵاتە سەرکوتکەرەکەی هەولێر بو لەشەرعیەت و دیموکراسی، هەروەها سەپاندنی هەژمونی حزب و بنەماڵە بو بەسەر رۆڵ و رێزی دامەزراوەی نوێنەرایەتی راستەقینەی خەڵک و چاودێریکردنی حکومەت، بۆیە گەڕانەوەی ئەمڕۆی دوای دو ساڵ و نیو بۆ هەولێر، گەڕانەوەی ئیرادەی هەرگیز نەبەزیو و رەگداکوتاوی گۆڕان و چاکسازییە بۆ لەبن دەرهێنانی مەیل و کەڵکەڵەی پشتاپشتی دەسەڵات و خۆسەپێنی مافیا تەماعکارەکانی و ئەو پەیامە رونەش بە دور و نزیک، بە یار و نەیار دەگەیەنێت کە گۆڕان پرۆژە و ئایندەی خەڵکە و بە پشتیوانی خوا و جەماوەرە هەمیشە بەرفراوانبوەکەی وەک سنەوبەر لەبەردەم رەشەباکانی کۆتایی تەمەنی دەسەڵاتی تاکڕەو و گەندەڵکاران دەوەستێت و ئیرادەیەکە نە چۆک دادەدات و نە دەشچەمێتەوە. هاوڕێ و هەڵسوڕاوانی قەدرگران..

ئەمڕۆ هەولێر لەهەمو کاتێک زیاتر تینوە بۆ گۆڕان و کردنەوەی باوەشی گەرمی بۆ ئاڵا نیللیە پڕ لەئومێدەکەی، تا لێرەوە و لەم شارە بە شکۆ و هەیبەتەی مێژوەوە، تۆمارێکی تری وەستانەوە بەڕوی جەور و ستەم بکاتە تاج و بینێتە سەر قەڵا و منارە سەرکەشەکەی، تا لەم شارە بریندارەی دەستی مافیاکانی حوکمڕانی کوردی_ەوە، سەرەتای کۆتایی ئەو مۆدێلە شکستخواردو و ناشیرینە تۆمار بکرێت کە لەدەسپێکی نەوەدەکانی سەدەی رابردوەوە دەستیانکرد بەتاڵانی و گەندەڵی و هەر زو راپەڕینیان لەخەڵک دزی و هەرێمیان پڕکرد لەستەم و بێڕێزی و رۆژ بەرۆژ و ساڵ بە ساڵ لەجیاتی دەسکەنەکردنی دەستکەوت، شکست لەدوای شکستیان کەڵەکە کرد تا لەریفراندۆم و شانزەی ئۆکتۆبەردا گەیاندیان بە لوتکەی شکست و شەرمەزاری.

خۆپیشاندانەکانی چەند رۆژێک لەمەوبەری ئەم شارەش باشترین بەڵگەی توڕەیی و بێزاری خەڵکی هەولێرە لەو مودێلی حوکمڕانییەی هەر بۆ پێچانەوە و رۆیشتن باشە. بۆیە ئیتر هیچ دەرەتانێک لەبەردەم هاونیشتیمانییان نەماوەتەوە جگە لەگۆڕان و رێبازە رو لەروناکییەکەی کاک نەوشیروانی رەوانشاد، تاکە ئومێد ئێوە و دەنگی خەڵکی هوشیار و بەویژدانی هەرێم و ناوچە دابڕێنراوەکانە کە لەهەڵبژاردنی (۱۲)ی ئایاری داهاتودا سزای قورسی دەسەڵاتدارە فاشیلەکانی هەرێم بدەن، تا جارێکی تر کورد لەژێر باری گرانی لێکەوتەکانی ریفراندۆم و شانزەی ئۆکتۆبەر راستکەینەوە و لەیەکەم هەڵبژاردنی دوای کۆچی دوایی کاریزمای گۆڕانکاری و چاکسازیشدا، بە دەنگەکانی خۆمان رۆحی ئاسودە بکەین و ئەو وتەیەی بسەلمێنین کە لەدوای خۆی رێبازێکی وا جوان و تۆکمەی بۆ بەجێهێشتوین کە بە نەمانی ئەو و هیچ یەکێک لەهاوڕێکانی، کوێر نابێتەوە و بە کۆتا نایەت. گۆڕان ئیرادەیەکی بەردەوامە..