Print WWW.GORRAN.NET
 چوار لایەنەکە: هەوڵەکانمان بەردەوام دەبێت بۆ گەڕاندنەوەى دەنگە دزراوەکان
6/12/2018 5:54:00 AM
هەر چوار لایەنى بزوتنەوەى گۆڕان و کۆمەڵى ئیسلامى و یەکگرتوى ئیسلامى و هاوپەیمانى بۆ دیموکراسى و دادپەروەرى جەخت لە داواکارییەکانیان و هەوڵەکانیان دەکەنەوە بۆ گەڕاندنەوەى دەنگە دزراوەکان بەرێگەى یاسایى و ئەوەش دەخەنەڕو لە ئەگەرى بەربەست دروستکردن بۆ ئەو رێکارەش بژاردەى دوبارە ئەنجامدانەوەى هەڵبژاردنێکى دور لە ساختەکارى بەپێویست دەزانن.

ئاراس وەلى، ئەندامى جڤاتى نیشتیمانى بزوتنەوەى گۆڕان لەوبارەیەوە دەڵێت: "لاریمان لەوە نییە هەڵبژاردن بکرێتەوە، بەڵام بێ تەزویر و بێ سەپاندنى ئیرادەى لایەنێک بەسەر لایەنەکانى دیکە و دزینى دەنگ و شکاندنى کەرامەتى دەنگدەر و پێشێلکردنى بنەما و پرەنسیپەکانى هەڵبژاردن لە کوردستان و عێراقیشدا".

لاى خۆیەوە رێبوار حەمەد، وتەبێژى ئەنجومەنى سیاسى کۆمەڵى ئیسلامى دوپاتى دەکاتەوە کە ئەو چوار لایەنەى هەرێم لە دەستپێکى رەتکردنەوەى ئەنجامەکانى هەڵبژاردنەکەى (12)ى ئایارەوە، دوبارەکردنەوەى هەڵبژاردنیان وەک بژاردەیەک هەم گفتوگۆیان لەبارەوە کردوە هەم رایانگەیاندوە و دەشڵێت:"پێش لایەنەکانى دیکە زوتر باسمان لەو بژاردەیە کردوە و ئێستاش لە ئەگەرى سەرنەکەوتنى ئەو رێکارانەى گیراونەتە بەر، ئێمە جەخت لەوە دەکەینەوە دوبارەکردنەوەى هەڵبژاردن لە عێراق بژاردەیەکى تەندروستە و ئەوەى لاى ئێمە بە موتڵەقى رەتکراوەیە ئەم ئەنجامەى ئێستایە کە راگەیەنراوە".


هەروەک عومەر محەمەد بەرپرسى نوسینگەى سلێمانى ئەنجومەنى سەرکردایەتى یەکگرتوى ئیسلامى، ئەوە دوپات دەکەنەوە ئەگەر کورسیش زیاد نەکەن گرنگ ئەوەیە خەڵک دەنگى راستەقینەى خۆى ببینێت و وتى:"پشتیوانى لە گەیشتن بە راستى دەکەین جا ئەوە بە بژاردەى ئەژمارکردنەوەى دەستى بێت یان دوبارە کردنەوەى دەنگدان و هەڵبژاردن".

وتیشى:"ئێمە پشتیوانى دەکەین لەوەى خەڵک مافى رەواى دەستورى و دیموکراسى دەست بکەوێت، نە دەنگى خەڵکى دیکەمان دەوێت نە دەشمانەوێت خەڵک نائومێد بکرێت لەم پرۆسەیە".


لەلایەکى دیکەوە رێبوار کەریم وتەبێژى هاوپەیمانى بۆ دیموکراسى و دادپەروەرى ئەوە دەخاتەڕو کە تا ئەم ساتەش لەسەر ئەو بنەمایە کاردەکەن، ئەگەر لە رێگەى ئەو هەموارەى یاساى هەڵبژاردنەکان لە پەرلەمانى عێراق پەسەند کرا و دەنگەکانیان وەربگرنەوە لەرێگەى  ژماردنەوەى دەستییەوە و دەڵێت:"ئێمە رازین بەوە، بەڵام ئەگەر ئەو پرۆسەیە بەڕێوە نەچێت یان ئەوەش خروقاتى تێا بکرێت، ئەوا لەسەر داوا سەرەکییەکەمان سور دەبین کە دوبارەکردنەوەى هەڵبژاردنە".

وتیسى:"دوبارەکردنەوەى هەڵبژاردنیش دەبێت لە کاتێکى نزیکدا بێت بۆئەوەى کاتێکى زۆرى بەسەدا تێنەپەڕیت  و بۆشایى یاسایى و دەستوریش دروست نەبێت".