Print WWW.GORRAN.NET
 سەرچاوەكانی داهاتی بزوتنەوەی گۆڕان چین؟
7/8/2018 6:30:36 PM
رەنگە لەسەر ئاستی كوردستاندا تەنیا حیزبێك بێت كە سەرچاوەكانی داهاتی ئاشكرابن، بزوتنەوەی گۆڕان بێت، کە لە روی داهات و خەرجییەوە بچوكترین حیزبی سیاسیی هەرێمە و كەمترین موچەخۆری حیزبی هەیە، جگە لە میدیاكاران نەبێت، هەمو موچەخۆرانی بزوتنەوەكە ناگاتە سەد كەس، زوربەی هەڵسوراوەكان خۆبەخشن و پشت بە ئیمكانیاتی خۆیان دەبەستن، ڕێكخەری گشتی بزوتنەوەكە یەك دینار موچەی حیزب وەرناگرێت و تا ئێستاشی لەگەڵدابێت لە خانویەكی كرێی حكومیدا دەژی، لەم راپۆرتەیدا سەرچاوەكانی داهاتی بزوتنەوەی گۆڕان ئاشكرا دەکەین.

بزوتنەوەی گۆڕان نە پشكی هەیە لە كۆمپانیاكانی ئاسیاسێڵ و كوردتێل و سەنتەری بۆڵینگ، نە پشكیشی هەیە لە كۆمپانیای ساناتێلی پێشو و كۆرەك تیلیكۆمی ئێستا، نە كۆمپانیای سێكیوریتی هەیە و نە كۆمپانیای نەوت و پاڵاوگەش، نە بە تانكەر نەوت دەفرۆشێت و نە دەستیشی گرتوە بەسەر داهاتی نەوت و سامانی خەڵكدا، نە پارەی لە وڵاتانی دیكە وەرگرتوە و نە بە پارەی حكومەتیش مۆڵ و گوندی نیشتەجێبونی دروست كردوە، ئەگەر هەر كام لەمانەی بكردایە ئەوا بێگومان نەیارانی گۆڕان تا ئێستا هەزار جار ئاشكرایان كردبو، ئەی كەواتە سەرچاوەكانی داهاتی گۆڕان چین؟.

ساڵی (2006) كاتێك نەوشیروان مستەفا لەیەكێتی هاتە دەرەوە، بۆ دامەزراندنی كۆمپانیای وشە، جەلال تاڵەبانی (10) ملیۆن دۆلاری پێشكەش بە كۆمپانیاكە كرد كە بە ناوی نەوشیروان مستەفاوە بو، بەو (10) ملیۆن دۆلارە چەندین بینا لە گردی زەرگەتە دروست كران، رۆژنامەی رۆژنامەشی هەر بەو پارەیە دەركرد، ساڵی (2008) هەر بەو پارەیە كەناڵی كەی ئێن ئێنی دامەزراند و موچەی هەمو كارمەندانی كۆمپانیای وشە بە رۆژنامەی رۆژنامە و كەناڵی ئێن ئێن و سایتی سبەی هەر لەو پارەیە دەدرا كە كاتی خۆی جەلال تاڵەبانی دابوی بە نەوشیروان مستەفا.

بەڵام لە كاتی دامەزرانی بزوتنەوەی گۆڕان لە ساڵی (2009)دا، (10) ملیۆن دۆلارەكەی جەلال تاڵەبانیش نزیك بە تەواوی خەرج كرابو، هەر بۆیە بۆ بانگەشەی هەڵبژاردن، بزوتنەوەی گۆڕان پشتی بەست بەیارمەتی و هاوكارییەكانی كۆمەڵێك دەوڵەمەند و بزنسمان كە هاوڕێی دێرینی نەوشیروان مستەفا و سەركردەكانی دیكەی گۆڕان بون و لە پاڵ ئەوەشدا خەڵك و هەندێك لە هەڵسوڕاوانی گۆڕان لەناوەو دەرەوی هەریم بۆ سەرخستنی بزوتنەوەكە خۆشیان لە پارەی خۆیان یارمەتی گۆڕانیان دا.

لە ساڵی (2009)وە تا ئێستا لە هەمو هەڵبژاردنەكاندا كەمپەینی هەڵبژاردنی بزوتنەوەی گۆڕان تەنیا لەسەر یارمەتییەكانی كۆمەڵێك دەوڵەمەند و خەڵكی گۆڕانخواز بەڕێوەچوە، لێرە ناوی ئەو دەوڵەمەندانە ئاشكرا ناکەین تەنیا بۆ ئەوەی پارێزراوبن لە هەڕەشەی حیزبە دەسەڵاتدارەكان.

سەرچاوەیەكی دیكەی داهاتی بزوتنەوەی گۆڕان لە ساڵی (2011)وە بۆ سەرەتای (2014)ەوە ئەو بودجەیە بوە كە حكومەت دەیدایە حیزبەكان، كە پشكی گۆڕان مانگانە (595) ملیۆن دینار بوە، تا ئەو كاتەی گۆڕان ئەو پارەیەی وەردەگرت مانگانە لە راپۆرتێكدا چۆنیەتی خەرجكردنەكەی بۆ رای گشتی بڵاو كردوەتەوە.

سەرچاوەیەكی دیكەی داهاتی بزوتنەوەكە لە ساڵی (2009)وە تا ئێستا بریتی بوە لەو پارەیەی كە پەرلەمانتاران و تیمی حكومی گۆڕان لە هەولێر و بەغدا دەیدەنە بزوتنەوەكە، بە شێوەیەك كە مانگانە بەشێك لە موچەكانیان دەدەنە بزوتنەوەكە.

دواین سەرچاوەی داهات بریتییە لە پشكی لەسەدا (15)ی كارگەی چیمەنتۆی گاسن كە بەشێكە لە كۆمپانیای وشە، داهاتەكەی بۆ دەزگا راگەیاندنەكانی وشە خەرج دەكرێت، تا ئێستا تەنیا یەكجار و لە سەرەتای ساڵی (2018)دا دو ملیۆن دۆلاری لە كۆمپانیای گاسن وەرگرتوە، ئەو دو ملیۆن دۆلارەش بەشێكی بۆ كەمپینی هەڵبژاردن خەرجكراوە و بەشكەی تر بۆ كەناڵی كەی ئێن ئێن و سایتی سبەی خەرج دەكرێت كە كورتی هێناوە و بەشی هەمو پێداویستییەكان ناكات، كەناڵی كەی ئێن ئێن لە سەرەتای ساڵی (2018)دا بەهۆی دۆخی خراپی داراییەوە بۆ ماوەی دو مانگ پەخشی راگرت، بەڵام دواتر بە پشتبەستن بەو داهاتە پەخشی خۆی دەست پێكردەوە، لە ئێستاش خەرجی مانگانەی كەی ئێن ئێن نزیكەی (350) ملیۆن دینارە، كە ئەو داهاتە بەشی ساڵێكی كەناڵەكە ناكات، هەر بۆیە كەی ئێن ئێن ناچاربوە بۆ پڕكردنەوەی كورتهێنانەكەی یارمەتی لە دۆستانی بزوتنەوەكە وەربگرێت.

جگە لەمانەش بزوتنەوەی گۆڕان لە ئێستادا نزیكەی (20) ملیۆن دۆلار قەرزدارە و دەبێت لە داهاتودا ئەو قەرزە بگەڕێنێتەوە.

گۆڕان لە ماوەی نۆ ساڵی رابردودا سەلماندویەتی وەكچۆن هێزێكی ئازایە لە ئاشكراكردنی گەندەڵی حیزبە دەسەڵاتدارەكان، ئاواش ئازایە لە ئاشكراكردنی سەرچاوەكانی داهاتی خۆی، ئاخۆ بڵێی رۆژێك بێت حیزبەكانی دیكەش ئامادەبن بەو شێوەیە سەرچاوەكانی داهاتی خۆیان بۆ خەڵك ئاشكرا بكەن؟.