Print WWW.GORRAN.NET
  باژێڕوانی سلێمانی گۆڕان: پڕۆسەکەی ئێستا شەرعیەتدانە بە ساختەکارییەکان
7/9/2018 6:40:55 PM
باژێروانی سلێمانی بزوتنەوەی گۆڕان رایدەگەیەنێت؛ ئەو پڕۆسەیەی بڕیاربو بەڕێوەبچێت، ئێستا گۆڕاوە بۆ پرۆسەیەك كە شەرعیەتدانە بەو تەزویرەی كە ئەنجامدرا.

د.ئاسۆ مەحمود، باژێڕوانی سلێمانی بزوتنەوەی گۆڕان رایگەیاند؛ بڕیارەكەی پەرلەمانی عێراق بۆ ئەژماركردنەوەی دەنگەكان بە دەست و بەراوردكردنی زانیارییەکان لەسەر وەرەقە بڕیارێكی باش بو، هەروەها خەڵكێكی زۆر ئومێدی هەڵچنیبو كە ئەگەر چی دەستكاری سندوقەكانیش كرابێت، روی ساختەچییەكان هەڵدەماڵێت و دەنگی هاوڵاتیان دەگاتە شوێنی خۆی، بەڵام ئێستا ئەو پرۆسەیە گۆڕاوە بۆ پرۆسەیەك كە شەرعیەتدانە بەو تەزویرەی كە كرا بە كوردی (عوزر لە قەباحەت خراپترە).

باژێڕوانی سلێمانی بزوتنەوەی گۆڕان وتیشی: هەمواری یاسای هەڵبژاردن و بڕیارەكەی پەرلەمان ئەگەرێک بو كە بەڵكو ماف بگێڕێتەوە بۆ مافخوراو، بەڵام دەركەوت عیبرەت لە بڕیارداندا نییە بەڵكو لە جێبەجێكردنیدایە.

ئاماژەی بەوەشکرد، بەو رێكارانەی كۆمسیۆن دایناوە بۆ پرۆسەكە هیچ لە ئەنجامەكان ناگۆڕێت چونکە لە ماوەی پێشودا سندوقەكان پارێزراو نەبون لە دەستكاری كردن و هەروەها مامەڵەی كۆمیسیۆن لەگەڵ بریكارەكان مامەڵەیەكی نەشیاوەو رێگری دەكەن لە چاودێری كردن.

جگە لەوەش بە پێی بڕیارەكەی پەرلەمان دەبو سەرجەم سندوقەكان ئەژمار بكرێنەوە، بەڵام ئێستا تەنها چەند سندوقێك ئەژماردەكرێتەوە و بە پێی رێكارەكانی کۆمیسیۆن لە یەك كاتدا چەندین سندوق دەكرێنەوە بەڵام تەنها رێگە بە یەك بریكار دەدەن لە دورەوە سەیری پرۆسەكە بكات نەك چاودێری، واتا پرۆسەكە بە هیچ شێوەیەك لە ژێر چاودێریدا نییە و ناشەفافە.