پەیامێک لە بزوتنەوەی گۆڕانەوە
03/06/2019
ڕاگەیەندراوی فەرمی
بەبۆنەی هاتنی جەژنی رەمەزانی پیرۆزەوە بزوتنەوەی گۆڕان پیرۆزبایی لە
خەڵكی كوردستان و هەمو موسڵمانانی جیهان دەکات و دەخوازێت ئەم جەژنە، ببێتە
جەژنی ئاشتەوایی نیشتمانی و رێزگرتن لە ویست و خواست و داواکارییەکانی
خەڵکی کوردستان.
دەقی پیرۆزباییەکە
پیرۆزبایی
بزوتنەوەی گۆڕان
بەبۆنەی جەژنی رەمەزانی پیرۆزەوە، پیرۆزبایی لە خەڵكی
كوردستان و هەمو موسڵمانانی جیهان دەکەین. هیواخوازین ئەم جەژنە جەژنی ئاشتەوایی
نیشتمانی و رێزگرتن لە ویست و خواست و داواکارییەکانی خەڵکی کوردستان بێت.
لەم بۆنەیەدا،
بەئەرکی حکومەت و لایەنەکانە سیاسییەکانی دەزانین، بە لەخۆبردەیی و دورکەوتنەوە
لە خۆپەرستی بناغەی کۆمەڵگایەکی سەقامگیرو ئارام دابمەزرێنن، تا ئایندەیەکی گەشتر
بۆ هاوڵاتیانمان دەستەبەر بکرێ.لەم دۆخە ناوخۆییە ناهەموارەدا کە لەئاست داواکاریی
هاوڵاتییاندا نییە، عێراق و ناوچەکەش بە بارگرژیدا تێپەڕدەبێت، کە دەشێت لە سایەی
نەبونی هاوهەڵوێستی و نەبونی دامەزراوە نیشتمانییەکان و ململانێ حزبییەکاندا
لەهەر ئەگەرێکدا زەرەرمەندی گەورە خەڵکی کوردستانبن، پێویستە هەرچی زوە کێشەکان
بەلادا بخرێن و پەلەبکرێ لە پێکهێنانی کابینەی نوێی حکومەتی هەرێم و چیتر ئەم پرسە
بەهیچ بیانووێک دوانەخرێت و نائومێدییەکان بڕەوێنرێنەوە.
جەژنی رەمەزانی
پیرۆز، بکرێتە دەرفەتێک بۆ یەکخستنی توانا و هەڵوێستەکان بۆ چارەسەرکردنی ئەو دۆخە
ناهەموارەی روبەڕوی کەرکوک و ناوچە دابڕێنراوەکان بۆتەوە، کە ئەمەش تەنیا بە
لەخۆبردویی و چاوخستنە سەر بەرژەوەندییە باڵاکان بەدیدەهێنرێت.
هەمیشە لە خۆشی و ئارامی و ئاسودەییدابن.
بزوتنەوەی گۆڕان
3/6/2019