نه‌وشیروان مسته‌فا دوایین په‌یام رادەگەیەنێت

28/03/2018

وتار و پەیام

هاونیشتیمانانی خۆشەویست
سڵاوی خوای گەورەتان لێبێت

رۆژانی داهاتو جارێکی تر ئەچنەوە بەردەم سندوقەکانی دەنگدان، بۆ ئەوەی بڕیار لەسەر شێوازی حوکمڕانی وڵات و نوێنەره‌کانی خۆتان بدەن.

بە پێچەوانەی مێژوی چەند ساڵی حوکمڕانی ناشرینی بەعسەوە کە تەنها ئەکرا لە رێگەی پەنابردنە بەر تفەنگ داوای گۆڕانکاری بکەیت، هەروەها بە پێچەوانەی ساڵانی حکومڕانی دوای راپەڕینی حیزبەکانی دەسەڵاتەوە کە بەریان بە هەمو هەلێکی راستەقینەی گۆڕانکاری گرتبو، ئەمڕۆ ئێمە لە بەردەم ئەگەر و هەلی گۆڕانکاری گەورە و گرنگداین.

مێژویەکی تازە بە کۆمەڵێ خەون و چاوەڕوانی تازەوە ئەژین، کە چەندان هێزی گۆڕانکاری گرنگ لە هەناوی کۆمەڵگەی ئێمەدا دروستی کردوە، ئەمانە خەون بە کوردستانێکی ترەوە، بە کوردستانێکی ئایندەوە ئەبینین، کوردستانێک کە هی هەموان و بۆ هەموان بێت، هەمومان بە ماڵی خۆمانی بزانین و بەهەمومان هەلی یەکسان و خەونی یەکسان و رێزی یەکسان ببەخشێ.

بە خۆشحاڵیەوە بۆ دروستکردنی ئەم ماڵە تازەیە، کۆمەڵگای ئێمە پێویستی نەماوە بە گەڕانەوە بۆ توندوتیژی و پەلاماردانی تفەنگەکان، قۆناغی تەپڵی شەڕ و شەیپوری پێکدادانی خوێناوی کۆتایی هاتوە، هێزە گۆڕانخوازەکان لە چەند ساڵی رابردودا زیاد لە جارێک ئیرادەی گۆڕانخوازی خۆیان و سوربونیان لەسەر چاکسازی ریشەیی لە سیستەمی حوکمڕانیدا پیشانداوە.

لەم روەشەوە سەرکەوتنی بەرچاویان بەدەست هێناوە، هەم لە ناو گۆڕەپانی سیاسیدا بەشێوەیەکی بەرچاو گەشەیان کردوە و هەم هوشیاری سیاسی مرۆڤی کوردیان بە ئاستێکی رەخنەیی بەرز گەیاندوە، ئەو ئامرازەشی بۆ ئەنجامدانی پڕۆژەی گۆڕانکاری پەنایان بۆ بردوە سندوقەکانی دەنگدان بوە، بێگومان ئەم کارە ئاسان نەبوە و بە بێ فیداکاری و خۆڕاگری و قوربانیدانی ئازایانە بەڕێوە نەچوە، هێزەکانی گۆڕانکاری لەگەڵ ئەو هەمو ئیرادە ئاشتیخوازیانە کە نیشانیانداوە کەچی روبەڕوی چەندان توندوتیژی جەستەی و رەمزی بونەتەوە.

مەکینەیەکی راگەیاندنی زەبەلاحی پڕ درۆ و بوختان لە ئارادا بوە، دژ بە هەمو ئەو کەسانەی کە کوردستانێکی دادپەروەرتر و ئینسانیتریان ویستوە، پەنا بۆ سزای سیاسی و ئابوری و پیشەیی جۆراوجۆر براوە، سڵ لەوە نەکراوەتەوە هەمو شێوازەکانی ترساندن و هەڕەشە و بێئومێدکردن بەکاربهێنرێت، تەماعی گەورە خراوەتە بەردەم گۆڕانخوازان و هەوڵی بەردەوامیش دراوە بۆ کڕینی ویژدانی هەمو ئەوانەی نائومێد نەبون و خەونی دروستکردنی وڵاتێکی باشتر و داهاتویەکی گەشتریان بۆ رۆڵەکانی ئەم نیشتمانە بینیوە.

جێگەی خۆیەتی سوپاسی ئەو رۆحی تەسلیم نەبون و وازنەهێنان و سوربونەتان بکەم لەسەر بەهێزکردنی ئیرادەی گۆڕانکاری لە خۆتانا و کارکردنی بەردەوامتان بۆ بەرز راگرتنی ئومێدی گۆڕینی ئەو دونیایەی حیزبەکانی دەسەڵات لە (20) ساڵی رابردودا و لە پاڵ رێکەوتنی بەناو ستراتیجیدا دروستیان کردوە، دونیایەک بەتەمابون تا قیامەت بەهەمو ناهەقیەکانەوە بیهێڵنەوە و بەشێوەیەکیش دایبڕێژن و بەڕێوەی ببەن، بتوانێ بۆ هەتا هەتایە هەمو خراپەکاریەکان بشارێتەوە.

هاونیشتمانانی بەڕێز

لە چەند رۆژی داهاتودا، لێرە لە هەلومەرجێکی سیاسی نوێ و ئومێد بەخشدا جارێکی تر بۆ درێژەدان بەم رەوتە گرنگەی گۆڕانکاری دەچنەوە بەردەم سندوقەکانی دەنگدان و بێ گوێدانە تەحەداکان، ئیرادەی خۆتان سەرلەنوێ تاقیئەکەنەوە.

هیوادارم بەهەمان رۆحی رۆژی یەکەمەوە بەهەمان حەماسەتی ساڵانی رابردوەوە دەنگ بدەن و بە دونیای نیشان بدەن کە خوێنی گۆڕانکاریەکی راستەقینە هەم لە لەشی ئێوەدا دەجوڵێت و هەم لە ناو دەمارەکانی مێژوی ئێمەدا.

بۆ هەمو ئەوانەش کە دڵیان بە کڕینی ویژدان و ترس و تۆقاندن خۆشە، بسەلمێنن کە مرۆڤی ئێمە لەوە گەورەترە بە درۆ و دراو بخڵەتێنن و لە خشتە ببرێن.

ئێستا لە کۆتایی ئەم قسانەدا بە پێویستی دەزانم جەخت لە چەند خاڵێکی گرنگ بکەمەوە کە هێڵە سەرەکیەکانی شێوازی کارکردنی ئێمە لە ئێستاو لە داهاتودا پیشانئەدات:-

یەکەم: بزوتنەوەی گۆڕان هێزێک نیە رق و بوغزی سیاسی و کۆمەڵایەتی ئاڕاستەی بکات، ئەگەر چی لە رۆژی دروست بونمانەوە بەرق و بوغزێکی گەورەوە مامەڵەمان لەگەڵ کراوە، ئێمە لەناوەڕۆکدا کار بۆ کۆتایی پێهێنانی ئەم رق و کینە سیاسیە ترسناکە ئەکەین کە کۆمەڵگای ئێمەی لەناوەوە پارچە پارچە کردوە.
ئامانجی بزوتنەوەی گۆڕان گەڕانەوەی سیاسەتە بۆ مانا راستەقینەکانی خۆی، وەک روبەرێک بۆ دەستکاریکردنی ژیانی مرۆڤەکان بەجۆرێک هەموان بتوانن بە جیاوازی رەنگ و دەنگەکانیانەوە وەک مرۆڤی خاوەن ماف لە پاڵ یەکتریدا بە هێمنی و لە ئارامیدا بژین.

دوەم: بزوتنەوەی گۆڕان، بزوتنەوەیەکە لە پێناوی بەدەستهێنانەوەی ئەو مافانەدا دروست بوە کە سیاسەتی حیزبەکانی دەسەڵات ساڵانێکی درێژ پێشێلیان کردوە، کە لە هەمویان گرنگتر گۆڕینی مرۆڤی ئێمەیە بۆ کەسایەتیەکی یاسایی و خاوەن ماف و خاوەن رێز، هەر لەبەرئەمەش بەتوندی دژی هەمو جۆرە سزادانێکی سیاسین و ئەم شێوازەش لە سزادان تەواو ناکۆکە لە گەڵ خاڵە جەوهەریەکانی دروستبونی بزوتنەوەی گۆڕان.

سێیەم: بزوتنەوەی گۆڕان لە رۆژی دروستبونیەوە بڕوای بە سیستەمی تاکحیزبی و تاک سەرکردەیی و تاک ئایدۆلۆژی نەبوە و نیە، یەکێک لە دروشمە سەرەکیەکانی هەمیشە بەرگریکردن بوە لە فرەیی، لەبەرئەوە بڕوایەکی تەواومان بە کاری پێکەوەی و بڕیاردانی پێکەوەی و بەڕێوەبردنی پێکەوەیی هەیە، خۆشمان لەگەڵ هەمو ئەو هێزانەشدا تەبا دەبینینەوە کە وەک ئێمە هەوڵ دەدەن بۆ گۆڕان و چاکسازی سیستەمی حوکمڕانی لە کوردستاندا و ئامادەین لەم رێگەیەدا بە رۆحێکی دۆستانەوە کاری پێکەوەی و بەرنامە بۆ داڕێژراو بکەین.

چوارەم: ئەم بزوتنەوەیە پڕە لە خەونی گەورە و مێژویی، رەنگە کەسانێک هەبن بەرگەی سەختیەکانی بەدیهاتنی ئەم خەونەیان نەگرتبێت و لە نیوەی رێگەدا بەجێیان هێشتبێ، ئێمە لە کاتێکدا سوپاسی بەشداربونیان لە بزوتنەوەکەدا ئەکەین، هیوامان وایە خەونی گۆڕانکاری لەدەست نەدەن و لە شوێنی تر و لە جێگەی تردا درێژەی پێبدەن.

ئێمە لە رۆژی یەکەمەوە ئەمانزانی ئەو رێگەیەی کە گرتومانەبەر روبەڕوی سەختی و دژواری وامان دەکاتەوە، کە رەنگە هەندێک کەس بەرگەی نەگرێت، بەڵام بزوتنەوەکەمان بەڵێنی بە کۆمەڵگای کوردی و مێژو داوە، وە تا گەنجێکی حەماسی خاوەن خەون مابێت لەمسەری کوردستانەوە بۆ ئەو سەری کوردستان، کە بەئاڵایەکی نیلیەوە لە شەقامەکاندا بگەڕێت و بانگەشە بۆ گۆڕانکاری بکات، دەست لەم رێبازە هەڵناگرین و بەردەوام دەبین.

هاونیشتیمانانی ئازیز

هیوام گەورەیە کە بە ورە و خەونێکی زۆرەوە بەرەو دەنگدان بڕۆن و بە ویژدانیەکی ئاسودە و چاوەڕوانییەکی پڕ لە هیواوە دەنگ بدەن بە لیستی گۆڕان، به‌ لیستی مۆمەکەی گۆڕان.



خوای گەورە پشتیوانتان بێت


هەواڵی زیاتر