دادگای کەلار، جارێکی دیکە پێچەوانەی یاسای رۆژنامەگەریی بڕیار دەدات

18/11/2019

 بەپێی  ڕاگەیەندراوێكی  ڕادیۆی دەنگ ، ئەمڕۆ  دادگای كەتنی كەلار بڕیاریدا بە سزادانی بەڕێوەبەری ڕادیۆكە (ئازاد عوسمان محەمەد)  بە سێ‌ مانگ بەند كردن و پێبژاردنی دوسەد و بیستوپێنج هەزار دینار.

 

ڕاگەیەندراوەکەی ڕادیۆی دەنگ ئاماژەی بەوەشداوە ، دادگای كەتنی كەلار لە دۆسیەی سكاڵایەك دژ بە (ڕادیۆی دەنگ ) پەنای بردۆتە بەر یاسای سزادانی عێراقی لەبری یاسای ڕۆژنامەگەری و بەوهۆیەوە بە ماددەی 433 لە یاسای سزادانی عێراقی بەڕێوەبەری ڕادیۆكەی بە سێ‌ مانگ بەندكردن لەگەڵ ڕاگرتن و پێبژاردنی دووسەدو بیستوپێنج هەزار دینار حكوم دا.

ڕاشیگەیاندووە، پەنابردنی دادگای كەتن بۆ ئەم یاسایە، لە كاتێكدا كە دۆسیەیەكی تەواو ڕۆژنامەوانییە و لەسەر هەواڵێكی ڕۆژنامەوانی لەسەر ڕادیۆی دەنگ تۆماركراوە, ئیتر پەنابردنی یاسا و دادگا و دادوەر بۆ یاسای سزادان لەمامەڵەكردن لەگەڵ ئەم كەیسە پاساوی هەرچییەك بێت لەوە كەمناكاتەوە كە نادادیی و  ڕێزنەگرتنی یاسای ڕۆژنامەگەریی و پیشەیی ڕۆژنامەوانیە.

ئاماژەی بەوەشکردووە، پەنابردنی دادگا بۆ ڕاگرتنی ڕۆژنامەنوسان و هەروەها یاسای دیکە جگە لە ڕۆژنامەگەری  لە كەیسەكانی پەیوەست بە ڕۆژنامەوانی، بە توندی ئیدانە و سەركۆنە دەكەن و خوێندنەوەی زۆر هەڵدەگرێت و پرسیاری زۆر لەسەر دادوەری و كاری دادگاكان بە تایبەت لە گەرمیان دروست دەكات.

ڕادیۆی دەنگ ، داواش لە سەرجەم ئازادیخوازان و ڕۆژنامەنوسان و سیاسیەكان و پەرلەمانتار و دادوەر و یاسایی و چالاكانی مەدەنی و بەرپرسانی حكومی دەكات پێكەوە بە گژ ئەم  مامەلەەكردنەدا بچنەوە و چیتر ڕێگە نەدەن بەم شێوەیە یاساكان بۆ دژایەتی ڕۆژنامەوانان و پیشەی ڕۆژنامەنوسی بەكاربهێندرێن.

لەسەر درووستکردنی هەواڵێک لەبارەی شوێنێکی زیادەڕۆ لە شاری کەلار لە ساڵی ٢٠١٥دا، بەڕێوەبەری ڕادیۆی دەنگ دەستگیرکراوە و دواتریش بڕیاری زیندانیکردنی بۆ سێ مانگ درا.