جەمال حاجى محەمەد: کاک نەوشیروان لە ژیاندابوایە ئێستا دۆخى میلەتى کورد بە قۆناغ و ئاقارێکى دیکەدا دەڕۆیشت

جەمال حاجى محەمەد، لە حەوتەم ساڵیادى کۆچى دوایی رەوانشاد نەوشیروان مستەفا ئەندازیارى خەباتى نەتەوایەتى و سەرقافڵەى دادپەروەرى کۆمەڵایەتى، رایدەگەیەنێت؛ کاک نەوشیروان لە قۆناغێکى زۆر هەستیاردا جێى هێشتین، ئەو یەکێک بو لە سەرکردە گەورەکانى میلەتى کورد، ئەگەر لە ژیاندابوایە ئێستا دۆخى میلەتى کورد بە قۆناغ و ئاقارێکى دیکەدا دەڕۆیشت.

دەشڵێت: کاک نەوشیروان لە هەمو روەکانەوە بەتوانا بو؛ مێژونوس و ئەدیب و شۆڕشگێر و پارتیزان و دواتریش سیاسى و بیرمەند بو، خوێندنەوەى خۆى و وردى بۆ روداوەکان و واقیع هەبو، دانانى نەخشەى راپەڕین، دواتر کتێب و نوسین و پڕۆژەکانى، دواتریش دامەزراندنى بزوتنەوەى گۆڕان و یەکەم هێزى ئۆپۆزسیۆن و پڕۆژەکانى بۆ چاکسازى و نیشتیمان سازى و چاکەى گشتى نمونەى واقیعین بۆ گەورەیی کەسایەتى کاک نەوشیروان کە یەکێک بو لەو پیاوە گەورانەى مێژو دەیانخولقێنێت.

سەبارەت بە شێوازى یادکردنەوەى حەوتهەمین ساڵیادى کۆچى دوایی، جەمال حاجى محەمەد دەڵێت: بەهۆى هەندێک رێککارى سەر ئارامگەکەى، رێوڕەسمى فەرمى رێکناخرێت تەنها یادێکى خۆڕسک دەکرێتەوە و سەعات (4:00)ى پاشنیوەڕۆى سبەینێ یەکشەممە (19ى5ى2024) لە حەوتەم ساڵیادى کۆچى دوایی کاک نەوشیرواندا لە پێشوازى میوانان و هەڵگرانى بیرى چاکسازى رەوانشاد دەبین.