گۆڕان و کۆمەڵ: بە هاوبەشى بڕیار دەدەین

بزوتنەوەى گۆڕان و کۆمەڵى ئیسلامى رایدەگەیەنن؛ تانە لە ئەنجامی هەڵبژاردنەکان دەدەین و پێکەوە هەر بڕیارێک بدەین بە هاوبەشی و راوێژ بە یەکتری و لە بەرژەوەندی هاوڵاتیان دەبێت.

دواى کۆبونەوەى باڵاى بزوتنەوەى گۆڕان و کۆمەڵى ئیسلامى لە مەکۆى سەرەکى گۆڕان لە شارى سلێمانى، هەریەکە لە د. شۆڕش حاجى ئەندامى خانەى راپەڕاندنى بزوتنەوەى گۆڕان و رێبوار حەمەد وتەبێژى کۆمەڵى ئیسلامى لە کۆنفرانسێکى رۆژنامەوانیدا ناوەڕۆکى کۆبونەوەکەیان ئاشکرا کرد.

د. شۆڕش حاجى وتى: "تەوەرى سەرەکى کۆبونەوەکە گفتوگۆ بو لەبارەى هەلومەرجى هەڵبژاردن و ئەنجامە راگەیەنراوەکان، جەختمان لە ساختەکارییەکانى پارتى و یەکێتى کردەوە و دەزگا پەیوەندیدارەکانمان راسپاردوە تانە لە ئەنجامە راگەیەنراوەکە بدەن".

وتیشى: "ئێمە وەک گۆڕان و کۆمەڵ هەمیشە لەبەرەى خەڵک بوین و داکۆکیکارى سەرەکى بوین لە داواکارییەکانى خەڵکى کوردستان، لەم کۆبونەوەیەشدا و ئاماژەمان بە پەیوەندییەکانمان لە رابردودا کرد و جەختمان کردەوە کە لە ئایندەشدا هەڵوێستەکانمان هەمیشە لەبەرژەوەندى خەڵکى کوردستان دەبن، هەر هەنگاوێک بنێین بەیەکەوە یان بە راوێژ لەگەڵ یەکتر دەبێت و چى لەبەرژەوەندى خەڵکى کوردستان بێت ئەوە دەکەین".

لاى خۆیەوە رێبوار حه‌مه‌د وتى: "تێپەڕاندنى دەرئەنجامەکان بەو شێوەیە لەلایەن بەشێکى کۆمیسیۆنەوە جێگەى نیگەرانى ئێمە بو کە راى بەشێکى گرنگى ئەندامانیان وەرنەگرت، لە قۆناغى رابردودا لەگەل بزوتنەوەى گۆڕان پێکەوە زۆرترین کارى هاوبەش و پێکەوەییمان کردوە کە هیچى بەرژەوەندى حیزبى و کەسى نەبوە، بەڵکو ئێمە بەرژەوەندى گشتى و خەڵک و میللەت کۆى کردوینەتەوە و بەردەوامیش دەبین تا ئەو کاتەى ستەم و بێدادى و گەندەڵى هەبێت و دژى دەوەستینەوە".
وتیشى: "پێشتریش گۆڕان و کۆمەڵ بڕیارەکانیان لە بەرژەوەندی خەڵک بوە و لە داهاتوشدا بە هاوبەشی و هاوهەڵوێستی یەکتر بڕیاردەدەین".

لەبارەى بڕیارى هەردولایەن لەبارەى ئەگەرى بەشداریکردن لە حکومەتى داهاتو یان بەشدارینەکردنیان، ئەندامەکەى خانەى راپەڕاندنى بزوتنەوەى گۆڕان وتى: "زوە بڕیار لەوە بدەین بەشداریى کابینەى حکومەت دەکەین یان نا، لەسەر رۆژنایى سکاڵاکانمان و هەڵوێستى پارتى و یەکێتى ئەوجا بڕیار دەدەدەین، ئێمە ئامانجمان خزمەت و بەرژەوەندى خەڵکە، لە حکومەت یان ئۆپۆزسیۆن یان بایکۆت بین بە لەبەرچاوگرتنى بەرنامە و شێوازى خزمەتەکە ئەو بڕیارە دەدەین بەوەى لەو قۆناغەدا لەکام لایەنەوە دەتوانین خزمەت بکەین".