وێنە؛ کۆبونەوەی بزوتنەوەى گۆڕان و کۆمەڵى ئیسلامى

کەمێک لەمەوبەر شاندى کۆمەڵى ئیسلامى گەیشتە مەکۆى سەرەکى بزوتنەوەى گۆڕان لە شارى سلێمانى و کۆبونەوەى هەردولا دەستیپێکرد.

پێش نیوەڕۆى ئەمڕۆ شاندى کۆمەڵى ئیسلامى بە سەرۆکایەتى عەلى باپیر، ئەمیرى کۆمەڵى ئیسلامى گەیشتنە مەکۆى سەرەکى بزوتنەوەى گۆڕان و لە لایەن عومەر سەید عەلى رێکخەرى گشتى بزوتنەوەى گۆڕان پێشوازیان لێکرا.

لە کۆبونەوەکەدا کە ژمارەیەک لە ئەندامانى خانەى راپەڕاندن و رێکخەرى ژورى هەڵبژاردنی بزوتنەوەى گۆڕان و هەروەها ژمارەیەک ئەندامی مەکتەبی سیاسی و بەرپرسى دەزگاى هەڵبژاردنى کۆمەڵى ئیسلامى تێیدا بەشدارن، گفتوگۆ دەکرێت لەبارەى ئەنجامی هەڵبژاردنەكانی پەرلەمانی كوردستان‌ و قۆناغێكی نوێی سیاسی لە هەرێمی كوردستان ‌و عێراق.

پێشتر د.شۆڕش حاجی، ئەندامی خانەی راپەڕاندن بە (سبەی) راگەیاند؛ کۆبونەوەى بزوتنەوەى گۆڕان و کۆمەڵى ئیسلامى تایبەت دەبێت بە پرسی راگەیاندنی ئەنجامی هەڵبژاردنەکان و تاوتوێکردنی هەڵوێستی هاوبەش و قۆناغی داهاتو لەسەر ئەو پرسە و ئەگەرەکانی بەشداری یاخود بەشداری نەکردن لە حکومەت.

فۆتۆ: بڕیار نامیق