پەیوەندییەکانی ئێران و ئەمەریكا، کاریگەریی لەسەر هەرێمی کوردستان

ژوری توێژینەوەی سیاسی بزوتنەوەی گۆڕان، لە راپۆرتێکی نوێدا بەناونیشانی "مێژو و ئایندەی پەیوەندییەكانی نێوان ئێران و ئەمەریكا، کاریگەریی لەسەر هەرێمی کوردستان"، لایەنەکانی ئەو پەیوەندییە و هەڵچون و داچونەکانی دەخاتەڕو و ئاشکرای دەکات کە؛ ئەوەی تاڕادەیەك دەستی ئەمەریكای گرتوە پێویستی زۆری هاوپەیمانەكانییەتی بە سەرچاوەی وزەی ئێران و پێگە جیۆپۆلیتیكییەكەیەتی كە پانتاییەكی فراوانی لەسنوری دەریایی و وشكانی لەگەڵ وڵاتانی ئەوروپا و ئاسیای ناویندا هەیە.

توێژینەوەکە، کە لەلایەن بەهمەن ئەحمەد، ئامادەکراوە، ئەوەی خستوەتەڕو پەیوەندییەكانی نێوان ئەمەریكا و ئێران مێژویەكی دورو درێژی هەیە و بەچەندین هەوراز و نشێویشدا تێپەڕیەوە، بەشێوەیەكی گشتی لەسەردەمی جەنگی سارد و لەقۆناغی رژێمی پاشایەتیدا ئێران دۆستێكی نزیكی ئەمەریكا بو ەو چەندین بەرژەوەندی هاوبەشیان هەبوە، بەڵام ئەوەی گۆڕانكاری بەسەر ئەو پەیوەندییەدا دەهێنێت هاتنی رژێمی ئیسلامی ئێرانە لەساڵی (1979) دا كە زیاتر رژێمێكی شۆڕشگێڕی ئایدۆلۆژی رادیكاڵ بو لەهەناوی خۆیدا دژایەتیكردنی كولتور و ئاین و سیستمی سیاسی و ئابوری رۆژئاوای هەڵگرتبو.

 دواتر پاش مردنی رابەری رۆحی شۆرشی ئیسلامی ئێران (ئایەتوڵا خومەینی) ئیدی قۆناغێكی دیكە لەپەیوەندییە دەرەكییەكانی ئێران دێتە پێشەوە كە قۆناغی گۆڕینی سیاسەتی شۆڕشگێڕی و رەتكردنەوەی ئایدۆلۆژی و دانانی سنوری مەزهەبی و دینییە بۆ قۆناغی پراگماتیكی و كرانەوە بەڕوی جیهاندا، دیارە ئەم كرانەوەیەش نابێتە هەوێنی باشتربونی پەیوەندییەكانی ئێران و ئەمەریكا لەبەرئەوەی هەریەك لەو دو وڵاتە بونی ستراتیژ و بەرنامەی ئەوی دیكە لەناوچەی رۆژهەڵاتی ناوەڕاست و ئاسیای ناویندا بە گەورەترین مەترسی بۆخۆی دەزانێت، ئەوان شەڕی بەرژەوەندییە ئابوری و سیاسییەكان دەكەن، ئێران دەیەوێت جڵەوی رەوتی روداوەكان لەناوچەكەدا بگرێتە دەست و ئەمەریكاش دەیەوێت ئاگری ناكۆكی و شەڕەكانی رۆژهەڵاتی ناوەڕاست بخاتەوە ناو ماڵی ئێرانی.
توێژیەوەکە ئەوەی خستوەتەڕو کە؛ لەئێستادا پرسی بەرنامە ئەتۆمییەكەی ئێران و پشتگیریی كردنی گروپە تیرۆرستییەكان بوەتە چەكی دەستی ئەمەریكا بۆ لێدان لەبەرژەوەندییەكانی ئەو وڵاتە لەناوچەكەدا، بەڵام ئەوەی تاڕادەیەك دەستی ئەمەریكای گرتوە پێویستی زۆری هاوپەیمانەكانییەتی بە سەرچاوەی وزەی ئێران و پێگە جیۆپۆلیتیكییەكەیەتی كە پانتاییەكی فراوانی لەسنوری دەریایی و وشكانی لەگەڵ وڵاتانی ئەوروپا و ئاسیای ناویندا هەیە.

بۆ خوێندنەوەی دەقی توێژینەوە کلیک لەو لینکەی خوارەوە بکە:

کلیک لێرە بکە