مستەفا سەید قادر: پێویستە پشت بە دەستووری فیدراڵی ببەسترێت لە کێشەی هەولێر و بەغداد
15/02/2021
جێگری سەرۆکی هەرێمی کوردستان جەخت لە گرنگی ڕێککەوتنی نێوان عێراق و هەرێمی کوردستان دەکاتەوەو دەڵێت: دۆخی کورد لە کەرکووک و ناوچە دابڕاوەکان خراپە، بۆ چارەسەریی بنەڕەتیی کێشەکانیش لەنێوان هەردوولا دەستوورێکی فیدراڵی هەیە کە لە هەموو کاتێک زیاتر پێویستە کاری پێبکرێت.
پێشنیوەڕۆی ئەمڕۆ دووشەمە، 15/2/2021 ، لە دیوانی سەرۆکایەتیی هەرێمی کوردستان لە هەولێر، مستەفا سەید قادر جێگری سەرۆک پێشوازی لە سێرێنا مۆرۆنی کونسوڵی ئیتاڵیا کرد.
لە دیدارێکدا بارودۆخی سیاسیی عێراق و هەرێمی کوردستان و ناوچە دابڕاوەکان و پەیوەندیی دۆستانەی هەردولا باسی لێوە کرا.
جێگری سەرۆکی هەرێم ڕایگەیاند، کێشەی هەولێر و بەغدا تەنها مووچه نییە، دۆخی کورد لە کەرکووک و ناوچە دابڕاوەکانیش خراپە، بۆ چارەسەریی بنەڕەتیی کێشەکانیش لەنێوان هەردوولادا دەستوورێکی فیدراڵی هەیە کە لە هەموو کاتێک زیاتر پێویستە پابەندی بین.
کونسوڵی ئیتاڵیاش ڕایگەیاند هیواخوازه هەرێمی کوردستان یەک هەڵوێست بن و پێکەوە لەگەڵ بەغدا ڕێکبکه‌ون و چارەسەرێکی هەمیشەیی بۆ دابینکردنی مووچه و باشکردنی گوزەرانی خەڵک بدۆزرێتەوە تاکوو کێشەکە ساڵانە بەردەوام نەبێت.
کونسوڵی ئیتاڵیا هەروەها ئاماژەی بەوە دا کە هەمیشە پشتیوانیی هەرێمی کوردستان دەکەن، گوتیشی: لە شەڕی داعشدا، ئیتالیا بە شێوەیەکی بەرفراوان بوونیان لە هەرێمی کوردستان هەبووە و تا ئێستاش وەک بەشێک لە هێزی هاوپەیمانیی نێودەوڵەتی بوونی سەربازییان لێرە ماوە.
مستەفا سەید قادر، سوپاسی ئیتاڵیای کرد بۆ هاوکارییە بەردەوامەکانیان لە سێکتەری سەربازی و تەندروستی و ئاوەدانکردنەوە و بواری مەشق و خوێندن و ڕاهێنان بە پێشمەرگە و پۆلیس و ڕۆڵی ئیتاڵیای بەرز نرخاند.
سەبارەت بە بواری جێندەر، هەردوولا جەختیان لە پێویستیی بایەخپێدان بەو بوارە کردەوە و کونسوڵی ئیتاڵیا رایگەیاند ئەوان سەردانی شێڵتەر و بەندیخانەکانیان کردووە لە هەرێمی کوردستان و کۆرس و خولی ڕاهێنانیان بۆ دادوەران و مامۆستایانی ئایینی و پۆلیس و هێزە ئەمنییەکان کردۆتەوە.
جێگری سەرۆکی هەرێم ئاماژەی بەوە دا کە ئەوانیش لە سەرۆکایەتیی هەرێمی کوردستان بایەخیان بەو لایەنە داوە و وەک یەکێک لە مەلەفە گرنگەکان بەهەند وەریان گرتووە.