وەزیری ئاوەدانکردنەوە: پڕۆژەی هێڵی ئاسنین دەچێتە بواری‌ جێبەجێکردنەوە

وەزیری ئاوەدانکردنەوە و نیشتەجێکردنی هەرێم ڕایگەیاند، ئەمساڵ پڕۆژەی هێڵی ئاسنین دەچێتە بواری‌ جێبەجێکردنەوە کە بە سێ قۆناغ تەواو دەبێت.

دانا عەبدولکەریم وەزیری ئاوەدانکردنەوە و نیشتەجێکردنی حکومەتی هەرێم لە کۆنگرەیەکی رۆژنامەوانیدا رایگەیاند، "بڕیاربوو پرۆژەی هێڵی ئاسنین لە ناوەڕاست یان کۆتایی ساڵی ڕابردوودا دەست بە ئامادەکارییەکانی بکرێت، بەڵام بەهۆی بڵاوبوونەوەی پەتای کۆرۆنا، پرۆژەکە  بۆ چەند مانگێک ئامادەکارییەکانی دواکەوت".  

وتیشی " دەست دەکەین بە قۆناغی ئامادەکاریی، هەڵسەنگاندن و دانانی پرۆپۆزڵ بۆ پرۆژەکە، دواتر قۆناغی جێبەجێکردن دەست پێدەکات کە بریتین لە سێ قوناغ  و شەش ئاست".

راشیگەیاند، "هێڵی ئاسنینەکە هەمووشارەکان دەگرێتەوە و درێژییەکەی 915 کیلۆمەترە، پرۆژەکە دراوە بە دوو کۆمپانیای (ئیسپانی) و کۆمپانیایەکی ئەڵمانی، کە پسپۆڕییان هەیە، دەست بە ئامادەکردنی پرۆژەکە و جێبەجێکردنی دەکەن".

دانا عبدولکەریم ، ئەوشی خستە ڕوو، "بریارە لە قۆناغی یەکەمدا 620 کیلۆمەتر لە هێڵەکە تەواو بکرێت  ولە قۆناغی دووەمدا 135 کیلۆمەترو لە قۆناغی سێهەمیشدا 160 کیلۆمەتر تەواو بێت".

وەزیری ئاوەدانەکردنەوەی حکومەتی هەرێم ئاماژەی بەوەشکرد، ماستەرپڵانی هێڵی ئاسنین لە ساڵی 2012 دالایەن حکومەتی هەرێمەوە ئامادە کراوە، بۆیە لە ئێستادا ئەو سێ کۆمپانیایە بانگهێشت کراون بۆئەوەی لەم ساڵدا دەست بکەن بە جێبەجێکردنی پرۆژەکە بەپێی ئەو قۆناغانەی دیاریکراون.   

ئەوەشی خستەڕوو "پرۆژەکە وەک ئەوەی پلانی بۆ دانراوە لەم کابینەیدا دەست بە ئامادەکارییەکان و جێبەجێکردنی قۆناغی یەکەمی بکرێت وبڕیارە لە کابینەی داهاتووی حکومەتدا تەواوبکرێت".