سەرھلدانا باژێرێ دھۆکێ ل ھەمی خەلکێ پارێزگەھا دھۆکێ پیرۆز بیت

د ڕۆژەکا وەک ئەڤڕۆ دا ل ١٤ئادارا ١٩٩١ ێ بەری ٣٠ سالا پێلا سەرھلدانێ گەھشتە دھۆکا داسنیا و خەلکێ دھۆک وەکە خەلکێ ھەمی دەڤەر و باژێرێن دی یێن باشورێ کوردستانێ دەست ب رامالینا رژێما بەعس کر کو ھەمی تەخ و چینێن جڤاکی تێدا بەشداربوون  و ھەر ئەو خەلکێ دھۆکی خودانێن راستەقینە یێن سەرھلدانا ڤی باژێری بوون و ھەمی ھیڤی و ئومێدا وان ئەو بو کو رژێما بەعس ژناڤ بەن و دەستھەلاتەکا کوردی  ئاڤابیت  و دوماھیێ ب زولم و زورداریێ بینیت و ئازادی و داد پەروەری بەرقەرار بیت.

بەلێ جھێ داخێ یە پشتی بورینا ٣٠ سالا ژ سەرھەلدانێ و ھەبوونا دەستھەلاتەکا کوردی ئەگەر بەراوردیەکێ بکەین ئەو ئارمانجێن کو ڤی مللەتی راپەرین ژ پێخەمەت ئەنجامدای نە ب دەستڤە نەھاتن بەلکو بەروڤاژی جوداھیەکا مەزن ناھێتە دیتن ھەروەک ئەندازیارێ راپەرینێ رەوانشاد ( نەوشیروان مستەفا ) دبێژیت: ( راپەرین نە ژ بۆ گوھرینا دەستھەلاتەکا زالم یا عەرەبی بۆ ب دەستھەلاتەکا زالم یا کوردی )  کو ژ ھەمی ڕویەکێ ڤە خەونێن ڤی خەلکی ب رێکا دەستھەلاتا کوردی ھاتنە ژناڤبرن  ژ وان ژی ئەو ئازادیا کو خەلکی ھند خوین و قوربانی بو دای مخابن ئەڤرۆ ل سەرا لایک و کۆمێنتا خەلک یێ دھێتە گرتن، ل وی دەمی تاکێ کورد ب پلە دوو دھاتە حسابکرن ئەڤرۆ پلە دوو و سێ پەیدابوینە، ل وی دەمی گوند دھاتنە کاڤلکرن و توببارانکرن ئەڤرۆژی ھەمان تشت یێ روی ددەت، ئەڤرۆ ل جھێ سەربازگەھێن رژێما بەعس سەربازگەھێن دەولەتا تورک دھێنە دیتن
و ل وی دەمی باژێر و کۆمەلگەھ ب رەبیا ھاتبوونە دورپێچکرن ئەڤرۆ ب ب کۆچک و باغێن بەرپرسا یێت ھاتینە دورپێچکرن ل وی دەمی کورێن ئاغا و موستەشارا دبالا دەست بوون ئەڤرۆ ھەر ئەو ئەندام پەرلەمان خودان پۆست و پلەنە.

لەوما فەرە ئێدی دەستھەلاتا کوردی ئاورەکێ ل ڤی خەلکێ دلسوز و ستەم دیتی بدەت و عیبەرەتێ ژ ڕاپەرینا ١٩٩١ وەربگریت چونکی د نھا دا ھەر ئەو خەلک یێ تورە و بێزارە ژ دەستھەلاتا کوردی.

 مەکۆیێ بادینان یێ بزاڤا گۆڕان.