وەزیری ئاوەدانکردنەوە: کارکردن لەسەرجەم قۆناغەکانى رێگای دوسایدی (دوکان – چوارقوڕنە) بەردەوامە

وەزیرى ئاوەدانکردنەوە و نیشتەجێکردن رایدەگەیەنێت؛ رێگای دوسایدی (دوکان - چوارقوڕنە) پڕۆژەیەکی ستراتیژییە و کارکردن لەسەرجەم قۆناغەکانیدا بەردەوامە.

ئەمڕۆ دوشەممە، دانا عەبدولکەریم، وەزیری ئاوەدانکردنەوە و نیشتەجێکردن دواى بەسەرکردنەوەى پڕۆژەی رێگای دوسایدی (دوکان – چوارقوڕنە) لە کۆنگرەیەکی رۆژنامەوانیشدا، رایگەیاند؛ رێگای دوسایدی (دوکان-چوارقوڕنە) پڕۆژەیەکی ستراتیژییە و لەئێستادا لەسەرجەم قۆناغەکاندا کارکردن تیایدا بەردەوامە، و رێژەی ئەنجامدراو گەیشتوەتە (٤٥٪‏) و تێچوی پڕۆژەکەش بە کۆی گشتی (٥٣) ملیار دینارە.

وتیشى: "ھیوادارین لەگەڵ باشبونی بارودۆخی دارایی، پڕۆژەکە توشی ھیچ کەموکوڕییەک لە بودجە نەبێتەوە و تا ساڵی داھاتو تەواو بکرێت و بخرێتە خزمەتی ھاوڵاتیانەوە".
ئاماژەى بەوەشکرد لە ئایندەیەکی نزیکدا و پێش کۆتایی وەرزی ھاوین قۆناغی سێیەمی رێگاکە دەکەوێتە بواری جێبەجێ کردنەوە.

پڕۆژەی دروستکردنی رێگای دوسایدی (دوکان-چوارقوڕنە/قۆناغی دوەم)، پێکھاتوە لە رێگایەکی دوساید بە درێژی (٢٥کم)، کە بڕی (٥٣) ملیار دیناری بۆ تەرخانکراوەو رێژەی کاری ئەنجامدراو لە ئێستادا گەیشتوەتە ٤٥٪‏.