بریکارى وەزارەتى کارەبا سودەکانى پڕۆژەى راکێشانی کارەبای ڤۆڵتیەبەرز لە بازیانەوە بۆ رانیە ئاشکرا دەکات

بریکارى وەزارەتى کارەبا رایدەگەیەنێت؛ ئەو هێڵەى ئەمڕۆ بەردى بناغەکەى دانرا چەند سودێکى هەیە گرنگترینیان ئەوەیە بارزۆرى سەر هێڵە کۆنەکەى نێوان (بازیان ـ رانیە) کەم دەکاتەوە و چارەسەرى کێشەى نزمى ڤۆڵتیەش دەکات و سود بە بەشدارانى کارەبا لە سنورەکە دەگەیەنێت.

کامیل قەزاز بریکارى وەزارەتى کارەبا، لەبارەى پڕۆژەى هێڵى راکێشانی کارەبای ڤۆڵتیەبەرز لە بازیانەوە بۆ رانیە، کە ئەمڕۆ بەردى بناغەکەى دانرا و بە بڕى (31) ملیار و (600) ملیۆن دینار بڕیارە لەماوەى (365)دا جێبەجێ بکرێت بە سایتى (گۆڕان)ى راگەیاند: هێڵى خەتى (١٣٢KV) لەنێوان وێستگەى (١٣٢KV) (بازیان ـ رانیە) پڕۆژەیەکى گرنگە بۆ ناوچەکە.

دەشڵێت: ئەم هێڵە نوێیە بارزۆریى سەر هێڵە کۆنەکەى نێوان (دوکان رانیە) کەم دەکاتەوە، لەو ناوچەیەش کە کێشەى نزمى ڤۆڵتیە
هەیە، ئەو کێشەیە چارەسەر دەکات و ڤۆڵتیە بەرز دەکاتەوە، هاوکات باڵانسێک لەنێوان هێڵەکانى (١٣٢)کەى ڤى دروست دەکات و لە ئەگەرى کەوتنى هەر هێڵێکیان، ناهێڵێت گرفت روبدات.