شێخ کامیل قادر: کاندیدەکانمان بەهێزن و دەتوانن بەرگرى لە کەرکوکییەکان و ماددەى (140) بکەن

سەرپەرشتیارى بازنەى کەرکوکى بزوتنەوەى گۆڕان بۆ هەڵبژاردن رایده‌گه‌یه‌نێت؛ تێكۆشانی چه‌ندین ساڵه‌ی كورد له‌ پێناو شاری كه‌ركوكدا بوه و ده‌شڵێت: کاندیدەکانمان بەهێزن و دەتوانن بەرگرى لە کەرکوکییەکان و ماددەى (140) بکەن.

شێخ کامیل قادر، سەرپەرشتیارى بازنەى بانگەشەى کەرکوکى بزوتنەوەى گۆڕان رایدەگەیەنێت: تێكۆشانی چه‌ندین ساڵه‌ی كورد له‌ پێناو شاری كه‌ركوكدا بوه‌، بۆیه‌ هاوپه‌یمانی كوردستان له‌و شاره‌ له‌كاركردندایه‌ بۆ بردنه‌وه‌ی هه‌ڵبژاردنه‌كه‌ و سه‌رخستنی كاندیده‌كانی، هاوپه‌یمانی كوردستان گه‌ڕه‌ك و بازاڕ و شوێنه‌ گشتیه‌كان به‌سه‌ر ده‌كاته‌وه‌‌ و هانی خه‌ڵكی شاری كه‌ركوك ده‌دات كه‌ رۆژی (10/10) بچنه‌ سه‌ر سندوقه‌كانی ده‌نگدان و ده‌نگی خۆیان به‌ كاندیده‌كانی هاوپه‌یمانی كوردستان بده‌ن.

وتیشی: كاندیده‌كانی هاوپه‌یمانی خه‌ڵكانی دڵسۆزی شاری كه‌ركوكن، محه‌مه‌د نه‌سره‌دین کاندیدى ژمارە (29)ى بازنەى (1) لە کەرکوک، یه‌كێك له‌ كاندیده‌كانی هاوپه‌یمانی كوردستانه‌ و هیوادارین خه‌ڵكی شاره‌كه‌ متمانه‌ی خۆیانی پێبده‌ن بۆ به‌رگریكردن له‌ مافی خه‌ڵكی شاره‌كه و جێبه‌جێكردنی مادده‌ی (140)‌ له‌ به‌غدا و ببن به‌قه‌ڵغانی پاراستنی خه‌ڵكی كوردستان.

شێخ کامیل قادر، سەرپەرشتیارى بازنەى بانگەشەى کەرکوکى بزوتنەوەى گۆڕان ئاماژه‌ی بۆ ئه‌وه‌كرد، شاری كه‌ركوك پێویستی به‌ هه‌ماهه‌نگی زیاتر هه‌یه‌، له‌سه‌ر ئه‌و بنه‌مایه‌ش بزوتنه‌وه‌ی گۆڕان و یه‌كێتی نیشتیمانی هاوپه‌یمانی كوردستانیان پێكهێناوه‌ خه‌ڵكی شاری كه‌ركوك پێشوازیه‌كی گه‌رمیان له‌ پێكهێنانی هاوپه‌یمانی كوردستان كردوه‌ بۆ ئه‌وه‌ی به‌یه‌كده‌نگی و یه‌كڕیزی و به‌هێزه‌وه‌ بچینه‌وه‌ به‌غدا و له‌و پێناوه‌شدا كار بۆ سه‌رخستنی هاوپه‌یمانییه‌تیه‌كه‌ ده‌كرێت.