جێگرى سەرۆکى هەرێم: یەکڕیزی لایەنەکان بە ئامانجی گەڕانەوەی متمانەی هاوڵاتیان و باشکردنی موچە و دەستەبەرکردنی ژیانێکی سەقامگیر

جێگری سەرۆکى هەرێمى کوردستان جەخت لە هەوڵەکانی سەرۆکایەتی هەرێم و گرنگیی هەماهەنگی و یەکڕیزی لایەنەکان دەکاتەوە بە ئامانجی گەڕانەوەی متمانەی هاوڵاتیان و باشکردنی موچە و دەستەبەرکردنی ژیانێکی سەقامگیر بۆ هاوڵاتیان.

پێشنیوەڕۆی ئەمڕۆ دوشەمە ٢٣/٥/٢٠٢٢، مستەفا سەید قادر، جێگری سەرۆکی هەرێمی کوردستان، لە دیدارێکدا لەگەڵ ئەتێلا تۆت، کونسوڵی گشتی هەنگاریا لەهەرێمی کوردستان، تاوتوێى بارودۆخی سیاسی و ئەمنی عێراق و هەرێمی کوردستان و پێشهاتە سیاسیەکان و پەیوەندییەکانی نێوان هەولێر و بەغدایان کرد.

لە دیدارەکەدا، مستەفا سەید قادر جەختی لە هەوڵەکانی سەرۆکایەتی هەرێم و گرنگیی هەماهەنگی و یەکڕیزی لایەنە کوردییەکان کردەوە، بە ئامانجی گەڕانەوەی متمانەی هاوڵاتیان و باشکردنی موچە و دەستەبەرکردنی ژیانێکی سەقامگیر بۆ هاوڵاتیانی کوردستان.

هەردولا خوازیاربون پەیوەندییەکانی هەرێمی کوردستان و هەنگاریا بەرفراوانتربکرێت و هەماهەنگی و هاوکاری زیاتر لە زۆربەی سێکتەرەکان پەرەی پێبدرێت، جێگری سەرۆک سوپاسی گەلی هەنگارییای کرد، بۆ هاوکاری و یارمەتی بەردەوامیان لە پاڵپشتی هێزی پێشمەرگە و کردنەوەی راهێنان و مەشق و کەرەستەی جەنگی لە شەڕی روبەڕوبونەوەی داعشدا.