"بەگژداچونەوەی گەندەڵی و دورخستنەوەی دەستی حزب لە حکومەت لەپێناو سەرخستنی پڕۆسەی چاکسازیی بیناکردنی حکومەتی خزمەتگوزار بۆ هاوڵاتیان"

ئەمڕۆ چوارشەممە (٨/٦/٢٠٢٢)، مستەفا سەید قادر جێگری سەرۆکی هەرێمی کوردستان، لە سەرۆکایەتی هەرێم لە هەولێر، لە کۆبونەوەیەکدا لەگەڵ رەیدیۆ دۆبرێ باڵیۆزی رۆمانیا لە عێراق، بارودۆخی سیاسی عێراق و هەرێمی کوردستان و دۆخی چەقبەستوی بەردەم پرۆسەی پێکهێنانی کابینەی نوێی عێراق و پرسی هەڵبژاردنی پەرلەمانی کوردستان و کۆدەنگی نیشتیمانی و بە دامەزراوەییکردن بۆ حکومڕانیەکی دروست بیروڕایان لەبارەوە ئاڵوگۆڕکرا.

جێگری سەرۆکی هەرێم جەختی لە سەر گرنگی یەکڕیزی و سەروەری یاسا و بەگژداچونەوەی گەندەڵی و دورخستنەوەی دەستی حزب لە حکومەت کردەوە، بۆ سەرخستنی پرۆسەی چاکسازی بە ئامانجی کارکردنی نیشتیمانی و بیناکردنی حکومەتی خزمەتگوزار و دامەزراوەیی، لەپێناو دابینکردنی موچەو ماف و ژیانێکی شایستە بۆ هاوڵاتیان. 

هەر لەو کۆبونەوەیەدا باس لە هەماهەنگی و لێکتێگەیشتن و بەرفراوانکردنی پەیوەندییەکانی نێوان هەرێمی کوردستان و رۆمانیا کرا، بەتایبەت لە بوارەکانی خوێندنی باڵا و بازرگانی و سیستەمی دادوەری و پیشەسازی و گەشەپێدانی هەرێمی کوردستان تا ئاستی وڵاتانی پێشکەوتوو.