وەزیری دارایی و ئابوری: دەبێت بە هەموو لایەكەوە هەوڵی بنەبڕكردنی یاساشكێنی و قاچاخچێتى بدرێت

وەزیری دارایی و ئابوری: دەبێت بە هەموو لایەكەوە هەوڵی بنەبڕكردنی یاساشكێنی  و قاچاخچێتى بدرێت

وەزیرى دارایى و ئابورى رایدەگەیەنێت؛ هەموومان بۆ چاكسازی هاتوین بۆیە دەبێت ئەوانەی  یاساشكێنی و كاری قاچاخچێتی لە سنوورەكان ئەنجام دەدەن، رێگرییان لێبكرێت.

ئەمڕۆ چوارشەممە (2022/6/8)، ئاوات جەناب نوری وەزیری دارایی و ئابوری لە دیوانی وەزارەت لەگەڵ لیوا روكن حماد فازڵ هادی دزەیی فەرماندەی پاسەوانی سنوری ناوچەی یەکی وەزارەتی ناوخۆیی عێراق و شاندێکی یاوەری کۆبوەوە لەگەڵ ئاماژە کردن بە دیاردەی قاچاخچیەتی و یاسا شکێنی لە سنوورەکان،  جەختی لەوە كردەوە دەبێت بە هەموو لایەكەوە هەوڵی بنەبڕكردنی یاساشكێنی بدرێت.

بەپێى راگەیەندراوێکى وەزارەت، لە كۆبونەوەکەدا چەندین راو پێشنیازیان گۆڕدراوەتەوە بۆ ئەوەى نەهێشتنی دیاردەی قاچاغ و یاسا شکێنی بچێتە بواری پراكتیكەوە و لای خۆیەوە، لیوا روكن حماد فازڵ بەڵێنیدا کە هاوکاری وەزارەتی دارایی هەرێم بکات و ئەو کەسانەی کە لە پشتی کارە نا یاساییەکانەوەن، بۆ ئەوەی بەبێ جیاوازی روبەڕوی یاسا بکرێنەوە.

لە كۆتایدا، ئاوات جەناب نوری وەزیری دارایی و ئابوری رایگەیاند: هەمومان بۆ چاكسازی هاتوین، بۆیە دەبێت ئەوانەی یاساشكێنی و كاری قاچاخچێتی لە سنورەكان ئەنجام دەدەن، رێگرییان لێبكرێت و ئەوەی لە توانای وەزارەتی دارایی و ئابوری-ش بێت درێغی ناكەین."