کوێستان محەمەد: ئامانج و هەوڵ و کارکردنى ئێمە بۆ ئەوەیە ئەوانەى لە چاکسازییەکانن کار لەسەر کەسێتییان بکەین و وەک مرۆڤێکى ئاسایی و سودبەخش بێنەوە ناو کۆمەڵگە

وەزیری کارو کاروباری کۆمەڵایەتی خۆشحاڵى خۆى بە بەدەسهێنانى بڕوانامەى زانکۆ و پەیمانگا لەلایەن ژمارەیەک خوێندکارى چاکسازییەکان دەردەبڕێت و رایدەگەیەنێت؛ ئامانج و هەوڵ و کارکردنى ئێمە بۆ ئەوەیە هەمو ئەوانەى لە چاکسازییەکانن کار لەسەر کەسێتییان بکەین و وەک مرۆڤێکى ئاسایی و سودبەخش بێنەوە ناو کۆمەڵگە.


دواى ئەوەى ئەمڕۆ سێشەممە (٢٠٢٢/٨/٢) کوێستان محەمەد، وەزیری کار و کاروباری کۆمەڵایەتی لە چاکسازی گەوران/هەولێر بەشداریی کرد لە رێوڕەسمی ئاهەنگی دەرچوونی خوێندکارانى زانکۆى نێو چاکسازیەکە، خۆشحاڵی خۆی دەربری کە ئەو خوێندکارانە توانیویانە لەناو چاکسازی گەوران بروانامەی زانکۆ بەدەست بهێنن و لە لێدوانێکدا بۆ سایتى (گۆڕان) رایگەیاند: لە بنەڕەتدا چاکسازییەکان لەبەر ئەوە ناویان چاکسازییە، چونکە ئێمە دەمانەوێت چاکسازى بکەین لە کەسێتى سزادراوەکان و ئامادەیان بکەینەوە بۆ کۆمەڵگە .

دەشڵێت: هەر بەو ئامانجەشە لە هەمو چاکسازییەکاندا خوێندنگا بۆ هەمو ئاستەکان و کتێبخانە هەیە، وەرشەمان هەیە بۆ کارکردن و فێربونى پیشە، واتە سزادراو ئەگەر لە ژیانى خۆیدا هەڵەیەکى کردوە و سزادراوە، ئامانجى ئێمە چاککردنەوەى ئەو هەڵەیە و نیشاندانى رێگەى راست و دوبارە بیناکردنەوەى کەسێتى ئەو مرۆڤەیە بۆ ئەوەى وەک هەر کەسێکى ئاسایی و سودبەخش بێتەوە ناو کۆمەڵگە.


ئەوە لەکاتێکدایە بەپێى راگەیەندراوى وەزارەتى کار و کاروبارى کۆمەڵایەتى؛ بۆ ئەمساڵی خوێندن (١٦٥) قوتابی و خوێندکار لە چاکسازییەکاندا هەبون کە درێژەیان بە خوێندن داوە هەر لە پۆلی یەکی بنەرەتی تا زانکۆ، لەو ژمارەیەش (٢٤)یان قوتابی زانکۆن .