فەرهەنگ خالید: لەمساڵدا دەست بە دروستکردنى سایلۆى هەڵەبجە دەکرێت

بەڕێوەبەرى گشتى دیوانى وەزارەتى بازرگانى و پیشەسازى رایدەگەیەنێت؛ پلانمان هەیە بۆ دروستکردنى چەند سایلۆیەکى نوێ بەڵام ئەولەویەت لەمساڵدا دروستکردنى سایلۆى هەڵەبجەیە کە زۆربەى رێکارەکانى بڕیوە.

فەرهەنگ خالید، بەڕێوەبەرى گشتى دیوانى وەزارەتى بازرگانى و پیشەسازى رایدەگەیەنێت؛ پلانمان هەیە بۆ دروستکردنى سایلۆ لە پارێزگاى دهۆک و هەولێر، بەڵام پلانى یەکەم بۆ ئەوەى لە ساڵى (2022) سایلۆ ى نوێ دروست بکرێت، دەستپێکردنى دروستکردنى سایلۆى هەڵەبجەیە.

بەڕێوەبەرى گشتى دیوانى وەزارەتى بازرگانى و پیشەسازى ئاماژە بەوەش دەکات؛ دروستکردنى سایلۆى هەڵەبجە هەمو رێکارەکانى بڕیوە و تەنها تەندەرینى ماوە، گرفتێکى بچوک هەیە لەوەى پەیوەندى بە سیولەى بانکى هەیە بۆ پێدانى چەکى بانکى بەو کەسەى تەندەرەکەى بۆ دەردەچێت و ئێستا لەگەڵ وەزارەتى دارایی سەقاڵى گفتوگۆین بۆ چارەسەرى ئەو گرفتە بۆئەوەى بتوانین چارەسەرى بکەین و بخرێتە تەندرینەوە و هەڵەبجەش وەک هەر پارێزگایەکى دیکەى کوردستان ببێتە خاوەنى سایلۆ.