وەزیرى بازرگانى و پیشەسازى هەرێم: یاداشتى لێکتێگەیشتمان لەگەڵ وەزارەتى بازرگانى عێراق زۆر ئاستەنگ و کێشە چارەسەر دەکات

وەزیرى بازرگانى و پیشەسازى رایدەگەیەنێت؛ بەو یاداشتى لێکتێگەیشتنەى لەگەڵ وەزارەتى بازرگانى عێراق واژۆمان کرد زۆر ئاستەنگ و کێشە کە هەیە چارەسەر دەکرێن تایبەت بە پرسى کۆگاکان و گواستنەوە و دابەشکردنى ئارد و بەشە خۆراک و دەشڵێت: بەڵێنمان وەرگرتوە دو بەشە ئارد بە زوترین کات رەوانەى هەرێمى کوردستان بکرێت و لە داهاتودا دواکەوتنى بەشە خۆراک رونەدات.

کەمال موسلیم وەزیری بازرگانی و پیشەسازی لەسەردانێکدا بۆ بەغدا لەگەڵ وەزیرى بازرگانى حکومەتی فیدڕاڵ کۆبوەوە و دواتر دو یاداشتی لێکتێگەشتن لەنێوان هەردو وەزارەت واژۆکرا کە ناوەڕۆکی ئەو لێکتێگەیشتنانە چەند خاڵێکى گرنگ بون، لەوانە؛ گەڕاندنەوەی ئەو بڕە پارەیەی لە هاوڵاتیان وەردەگیرێت بۆ خۆراک وئارد بۆ بەغداد و لەبەرانبەردا بەغداد هەڵدەستێت بە سەرپەرشتی کردنی داگرتن وبارکردن وگەیاندنی خۆراک وئارد بەهاوڵاتیان وتێچوەکەی دەکەوێتە ئەستۆی ئەوکۆمپانیایانە.
لەوبارەیەوە وەزیرى پیشەسازى و بازرگانى کە ئێستا لە بەغدایە و کۆبونەوەکانیان بەردەوامە، بە سایتى (گۆڕان)ى راگەیاند: بەو یاداشتى لێکتێگەیشتنەى لەگەڵ وەزارەتى بازرگانى عێراق واژۆمان کرد زۆر ئاستەنگ و کێشە کە هەیە چارەسەر دەکرێن بەتایبەت گواستنەوە و دابەشکردنى ئارد و بەشە خۆراک و نۆژەن کردنەوەی کۆگاکانی خۆراک و دابینکردنی پێداویستی کۆگاکان و "گرفتى نەگەیشتنى بەشە ئاردى چوارمان تاوتوێکرد، بەڵێنمان وەرگرت بە زوترین کارت قەرەبوى ئەو دۆخە بکرێتەوە و دو بەشە ئارد رەوانە بکەن و لە داهاتودا ئەو گرفتە رو نەداتەوە".

وتیشى: هەر ئەو یاداشتەى واژۆمان کرد کۆمەڵێک دەستکەوتى بۆ فەرمانبەرانى بەڕێوەبەرایەتییەکانى سەر بە وەزارەتمان دەبێت، بەوەى پێشتر بێبەشکرابون لەو ماف و ئیمتیازاتانەى هاوتاکانیان لە شارەکانى دیکەى عێراق هەیانبو، بەڵام لەمەودوا هەمو ئەو پاداشتى کار و ماندوبون و ماف و ئیمتیازاتانە دەیانگرێتەوە کە فەرمانبەرانى دیکەى هاوشانیان لە عێراق وەریدەگرن".