وەزیرى بازرگانى و پیشەسازى: ئامادەى هاوكاری و كارئاسانین بۆ کۆمپانیا ژاپۆنیەکان پڕۆژەکانیان بۆ خزمەت و پێشكەوتنی ناوچەكە بهێننە کوردستان

وەزیری بازرگانی و پیشەسازی رادەگەیەنێت؛ كەشی گونجاوی كاركردن دەرفەتێكی باشی بۆ كۆمپانیا بیانییەكان رەخساندوە بۆئەوەى كار و بەرهەمەكانیان لە هەرێمی كوردستان پێش بخەن و ئامادەشین هاوكاری و كارئاسانی کۆمپانیا ژاپۆنیەکان بکەین هەر جۆرە پڕۆژەیەكی كە خزمەت بە پێشكەوتنی ناوچەكە بكات بهێننە کوردستان.

ئەمڕۆ سێشەممە (2022/11/15)، كەمال موسلیم وەزیری بازرگانی و پیشەسازی بە کۆبونەوەیەکدا لەگەڵ شاندێكی كۆمپانیاكانی جایكای ژاپۆنی، ئاماژەی بە كارئاسانیكردنی تەواوی حكومەتی هەرێم كرد بۆ كۆمپانیا ژاپۆنییەكان و وتی: كەشی گونجاوی كاركردن دەرفەتێكی باشی بۆ كۆمپانیا بیانییەكان بە گشتی و كۆمپانیا ژاپۆنییەكان بە تایبەتی رەخساندووە تاوەكو كار و بەرهەمەكانیان لە هەرێمی كوردستان پێش بخەن و دڵنیایی هاوكاری و كارئاسانی وەزارەتەکەى دایە ئامادەبوان بۆ هەرجۆرە پڕۆژەیەك كە خزمەت بە پێشكەوتنی ناوچەكە بكات.

لاى خۆیەوە نوێنەری كۆمپانیاكان باسیان لەكار و پرۆژە و بەرهەمەكانیان کە لە زۆر بواری جیاجیا توانیویانە كارەکانیان بهێننە كوردستان و ئاماژەیان بەوەکردوە کە لە هەوڵی بەردەوامدان بتوانن زۆرترین وەبەرهێنان و پێداویستی و بەرهەمی كۆمپانیاكانیان بهێننە ناوخۆی عێراق و كوردستان و پێشنیاری هەناردەكردنی بەرهەمی خۆماڵیشیان كرد لە رێگەی كۆمپانیاكانیانەوە.