وەزیرى بازرگانى و پیشەسازى لە بەغدا: لێکتێگەیشتنى باشمان هەیە و کێشەکان چارەسەر دەکەین

12/12/2022

وەزیرى بازرگانى و پیشەسازى لە بەغداوە رایدەگەیەنێت؛ لێکتێگەیشتنى باشمان لەگەڵ هەردو وەزارەتى بازرگانى و پیشەسازى عێراق هەیە و کێشەکان چارەسەر دەکەین، پارەى گەنمى جوتیارانیش بۆ ساڵەکانى (2015و 2016) تەرخانکراوە بەڵێنمان وەرگرتوە رەوانە بکرێت.

کەمال موسلیم، وەزیرى بازرگانى و پیشەسازى حکومەتى هەرێم دواى کۆبونەوەکانى ئەمرۆ و دوێنێى لە بەغدا، رایگەیاند: هاتوین لەگەڵ وەزارەتى بازرگانى و وەزارەتى پیشەسازى و کانزاکانى حکومەتى فیدراڵ گفتوگۆ بکەی لەبارەى ئەو بابەتانەى پەیوەستە بە هەردو لامانەوە لەگەڵ کۆسپ و تەگەرەکان.

وتیشى: هەردولا ئامادەیی خۆمان نیشانداوە بۆ چارەسەرى کێشەکان و لێکتێگەیشتنى باشمان هەیە و کێشەکان چارەسەر دەکەین و تەگەرە و کۆسپەکان ناهێڵین.

لەبارەى شایستەى دارایی جوتیارانیشەوە، کەمال موسلیم وتى: خۆشبەختانە دوا هەوڵى هەمو لایەک شایستەى دارایی جوتیاران بۆ ساڵى (2014) دابەشکرا، شایستەى دارایى بۆ ساڵەکانى (2015 و 2016) دڵنیاییمان وەرگرتوە کە پارەکە تەرخانکراوە، بەڵام دابەشکردنى دەکەوێتە ساڵى داهاتو.


هەواڵی زیاتر