بزوتنەوەی گۆڕان: حکومەتی هاوڵاتیمان دەوێت نەک حیزب

بزوتنەوەی گۆڕان و کۆنسوڵی ئەمەریکا کێشەکانی هەرێم تاوتوێ دەکەن، رێکخەری ژوری پەیوەندییە دیپلۆماسییەکانی گۆڕانیش دەڵێت: زۆربەی بۆچونەکانمان هاوبەشن، ئێمە داواى حکومەتى هاوڵاتى دەکەین و ئەوانیش حکومەت و هاوبەشێکى یەهێزیان دەوێت.

ئەمڕۆ پێنجشەممە (١٩/١/٢٠٢٣)،  ئێرڤن هیکس کۆنسوڵی ئەمەریکا لە هەرێمى کوردستان و شاندێکى یاوەرى، سەردانی مەکۆی سەرەکی بزوتنەوەی گۆڕانیان کرد لە شاری سلێمانی کرد و لەلایەن عومەر سەید عەلی و رێکخەر و ئەندامانی ژوری پەیوەندییە دیپلۆماسییەکانی بزوتنەوەی گۆڕانەوە پێشوازیان لێکرا.

لەبارەی ناوەڕۆکی کۆبونەوەکەوە هۆشیار عومەر عەلی، رێکخەری ژوری پەیوەندییە دیپلۆماسییەکانی گۆڕان رایدەگەیەنێت؛ وەفدی کونسوڵخانەی ئەمەریکا جەختیان لەسەر پرسی مافەکانی مرۆڤ و ئازادی رۆژنامەوانی و پڕۆسەی دیموکراسی بە گشتی کردەوە و " ئەوەی بەلای ئەوانەوە گرنگ بو، باسیان لەوەکرد کە حکومەتێکی یەکگرتو  و هاوبەشێکی بەهێزیان دەوێت و دەیانەوێت هەرێمی کوردستان بەهێز بێت، بۆ ئەوەش پێویستە هێزی پێشمەرگە یەک هێز بێت و دەستوەردانی سیاسیی نەکات".

رێکخەرى ژورى پەیوەندیە دیپلۆماسییەکانى گۆڕان نایشارێتەوە کە لایەنی ئەمەریکی نیگەرانی خۆیان نیشانداوە لەو دۆخەی ئێستای هەرێم و "خەریکە پشو درێژییان کۆتایی دێت و پێویستە یەک حکومەتی بەهێز هەبێت و دابەشکاریی نەمێنێ".

لەبارەى بۆچونى بزوتنەوەى گۆڕانیشەوە، هۆشیار عومەر دەڵێت: روانینی بزوتنەوەی گۆڕان لەگەڵ وەفدی ئەمەریکی زۆر هاوبەشە و بەرنامەی بزوتنەوەی گۆڕان لە سەرەتای دروستبونییەوە جەختکردنەوە بوە لەسەر یەک حکومەتی یەکگرتوی بەهێز، کە حکومەتی هاوڵاتی بێت نەک حیزبی و هەروەها حیزب لە دەستوەردانی بازاڕ دوربکەوێتەوە و ئەو قۆرخکارییەی کە هەیە نەمێنێت و هێزی چەکداریی حیزبی نەمێنێ کە پێشێلی ئازادییەکان دەکا و شەفافیەت هەبێت لە کۆی پڕۆسەی دارایی و سەروەرت و سامانی هەرێمی کوردستان بە دادپەروەریی دابەش بکرێت کە لە خزمەتی هاوڵاتیان بێت نەک بەمشێویەی ئێستا".