جێگرى سەرۆکى هەرێم: ناکۆکییە لاوەکییەکان وەلابنرێن و هەنگاوی جدی و بەپەلە بنرێت بە ئامانجی گۆڕانکاری و چاکسازی و یەکخستنی هێزەکانی پێشمەرگە

جێگری سەرۆکی هەرێم رایدەگەیەنێت؛ بارودۆخی ناوخۆیی و ناوچەیی ئاڵۆزە، بە لەبەرچاوگرتنی ئەو دۆخە پێویستە ناکۆکییە لاوەکییەکان وەلابنرێن و هەنگاوی جدی و بەپەلە بنرێت بە ئامانجی گۆڕانکاری و چاکسازی و یەکخستنی هێزەکانی پێشمەرگە و خزمەتکردنی هاوڵاتیان.

ئەمڕۆ سێشەمە ( ٢٤ / ١/ ٢٠٢٣)، مستەفا سەید قادر جێگری سەرۆکی هەرێمی کوردستان، لە کۆبونەوەیەکدا لەگەڵ وەفدێکی کونسوڵخانەی ئەمەریکا لە هەرێمی کوردستان کە پێکهاتبون لە کاثرين کرۆفت و جوسوا لویس و ڤێگەر ئەمیین، بەرپرس و ئەندامانی یەکەی سیاسی و ئابووری کونسوڵخانە، بارودۆخی سیاسی و ئەمنی و ئابوری عێراق و هەرێمی کوردستان و ناوچەکەى تاوتوێکرد و تیشک خرایە سەر گرنگی رێککەوتن و پەیوەندییەکانی نێوان هەولێر و بەغدا و پرسی وزە و هەنگاوی بەپەلە بە ئاڕاستەی چارەسەری خێرای ناکۆکیی نێوان لایەنە سیاسیەکان دوپاتکرایەوە.

جێگری سەرۆکی هەرێم جەختیکردەوە کە بارودۆخی ناوخۆیی و ناوچەیی ئاڵۆزە، بە لەبەرچاوگرتنی ئەو دۆخە پێویستە ناکۆکییە لاوەکییەکان وەلابنرێن و هەنگاوی جدی و بەپەلە بنرێت بە ئامانجی گۆڕانکاری و چاکسازی و یەکخستنی هێزەکانی پێشمەرگە و خزمەتکردنی هاوڵاتیان، هەردولا بە بایەخەوە باسیان لە بەردەوامی و بەرفراوانکردنی پەیوەندیەکانی نێوان هەرێمی کوردستان و ویلایەتە یەکگرتوەکانی ئەمەریکا کرد.

وەفدی کونسوڵخانەی ئەمریکا پشتیوانی و هاوکاری وڵاتەکەیان بۆ هەرێمی کوردستان دوپات کردەوە و بەگرنگیەوە باسیان لە سەقامگیری سیاسی و ئەمنی ئەم ناوچەیە کرد.