وەزیری ئاوەدانکردنەوە: ئەوەی لە دەسەڵاتی مندا بێت بۆ خەڵکی پێنجوێنی جێبەجێدەکەم

وەزیری ئاوەدانکردنەوەی و نیشتەجێکردن لەگەڵ نوێنەران خۆپیشاندەرانی پێنجوێن کۆدەبێتەوە و رایدەگەیەنێت؛ بەشێک لە داواکارییەکانیان پێشتر خستومانەتە پلانى وەزارەتەوە و لەگەڵ کۆتایی هاتنى وەرزى سەرما دەیانخەینە بوارى جێبەجێکردنەوە و هەر داواکارییەكییان پەیوەندی بە وەزارەتى ئێمەوە هەبێت و لەچوارچێوەی دەسەڵاتەکانمدا بێت جێبەجێ دەکرێت.

ئەمڕۆ شەممە (28/1/2023)، دانا عەبدولکەریم وەزیری ئاودانکردنەوە و نیشتەجێکردن، لە میانى پێشوازیکردن لە نوێنەرى خۆپیشاندەرانى پێنجوێن کە بۆ گەیاندنى داواکارییەکانیان سەردانیان کردبو پەیوەست بە رێگاوبانى سنورەکەیان، راگەیاند: سەیری سەرجەم داواکارییەکانی خەڵکی پێنجونم کردوە و داواکارییەکانیان رەوایە و پشتگیری داواکارییەکانیان دەکەم، بەشێك لە دواکارییەکان پێشتر خستوەمانەتە پلانى وەزارەتەوە بۆ ئەمساڵ و دەیانخەینە بەرنامەی کارەوە.

لە بارەی کاتی دەستپێکردنی کارەکانیان لەو ناوچیە، دانا عەبدولکەریم دەڵێت: کارکردن لە رێگاوبان لە سنورى پێنجوین لە وەرزی سەرمادا بەهۆی سەختی کەشوهەواوە ئاسان نییە، لەگەڵ باشبونی کەشوهەوا دەست بەکارەکان دەکەین و دەیانخەینە بوارى جێبەجێکردنەوە.

سەبارەت بە جێبەجێکردنی کۆى داواکارییەکان لەلایەن حکومەتەوە، دانا عەبدولکەریم دەڵێت: وەکو وەزیری ئاوەدانکردنەوە ئەوەی لە دەسەڵاتی مندا بێت داواکارییەکانیان جێبەجێ دەکەم و ئەوەشی پەیوەندی بە ئەنجومەنی وەزیرانەوە بێت هەوڵ دەدەین داواکارییەکانیان ئاڕاستەی ئەنجومەنی وەزیران بکەین و رەزامەندییان بۆ وەربگرین.