وەزیرى ئاوەدانکردنەوە فەرمانی کردنەوەی ژمارەیەک بەڕێوەبەرایەتی نوێ لە پارێزگا و ئیدارە سەربەخۆکان دەردەکات

وەزیری ئاوەدانکردنەوەو نیشتەجێکردن فەرمانی وەزاری بۆ کردنەوەی ژمارەیەک بەڕێوەبەرایەتی لە ئیدارە سەربەخۆکان دەردەکات و نوسراویش ئاڕاستەی ئەنجومەنی وەزیران دەکرێت بۆ کردنەوەی دو بەڕێوەبەرایەتی گشتی لە پارێزگای هەڵەبجە و ئیدارەی سەربەخۆی راپەڕین.

بەپێی فەرمانی وەزاری ژمارە (٤٨/٦٤٩) لە رۆژی (٣٠/١/٢٠٢٣) بە ئیمزای دانا عەبدولکەریم، وەزیری ئاوەدانکردنەوە و نیشتەجێکردن فەرمانی کردوە بە کردنەوەی بەڕێوەبەرایەتی ئاوەدانکردنەوە و نیشتەجێکردن لە سنوری ئیدارەی سەربەخۆی راپەڕین، "ئەوەش لەپێناو بەرژەوەندی گشتی و خزمەتکردن و جێبەجێکردنی پڕۆژەکانی ئاوەدانکردنەوە و سەرپەرشتی کردن و بەدواداچونی یەکەکانی نیشتەجێبون و پڕۆژەکانی بیناسازی لە سنورەکە" لە فەرمانێکی دیکەشدا بەژمارە (٤٨/٦٤٨)، بڕیاردرا بە گۆڕینی فەرمانگەی لقی تاقیگەی بیناسازی راپەڕین بۆ بەڕێوەبەرایەتی تاقیگەی بیناسازی راپەڕین و لکاندنی بە دیوانی وەزارەتەوە لەڕوی تەکنیکی و کارگێڕییەوە.

لەلایەکی دیکەوە بۆ کەمکردنەوەی رۆتین و خێرا جێبەجێکردنی پڕۆژەکان و چاککردنەوەی رێگاوبان لەسنوری ئیدارەی سەربەخۆی زاخۆ، بە فەرمانی ژمارە (٤٨/٦٥٢) بڕیاردرا بە لکاندنی بەڕێوەبەرایەتی چاککردنەوە و پاراستنی رێگاوبانی زاخۆ لەڕوی کارگێڕی و دارایی و هونەرییەوە بە دیوانی وەزارەتەوە، هاوکات بە فەرمانى وەزیری ئاوەدانکردنەوەو نیشتەجێکردن، بڕیاردرا بە کردنەوەو هێنانە کایەی هەردو بەڕێوەبەرایەتی رێگاوبانی سۆران و ئاوەدانکردنەوەو نیشتەجێکردنی سۆران، ئەوەش لەبەر فراوانی سنوری ئیدارەی سەربەخۆی سۆران و لەپێناو زیاتر گرنگیدان بە بوارەکانی رێگاوبان و پڕۆژەکانی دروستکردنی رێگاوبان و یەکەکانی نیشتەجێبون و بیناسازی لە سنورەکەو خزمەتکردنی زیاتر بە هاوڵاتیان.

هەروەک بە فەرمانى وەزیرى ئاوەدانکردنەوە؛ بەڕێوەبەری نوێى تاقیگەی بیناسازی هەڵەبجە دانرا و نوسراویش ئاراستەی ئەنجومەنی وەزیران کراوە و تێیدا پێشنیاری کردنەوەی هەردو بەڕێوەبەرایەتی گشتی رێگاوبان و ئاوەدانکردنەوەو نیشتەجێکردن لە پارێزگای هەڵەبجە و ئیدارەی سەربەخۆی راپەڕین دەکات لەگەڵ دابینکردنی پێداویستییەکانیان و کردنەوەی ژمارەی حساب و یەکەی ژمێریاری بۆیان، ئەوەش لەپێناو باشتر سەرپەرشتی کردن و بەدواداچونی پڕۆژەکانی رێگاوبان و ئاوەدانکردنەوەو نیشتەجێکردن و خزمەتکردن بەهاوڵاتیان.

هەر لە چوارچێوە ئەو هەوڵانەدا؛ بڕیاریش درا بەکردنەوەی هۆبەیەکی تایبەتی رێگاوبان لەگەڵ دابینکردنی ئامێری پێویست بۆ دەربەندیخان و تونێلی دەربەندیخان.