کوێستان محەمەد: بانگەوازەکەى گۆڕان لە پەرۆشییە بۆ دەنگدەران و هەڵسوڕاوەکانی

کوێستان محەمەد رایدەگەیەنێت؛ بزوتنەوەى گۆڕان هەمیشە لەگەڵ خەڵکدا بوە و پشتیوانیان بوە و هەر واش دەمێنێتەوە، بانگەوازەکەشی لە پەرۆشییە بۆ دەنگدەران و هەڵسوڕاوەکانی، دەشڵێت: لەسەر بەرنامەکانی رەوانشاد نەوشیروان مستەفا بەردەوامین و بەهیچ شێوەیەک سازشی لەسەر ناکەین، هەر پرسێکیش بزوتنەوەی گۆڕان بە فەرمی بڕیاری لەبارەوە بدات، سەرجەم تیمی حکومەت و پەرلەمان پابەند دەبین پێوەی.

کوێستان محەمەد، لەبارەى بانگەوازی ئاشتەوایی ناوخۆیی بزوتنەوەی گۆڕان کە رۆژى رابردو بڵاوکرایەوە، ئاماژە بەوە دەکات؛ بانگەوازیی ئاشتەوایی کارێکی زۆر باشە، چونکە خاوەنی سەدان و هەزاران هەڵسوڕاوی چالاکین کە پێویستە ئاشتبکرێنەوە کە بە گیانی خۆیان لەگەڵ بزوتنەوەکەدا بون، قوربانی زۆریاندا و نان بڕاو کراون.

دەشڵێت: بانگەوازەکەی گۆڕان لە پەرۆشییە بۆ هەڵسوڕاوەکانی، چونکە هەمیشە لەگەڵ خەڵکدا بوە و پشتیوانیان بوە و هەر واش دەمێنێتەوە، بانگەوازەکەش ئەوە دەسەلمێنێت کە ئێمە لەسەر بەرنامەی خۆمانین و لەسەر بەرنامەکانی رەوانشاد نەوشیروان مستەفا بەردەوامین و بەهیچ شێوەیەک سازشی لەسەر ناکەین ئەو بانگەوازەکەش هەنگاوی جدی دەوێت و پێویستە هەمومان پێکەوە پێشنیارەکانی هەڵسوڕاوان و کارەکتەرەکانی بخەینە بواری جێبەجێکردنەوە.

هەروەک دوپاتى دەکاتەوە کە؛ بزوتنەوەی گۆڕان لە ئێستا و داهاتوشدا هیچ بەدیلێکی نیە و ئەوەی گۆڕان کاری لەسەر کردوە، هیچ لایەنێک نەیتوانیوە بیکات.