جێگرى سەرۆکى هەرێم: نابێت ناکۆکی لایەنە سیاسیەکان کاریگەری لەسەر یەکگرتووی کورد هەبێت لە بەغدا

جێگرى سەرۆکى هەرێم و کۆنسوڵخانەى بەریتانیا جەخت دەکەنەوە لەوەى ناکۆکی لایەنە سیاسیەکانی هەرێم لە ناوخۆدا نابێت کاریگەری لەسەر یەکگرتوی و یەک گوتاری کورد لە بەغدا دروست بکات.

پێشنیوەڕۆی ئەمڕۆ سێشەممە (٢١ / ٢/ ٢٠٢٣)، مستەفا سەید قادر جێگری سەرۆکی هەرێمی کوردستان، پێشوازی لە جەیمی هامیل جێگری کونسوڵی گشتی بەریتانیا لە هەرێمی کوردستان و كاثرين شۆ جێگری نوێى کۆنسوڵی بەریتانیا لە هەرێم کرد و لەدیدارێکدا بارودۆخی سیاسی هەرێمی کوردستان و عێراقیان تاووتوێکرد، بیروڕایان سەبارەت بە پەیوەندییەکانی هەولێر و بەغدا و نەخشەڕێی چارەسەری کێشەکانی ناوخۆی هەرێم و پرسی هەڵبژاردنی پەرلەمانی کوردستان ئاڵوگۆڕکرد.

جێگری سەرۆکی هەرێمی کوردستان جەختیکردەوە کە پێویستە لایەنە سیاسیەکان بگەنە رێککەوتن بۆ چارەسەری کێشەکان کە لەبەرژەوەندی هەرێمی کوردستان و خەڵکەکەی بێت.

بەپێى راگەیەندراوى جێگرى سەرۆکى هەرێم؛ هەردولا هاوڕابون لەسەر ئەوەی ناکۆکی لایەنە سیاسیەکانی هەرێم لە ناوخۆدا نابێ کاریگەری لەسەر یەکگرتووی و یەک گوتاری کورد لەبەردەم بەغدا دروست بکات.

هاوکات مستەفا سەید قادر، وێڕای ستایشی پشتیوانی و هاوکارییەکانی بەریتانیا، هیوای خواست پەیوەندییەکانی هەردولا فروانتربکرێت و بەردەوام بێت.