وەزیرى دارایی: رێککەوتنى هەرێم و بەغدا لەسەر هەناردەکردنى نەوت کاریگەرى لەسەر بودجە و چارەسەرى بەشێکى گەورەى کێشەکانى نێوان هەردولا دەبێت

وەزیرى دارایی و ئابورى رایدەگەیەنێت؛ ئومێدەوارم رێککەوتنەکەى نێوان هەرێم و بەغدا وەکخۆى جێبەجێ بکرێ کە لەو بڕوایەدام کاریگەرى لەسەر بودجە و چارەسەرى بەشێکى گەورەى کێشەکانى نێوان هەرێم و بەغدا دەبێت و بۆ دۆخى سیاسى هەرێم و عێراقیش کاریگەرى زۆر دەبێت.

ئاوات جەناب نورى، وەزیرى دارایی و ئابورى حکومەتى هەرێمى کوردستان دواى واژۆکردنى رێککەوتنى هەرێم و بەغدا لەبوارى پڕۆسەى هەناردەکردنەوەى نەوت رایگەیاند: ئەم رێککەوتنەى لەنێوان هەرێم و بەغدا لەبارەى پرسى نەوت واژۆکرا، بنەماکەى ئەو پرەنسیپانەیە کە بە هەردولا لە پڕۆژەیاساى بودجە دامانناوە لە بوارەکانى سەرپەرشتى و بەڕێوەبردن و وردبینى پێکەوە و هەر ئەوەش یارمەتى ئێمەى دا ئەم رێککەوتنە بکەین.

لەبارەى کاریگەرى رێککەوتنەکەشەوە، ئاوات جەناب نورى وتى: کاریگەرى لەسەر بودجە و چارەسەرى بەشێکى گەورەى کێشەکانى نێوان هەرێم و بەغدا دەبێت، لەو بڕوایەم بۆ دۆخى سیاسى هەرێم و عێراق کاریگەرى زۆر دەبێت و سەقامگیرى زیاتر بهێنێت، ئومێدەوارم وەکخۆى جێبەجێ بکرێ.