رەنگدانەوەی بەرنامەو دروشمەکانی گۆڕان لەرێککەوتنی پێکهێنانی حکومەتدا

10/03/2019

"رەنگدانەوەی بەرنامەو پاکێج و دروشمەکانی گۆڕان لەرێککەوتنی پێکهێنانی کابینەی نۆیەمی حکومەتی هەرێمدا" نوێترین راپۆرتی بەراوردکاری و شیکاری ژوری تویژینه‌وه‌ی سیاسی بزوتنەوەی گۆڕانەو تیایدا تیشک خراوەتەسەر، جێکردنەوەی بەرنامەو ئەجێنداکانی بزوتنەوەی گۆڕان لەنێو خاڵەکانی رێککەوتننامەی پێکهێنانی کابینەی نۆیەمی حکومەتی هەرێم لەگەڵ پارتیدا.

بەپێی راپۆرتەکە کە لەلایەن گەیلان عەباس-ەوە ئامادەکراوە، زۆرینەی ئەو خاڵانەی لە رێککەوتنەکەدا هاتون بە رێژەیەکی زۆر، بریتین لەو پاکێج و کارنامانەی رابردو کە بزوتنەوەی گۆران بۆ پرسەکانی خزمەت و چاکسازی و دژایەتی گەندەڵی، گۆڕینی سیستەمی سیاسی و بەدامەزراوەیکردنی پەیوەندییەکان و تا فەراهەمکردنی ئازادی سیاسی و رۆژنامەوانی و لەگەڵ بەدیهێنانی یەکسانی و دادپەروەری، جەختی لەسەر کردونەتەوە. لەم قۆناغەشدا توانیویەتی هەمو ئەو پرەنسیپ و بنەما سەرەکیانە بکاتە کۆڵەکەی بنەڕەتی رێککەوتنی لەگەڵ پارتی دیموکرات بۆ چوار ساڵی داهاتو.

وەک لە راپۆرتەکەدا ئاماژەی بۆ کراوە، چوار ساڵی ئایندە بۆ بزوتنەوەی گۆڕان، چوار ساڵی گرنگ و چارەنوسسازە، لەپێناو خزمەتکردن و جێبەجێکردنی بەرنامەو ئەجێنداکانی، لەگەڵ تێپەڕاندنی هەمو ئەو بەربەستانەی لەماوەی رابردودا هاتنە بەردەمی.

هاوکات لە چەند خاڵێکدا زەمانەتی سەرکەوتنی بزوتنەوەی گۆڕان و رێککەوتننامەکەی رونکردنەوەتەوەو تیایدا هاتوە "پێویستە بزوتنەوەی گۆڕان بەرنامەو پلانی درێژخایەنی تایبەت دابڕێژێت بۆ ئەو وەزارەت و دەستانەی وەریان دەگرێت، هاوکات کار لەسەر بەرنامەی هەڵبژاردنەکانی بکات، بەدیاریکراویش لەو سێکتەرانەی کە دەکەونە ژێر دەسەڵاتی گۆڕانەوە، گوێگرتن لەهەمو ئەو تێبینی و سەرنجانەی لەبارەی رێککەوتنەکەوە دەوترێت، چ رەخنەکان، چ ئەوانەی پەسەندی دەکەن. بەئامانجی سود وەرگرتن لە زۆرترین سەرنج و رەخنەو پێشنیار. سوربون و بەردەوامی بزوتنەوەی گۆران لەسەر جێبەجێکردنی خاڵەکانی رێککەوتننامەکە، بە پێی ئەو سەقفە زەمەنیەی دیاریکراوە لە ئەولەویەتی کارەکانی ئەم کابینەیە بێت.

رۆژی (18)ی شوباتی (2019) رێککەوتننامەی پێکهێنانی حکومەت لەنێوان بزوتنەوەی گۆڕان و پارتی دیموکراتی کوردستان واژۆکرا. رێککەوتننامەکە نزیکەی (25) خاڵی لەخۆ گرتوە و بەسەر دو ئاستدا دابەشکراوە، ئاستی عێراق و ئاستی هەرێمی کوردستان.

هاوکات لەگەڵ واژۆکردنی رێککەوتنەکەدا، دەقی رێککەوتنەکەش بۆ رای گشتی و هاوڵاتیانی هەرێمی کوردستان بڵاوکرایەوە، بەو ئامانجەی هاوڵاتیان ئاگاداری ناوەرۆکی رێککەوتنەکەبن و ئەو لایەنانەش کە سەرنج و رەخنەیان لەبارەی رێککەوتنەکەوە هەیە، بەشێک لەنیگەرانیەکانیان بڕەوێتەوە.

دەقی راپۆرتەکە
کلیک لێرە بکە


هەواڵی زیاتر