ئاوات جەناب نورى: کێ چى کردوە لە پڕۆژە و کارنامەى گۆڕان باشتر بوبێت؟

وەزیرى دارایی و ئابورى حکومەتى هەرێم رایدەگەیەنێت؛ بزوتنەوەى گۆڕان خاوەنى گوتارى پۆپۆلیستى نەبوە، بەڵکو بۆ هەمو  سێکتەرەکان قسە و پڕۆژەى هەبوە، دواى چەند ساڵێک لە هەوڵ و کارکردن بۆ هۆشیار کردنەوە بە پڕۆژەوە بەشدارى حکومەتى کردوە و کابینەى نۆیەمى حکومەتیش کە لە سێ لایەن پێکهاتوە لەسەر بەرنامەیەک رێککەوتوە کە بەرنامەى چاکسازى بوە و بەشى زۆرى کارنامەکەش پڕۆژە و داواکارى گۆڕان بوە، دەشپرسێت: کێ چى کردوە لە پڕۆژە و کارنامەى گۆڕان باشتر بوبێت؟

ئاوات جەناب نورى، وەزیرى دارایی و ئابورى حکومەتى هەرێمى کوردستان لە چاوپێکەوتنێکى تەلەفزیۆنى لەگەڵ کەناڵى روداو دۆخى ئابورى و دارایی هەرێمى کوردستان و رێککەوتن لەگەڵ حکومەتى عێراق و پڕۆژەى چاکسازى و هەڵوێست و پڕۆژەکانى بزوتنەوەى گۆڕان و کارى تیمى حکومەتى گۆڕانى رونکردەوە بۆ باشترکردنى دۆخى حکومڕانى و گوزەرانى خەڵک و موچەخۆران و راشیگەیاند: گۆڕان یەکڕیزى میللەتى کورد و لایەنەکانى بەلاوە گرنگە و ئەوەش بە تەبایی نێوان لایەنە سیاسییەکان بەدى دێت.

وەزیرى دارایی و ئابورى لەگەڵ ئەوەى رەتى دەکاتەوە هیچ دەسەڵاتێک لە حکومەت هەبێ بەبێ یاسا بتوانێت دەستکارى باج بکات، رونى دەکاتەوە رەسمى گومرگى لەسەر دەرمان و بوارەکانى دیکە عێراق دایدەنێت نەک وەزارەتى دارایی، ئاشکراشى کرد کە دواى هەوڵەکانیان، قۆرخکارییان لە گومرگ نەهێشتوە، "یەکەمجاریشە بە سیستم و لەڕێگەى یاساوە لە هەرێمى کوردستان دەستکراوە بە چاکسازى و ئێستا موچەى خانەنشینى شەش ملیۆن دینارى نەماوە،
توانیومانە لە کەمتر لە سێ ساڵدا داهات نزیکەى یەک ترلیۆن زیادبکەین بەشیکى زۆرى ئەوەش بەهۆى کۆنتڕۆڵى دەروازەکانەوەیە و بەهۆى زیادکردنى داهاتى ناوخۆوە توانیومانە موچە بە تەواوەتى بدەین و بەشێکى زۆرى رۆتینیش کەم بکەینەوە".

هەروەک رەتى دەکاتەوە کە وەزیر و وەزارەتەکە هۆکارى جیاکارى بێت لە دابەشکردنى موچە و وتى: بەرپرس نین لەوەى موچەى خانەنشینى پێشمەرگە لە رۆژى عارفە لە سلێمانى دابەش نەکرا.نیگەرانى خۆشى نەشاردەوە لەوەى " لە بانکەکانى سلێمانى پارەى کاش نەماوە
و کۆمەڵێک کەسیش بە پارە و زەوى و پڕۆژەکانى سلێمانى بون بە ملیاردێر، بەڵام دۆخى خەڵک خراپە، بۆیە هەقە ئەوەندە ویژدانیان هەبێ بەشێک لەو پارەیە بگەڕێننەوە".

لەبارەى پڕۆژەیاساى چاکسازیشەوە ئاوات جەناب نورى دەڵێت: ئەگەر پێشتر کارێک کرابێ هەوڵى تاکەکەسى بوە ، بەڵام لەم کابینەیەوە بە رێکخراوى و سیتم و یاسا دەستکراوە بە چاکسازى، چاکسازى خەباتە و کاروانێکە کەوتوەتە ڕێ، بەڵام بەداخەوە دوژمنى زۆرە و سەرکەوتنیشى بەندە بە یەکڕیزى و تەبایی خەڵکى کوردستان و هێز و لایەنە سیاسییەکان".

دوپاتیشى دەکاتەوە کە ئەولەویەتیان بۆ موچەیە و لە (100%)ى داهاتى ناوخۆ بۆ موچەیە، بەڵام گرفت هەیە و لە (90) بانک لە هەرێمى کوردستان یەک بانک نییە کە سیفەتى تەواوەتى بانکى تێدابێت، موچەى پاشەکەوتکراویش کراوەتە قەرز لەسەر حکومەت و نافەوتێت.

لەبارەى هەڵوێست و پڕۆژەکانى بزوتنەوەى گۆڕان و کارى تیمەکەى لە حکومەت، ئاوات شێخ جەناب دەڵێت: گۆڕان پێش دروستبونى بە دو ساڵ لەرێگەى کەناڵى تەلەفزیۆنى و دواتریش لە رێگەى فراکسیۆنە پەرلەمانیەکەیەوە و خەباتى پەرلەمانیی کارى کرد بە بەرزکردنەوەى ئاستى هۆشیارى و ئاشناکردنى هاوڵاتیان و پارتەکان بە ئەرک و مافەکانیان، پڕۆژەمان بۆ چاکسازى و هەمو سێکتەرەکان و کۆى پڕۆسەى حکومڕانى هەبو، دواى شەش ساڵ لە هۆشیار کردنەوە و خستنەڕوى پڕۆژە بەشدارى حکومەتمان کرد بۆئەوەى ئیش بۆ بەرنامەکانمان بکەین
و لە رێگەى تیمەکانمانەوە کارمان کردوە بۆ باشکردنى دۆخى کۆکردنەوەى داهات و نەهێشتنى دو موچەیی و نەهێشتنى جیازازى موچەى خانەنشینى و پلتە تایبەت و و هاوکاریکردنى یەکە ئیدارییەکان و پڕۆژە خزمەتکوزارییەکان".

وتیشى: ئەوەى گۆڕان کردنى خیتابى پۆپۆلیستى نەبو ، بەپێچەوانەوە لەسەر هەمو بوار و سێکتەرەکان پرۆژەى هەبوە کارنامەى کابینەى نۆیەمى حکومەتیش کە تێیدا بەشدارین و بیر و بیرو بۆچونى هەرسێ لایەنە، بەشى زۆرى کارنامەکە پڕۆژە و داواکارى گۆڕان بوە بۆ چاکسازى، بێ لە ئیمە کێ پڕۆژەیەکى هەبوە بۆ چاکسازى؟.