دانا عەبدولکەریم:پێویستە پڕۆژەکانى رێگەوبان ئەولەویەت بێت، چونکە پەیوەستە بە ژیانى خەڵک و هەمو سێکتەرەکانى دیکەوە

وەزیرى ئاوەدانکردنەوە رایدەگەیەنێت؛ لە سەرەتای هەفتەى داهاتووەوە دەست دەکەین بە چاککردنەوەى رێگاى سماقوڵى دەشڵێت: بەهۆى ئەو دۆخەى دروستبوە بەتایبەت نەبونى بودجە و سیولە، دابینکردنى موچە بوەتە ئەولەویەتى حکومەت، ئەگەرنا لاى ئێمە رێگاوبانەکان دەبێت لە پیشەوەى کارەکانى حکومەت بێت بەوپێیەى پەیوەستە بە هەمو سێکتەرەکانى دیکە و بەبێ رێگاوبان کاروبارى رۆژانەى هاوڵاتیان و جوڵەى بازرگانى و گەشتیارى ئاستەنگى بۆ دروست دەبێت.


دانا عەبدولکەریم، وەزیرى ئاوەدانکردنەوە و نیشتەجێکردنى حکومەتى هەرێم دواى ئەوەى وەک یەکەم بەرپرسى حکومەت چوە لاى خۆپیشاندەرانى سماقوڵى کە نزیکەى دو هەفتەبو رێگەکەیان بە روى ئۆتۆمبێلى بارهەلگردا داخست و کۆمەڵێک داواکارییەکان هەبو، دەڵێت؛ دوێنێ چوینە لاى خۆپیشاندەرانى رێگەى سماقوڵى، ویستمان لە دەمى خۆیانەوە گوێمان لە داواکارییەکانیان بێت و ئەوەى لە دەسەڵاتى ئێمە بێت بتوانین بۆیان جێبەجێ بکەین، خۆپیشاندەران بە (10) خاڵ داواکارییەکانیان پێگەیاندین یەکێک لەوانە رێگریکردن بوو لە بارهەڵگرەکان ئەوەش داواکارییەکى رەوایە و ئەو داواکارییەیان بۆ جێبەجێکراوە، داواکارییەکى دیکەیان چاککردنەوەى رێگاو بانەکانیان بوو بەڵێنمان پێدان کە رێگەکانیان بۆ چاک بکەینەوە و دەرخستەى تەواوەتى بۆکراوە و لە کۆتایى ئەو هەفتەیە تیمەکانى وەزارەتى ئاوەدانکردنەوە دەستدەکەن بە کارکردن بۆ جێبەجێکردنى ئەو داواکارییە و هەندێ داواکاریش تایبەت بوون بە گوندەکانى سنورەکە، بۆیان جێبەجی دەکرێت".

 لەبارەى رێگاى (سلێمانى – کەلار)، داناعەبدولکەریم دوپاتى دەکاتەوە کە ئەوە یەکێکە لە پڕۆژە ستراتیژیەکانى وەزارەت کە لە (2011)ەوە دەست بەکارکردن تێدا کراوە و رونى دەکاتەوە ئەو ساڵانە یەک ملیار دۆلارى مانگانە دەهات بۆ هەرێم و دەتوانرا تا ساڵى (2014) تەواو بکرایە، "بەڵام لەو کاتەى ئێمە وەزارەتمان وەرگرتوە رێژەى جێبەجێکردن (15%) بو لە بڕۆژەکە و لەم سێ ساڵەدا گەیاندومانەتە (60%) بڕى زیاتر لە (70) ملیار دینارمان بۆ خەرجکردوە، ئێستاش پێویستى بە (65) ملیار دینارى دیکەیە بۆ تەواوکردنى".

لەبارەى پڕۆژەکانى رێگەوبانیشەوە دەڵێت: لاى ئێمە پڕۆژەکانى رێگەوبان ئەولەویەتە، بەڵام بەهۆى ئەو دۆخەى هەیە لە نەبونى بودجە و سیولە، دابینکردنى موچە لەپێشترە، لەگەڵ ئەوەشدا ئێمە پێمانوایە رێگاوبان وەک موچە دەبێت ئەولەویەتى حکومەت بێت بەوپێیەى پەیوەستە بە ژیانى خەڵک و هەمو سێکتەرەکانى دیکە و بەبێ رێگاوبان کاروبارى رۆژانەى هاوڵاتیان و جوڵەى بازرگانى و گەشتیارى ئاستەنگى بۆ دروست دەبێت، پڕۆژەکانى رێگەوبانیش پێویستیان بە بودجەیەکى گەورە تر هەیە.