کوێستان محەمەد: موچە دەبێتە سیادى و داهات بەشیوەیەکى دادپەروەرانە و بە لەبەرچاوگرتنى ژمارەى دانیشتوان و پێویستى پڕۆژەکان دابەش دەکرێت

وەزیرى کار و کاروبارى کۆمەڵایەتى رایدەگەیەنێت؛ موچەى موچەخۆران دەبێتە بابەتێکى سیادى و پێویستە هەمو موچەخۆران پێکەوە و لە یەک کاتدا موچە وەربگرن و جیاوازى و جیاکارى رونەدات، دەشبێت بودجەبەشیوەیەکى دادپەروەرانە و بە لەبەرچاوگرتنى ژمارەى دانیشتوان و پێویستى پڕۆژەکان دابەش دەکرێت.

کوێستان محەمەد وەزیرى کار و کاروبارى کۆمەڵایەتى، ئاشکراى دەکات؛ لە دواکۆبونەوەى ئەنجومەنى وەزیراندا جەخت لە پێویستى چارەسەرى کێشەى موچە کرایەوە بەوەى کە لەپێشینەى کارەکانى حکومەت و وەزارەتى دارایی بێت و ببێتە سیادى، بەشێوەیەک چاوەڕێى کۆکردنەوەى پارە ناکرێت لە شوێنێک هەبێت و لە شوێنێکى دیکە نەبێت، واتە چیتر نابێت موچەخۆران کێشەیان هەبێت و "موچەخۆرانى هەمو پارێزگا و ئیدارەکان پێکەوە و لە یەک کاتدا بێ جیاوازى موچە وەدەگرن" .

لەبارەى کۆکردنەوەى داهات و دابەشکردنەوەى بەپێى دوا بڕیارى ئەنجومەنى وەزیران، کوێستان محەمەد دەڵێت: پێویستە سەرجەم داهاتەکان کۆبکرێتەوە و بخرێتە سەر ئەژمارى وەزارەى دارایی و دواتر بەشیوەیەکى دادپەروەرانە و بە لەبەرچاوگرتنى ژمارەى دانیشتوان وپێویستى پڕۆژەکان دابەش دەکرێت،  دەبێت ئەوە کۆتایی بێت کە بەهۆى نەبونى سیولە لە هەندێک لە بانکەکان موچە و پڕۆژە دوادەکەوێت، پێویستە هەمو هاوڵاتییان و پارێزگاکان وەک یەک و بەشێوەیەکى دادپەروەرانە لە داهاتى هەرێمى کوردستان سودمەند بن"