هەڵۆ سەڵاح: لێکۆڵینەوە لە دۆخى بازاڕ و کاریگەرى لەسەر سێکتەرەکانى وەبەرهێنان دەکەین

بەڕێوەبەرى گشتى لێکۆڵینەوە و زانیارى لە دەستەى وەبەرهێنان رایدەگەیەنێت؛ (44%)ى پڕۆژەکانى وەبەرهێنانى پیشەسازى لە سلێمانییە و لیژنەیەکى باڵامان پێکهێناوە بۆ لێکۆڵینەوە لە دۆخى بازاڕ و کاریگەرى لەسەر سێکتەرەکانى وەبەرهێنان و چۆنیەتى زیاتر پێشخستنى ئەو کەرتە و وەبەرهێنان تێیدا.

هەڵۆ سەڵاح، بەڕێوەبەرى گشتى لێکۆڵینەوە و زانیارى لە دەستەى وەبەرهێنان لەبارەى دۆخى وەبەرهێنان و پڕۆژەکان و کارەکانى ئەو لیژنەیەى پێکهێنراوە بۆ لێکۆڵینەوە لە دۆخ بازاڕ رایدەگەیەنێت؛ لەسەر داواکارى یەکێتى وەبەرهێنان لیژنەیەکى باڵامان پێکهێناوە بۆ لێکۆڵینەوە لە دۆخى بازاڕ و کاریگەرى لەسەر سێکتەرەکانى وەبەرهێنان و بەپێى ئەولەویەتى شارەکان سێکتەرەکانمان جیاکردوەتەوە، لە سلێمانى سێکتەرى پیشەسازیمان وەرگرتوە لە هەلێر سێکتەرى نیشتەجێبون و لە دهۆک سێکتەرى کشتوکاڵ.

دەشڵێت: لە دەرەنجامى ئەو کارانەى لیژنەکەمان کۆمەڵێک پێشنیاز گەڵاڵە دەکەین بە لەبەرچاوگرتنى دۆخى ئابورى و ئەو سێکتەرانەى بۆ پارێزگاکان دیارى کراوە لەپێناو چۆنیەتى پێشخستنى ئەو کەرتانەى وەبەرهێنان لە هەرێمى کوردستان بەپێى تایبەتمەندى شارەکان و پڕۆژەکان.

لەبارەى دەستنیشان کردنى کەرتى پیشەسازى لە پارێزگاى سلێمانى، بەڕێوەبەرى گشتى لێکۆڵینەوە و زانیارى دەڵێت: سلێمانى (27%)ى کۆى پڕۆژەکانى وەبەرهێنانى تێدایە، بەڵام لە سێکتەرى وەبەرهێنانى پیشەسازى (44%)ى دەکەوێتە سلێمانى بە سەرمایەى (10) ملیار دۆلار و لەو روەوە سلێمانى لە پێشەنگدایە"