کوێستان محەمەد: دەستەبەرى کۆمەڵایەتى لە بەرژەوەندى و بۆ خزمەتى کرێکانە بۆئەوەى مافەکانى خانەنشینى بیانگرێتەوە

وەزیرى کار و کاروبارى کۆمەڵایەتى رایدەگەیەنێت؛ گرنگە و پێویستە هەمو کرێکارێک دەستەبەرى کۆمەڵایەتى بۆ بکرێت بۆئەوەى هەمو مافەکانى کەسێکى هەبێت کە لە کەرتى گشتی کاردەکات وەک خانەنشینى لەکاتى توشبون بە پێکان یان گیانلەدەستدا ن و تەواو کردنى خزمەت، هاوکات لە هەمو پارێزگا و ئیدارە سەربەخۆکان سیستمى تاک پەنجەرە دادەنێین بۆئەوەى هیچ کەمئەندامێک لەکاتى سەردان و مامەڵەکانى لاى ئێمە نە ماندو ببێت و نە ژوراو ژور بکات و نە رۆتین بیهاڕێت.

ئەمڕۆ پێنجشەممە کوێستان محەمەد، وەزیرى کار و کاروبارى کۆمەڵایەتى هەریەکە لە بەڕێوەبەرایەتى دەستەبەرى کۆمەڵایەتى و سیستمى تاک پەنجەرەى لە تۆڕى پاراستنى کەلار کردەوە و لە کۆنگرەیەکى رۆژنامەوانیشدا رایگەیاند: ئیمە لەم چوارساڵەدا گرنگى تەواومان بە کار و دەرستەبەرى کۆمەڵایەتى داوە و بەڕێوەبەرایەتى دەستەبەرى کۆمەڵایەتیمان لە هەڵەبجە و سۆران و گەرمیان کردوەتەوە لەو روانگەیەوەیە کە مافەکانى کرێکار دابین بکەین و دەستبەرکردنى کرێکاران لە خزمەت و بەرژەوەندى کرێکارانە ، "چونکە کاتێک کرێکار دەستبەر دەکرێت هەمو مافەکانى وەک هەر کەسێک لە کەرتى گشتیە دەستبەر دەکات و بەدەستى دەهێنێت، بۆنمونە کاتێک کەسێک لەسەر کارەکەى توشى پێکان دەبێت بە رێژەى پێکانەکەى خانەنشینى بۆ دەبڕدرێتەوە کاتێک لەسەر کارەکەى گیانلەدەستدەدات خانەنشینى بۆ دەبڕدرێتەوە، هەروەها کاتێک تەمەنى یاساى و ساڵانى خزمەتى تەواو دەکات بەهەمان شێوە خانەنشین دەبێت".
ئاماژەى بەوەشکرد ئێمە زۆر گرنگیمان بەم بەڕێوەبەرایەتیە داوە و لە پارێزگا و ئیدارە سەربەخۆکان پێداویستیەکانیان بۆ دابین دەکەین، بۆئەوەى زۆرترین شوێنکار و کرێکار دەستەبەر بکەن.

پەیوەست بە سیستمى تاک پەنجەرەوە، کوێستان محەمەد وتى: ئەم سیستمە کارئاسانییەکى تەواوە بۆ کەمئەندامان، دەمانەوێت لە هەمو پارێزگا و ئیدارە سەربەخۆکان  لە تۆڕى پاراستنى کۆمەڵایەتى سیستمى تاک پەنجەرە بەڕێوەببەین بۆئەوەى هیچ کەمئەندامێک لەکاتى سەردان و مامەڵەکانى لای ئێمە نە ماندو ببێت و نە ژوراو ژور بکات و نە رۆتین بیهاڕێت، بەڵکو تەنها بە سیستمى تاک پەنجەرە لە یەک هۆڵەوە کارەکانى بەڕێوەبەرێت، ئەوەشمان لە سلێمانى، دهۆک، هەڵەبجە، گەرمیان کردوەتەوە و لە هەولێر و زاخۆش بیناکانى لە دروستکردان".