تیمى حکومى گۆڕان: گەرمیان پێویستى بە خزمەتى زیاتر و پەیڕەوکردنى دادپەروەرییە

سەرۆکى تیمى حکومی بزوتنەوەى گۆڕان و ژورى حکومەت و تیمى گۆڕان لە حکومەتى خۆجێی ئیدارەى گەرمیان جەخت لە پێویستى خزمەتکردنى زیاترى هاوڵاتیانى سنورى ئیدارەى گەرمیان و پەیڕەو کردنى دادپەروەرى و رێگرى لە قۆرخکارى لە کەرتە جیاوازەکان دەکەنەوە.

ئەمڕۆ شەممە (24/6/2023)، لە مەکۆی سەرەکی بزوتنەوەی گۆڕان لە سلێمانى، مستەفا سەید قادر جێگرى سەرۆکى هەرێم و سەرۆکى تیمى بزوتنەوەى گۆڕان لە حکومەت بە ئامادەبونى رێکخەرى ژورى حکومەت و باژێروانانى کەلار و کفرى، لەگەڵ تیمى بزوتنەوەى گۆڕان لە حکومەتى خۆجێیی ئیدارەى گەرمیان کۆبونەوە.

لە کۆبونەوەکەدا دۆخ و گوزەران و ژیانی هاوڵاتیانى سنورەکە و ئەو قەیران و ئاڵنگاریانە خرایەڕو کە روبەڕوى هاوڵاتییان و خاوەن پڕۆژە و کەرتەکان بوەتەوە.
لەکۆبونەوەکە جەخت لە پڕۆژە و بەرنامەی بزوتنەوەی گۆڕان کرایەوە، بە ئاڕاستەى خزمەتکردنى زیاترى خەڵک و سەروەرى یاسا و رێگرى کردن لە قۆرخکارى و دەستوەردانى حزبى لە کاروبارى حکومەت و کەرتەکانى وەبەرھێنان و کشتوکاڵ و تەندروستی.

هاوکات لە کۆبونەوەکەدا تیشک خرایە سەر داواکارى و پێداویستى و ئەنجامدانى پڕۆژە لە بوارە جیاجیاکان لە کەلار و کفرى و ئەو ناوچانەى ئیدارەی گەرمیان کە کەمتر ئاوڕیان لێداوەتەوە و دوپاتکرایەوە کە "پێویستە بە قەبارەى قوربانیدانی گەرمیانیەکان خزمەتێکی باشترى خەڵک و ناوچەکانى بکرێت".