ناوەڕۆکى کۆبونەوەى وەفدى یونامى و بزوتنەوەى گۆڕان

بزوتنەوەى گۆڕان رایدەگەیەنێت؛ پێویستە کورد سەنگ و پێگەى خۆى لە کەرکوک و ناوچە کوردستانییە دابڕینراوەکان بپارێزێت ، هۆشداریش دەدات لەوەى لە هەرێمى کوردستان دیموکراسى بەشێوەیەکى مەترسیدار  پاشەکشەى کردوە و ئازادییەکان پێشێل دەکرێن بەتایبەت ئازادى بیر و را و رۆژنامەوانى، "ئەو سیاسەتەى پەیڕەو دەکرێت ئاماژەیەکى باشى نییە و کوردستان بەرەو هەڵدێر دەبات".

دواى نیوەڕۆى ئەمڕۆ دوشەممە (١٠/٧/٢٠٢٣)، وەفدێکى یونامى بەسەرۆکایەتى بەڕیوەبەرى ئۆفیسى کاروبارى سیاسى یونامى لە بەغدا سەردانى مەکۆى سەرەکى بزوتنەوەى گۆڕانى کرد لە شارى سلێمانى و لە دیدارێکدا چەند پرسێک تاوتویکران.

هۆشیار عومەر، رێکخەرى ژورى پەیوەندییە دیپلۆماسییەکان لەبارەى ناوەڕۆکى کۆبونەوەکەوە رایگەیاند: شاندى یونامى دیداریان لەگەڵ زۆربەى لایەنە سیاسییەکان کردوە بۆ لە نزیکەوە ئاگاداربوون لەوەى لە هەرێمى کوردستان دەگوزەرێت لە روى سیاسى و ئابورى هەڵبژاردن و پەیوەندییەکانى نێوان هەرێم و بەغدا و ئێمەش پەیوەست بەو بوارانە روانینى بزوتنەوەى گۆڕانمان دوپات کردەوە کە گۆڕان پیش هەمو لایەنەکان پرۆژەى هەبوە بۆ هەڵبژاردنەکان بۆئەوەى ئەم دۆخە رونە دات کە هەرێمى کوردستان کەوتە بۆشایی یاسایى و بڕیارەکەى دادگاى فیدراڵى بەدوادا هات.

پەیوەست بە هەڵبژاردنەکانى ئەنجومەنى پارێزگاکانى عێراق و پرسى سیاسى، رێکخەرى ژورى پەیوەندییە دیپلۆماسییەکان دەڵێت: جەختمان کردەوەى لەوەى پێویستە کورد سەنگ و پێگەى خۆى بپارێزێت لە کەرکوک و ناوچە کوردستانییە دابڕینراوەکان، هۆشداریشمان داوە لەوەى لە چەند ساڵى رابردودا لە هەرێمى کوردستان دیموکراسى بەشێوەیەکى مەترسیدار  پاشەکشەى کردوە و ئازادییەکان بە فراوانى پێشێل دەکرێن بەتایبەت ئازادى بیر و را و رۆژنامەوانى، ئەو سیاسەتەى پەیڕەو دەکرێت ئاماژەیەکى باشى نییە و کوردستان بەرەو هەڵدێر دەبات".