سەرپەرشتیارى ژورى هەڵبژاردنى گۆڕان: دەستپێشخەریەکەى بزوتنەوەى گۆڕان بۆ پارێزگارییە لە پێگە و شوناسى نەتەوەیی کورد لە کەرکوک و ناوچە کێشە لەسەرەکان

یاسین حەمە عەلى، رایدەگەیەنێت؛ بزوتنەوەى گۆڕان دەستپێشخەرى ئەوەى راگەیاندوە کورد پێویستى بە یەک گوتارى و یەک لیستى هەیە لە کەرکوک و ناوچە کێشە لەسەرەکان بۆئەوەى بتوانین پارێزگارى لە پێگە و شوناسى نەتەوەییمان لەو ناوچانە بکەین، هیوادارین بڕیارى سیاسى لایەنە سیاسییەکان بەرپرسیارانە بێت و واز لە بەرژەوەندیى حیزبى خۆیان بهێنن و لەپێناو پەرت نەبونى دەنگەکان و لاواز نەبونى کورد.

یاسین حەمەعەلى، سەرپەرشتیارى ژورى هەڵبژاردن، رایدەگەیەنێت؛ لە کۆبونەوەکانى رابردودا لەگەڵ لایەنە سیاسییەکان و دوێنێش لە کۆبونەوەى هەردو جڤاتى گشتى و نیشتیمانى بزوتنەوەى گۆڕان هەڵوێستى خۆمان راگەیاندوە و دەستپێشخەرى ئەوەمان راگەیاندوە کە وەک کورد پێویستمان بە یەک گوتارى و یەک لیستى هەیە لە کەرکوک و ناوچە کێشە لەسەرەکان بۆئەوەى بتوانین پارێزگارى لە پێگە و شوناسى نەتەوەییمان لەو ناوچانە بکەین.
سەربارەت بە دواکەوتنى بڕیارى لایەنە سیاسییەکان، یاسین حەمە عەلى دەڵێت: پێویست بو لایەنەکان بڕیارەکان نەخەنە دواساتەکان و هەر زوو بەدەم دەستپێشخەرییەکەى بزوتنەوەى گۆڕانەوە بهاتنایە، چونکە بزوتنەوەى گۆڕان لە خەمخۆرى بۆ پرسى کورد و پارێزگارى لە سەنگى کورد لەو ناوچانە دەستپێشخەریمان کردوە، هیوادارین بڕیارى سیاسى لایەنە سیاسییەکان بەرپرسیارانە بێت و واز لە بەرژەوەندیى حیزبى خۆیان بهێنن و هەمو لایەنەکان وەک کورد بە یەک لیست بەشدارى بکەین لەپێناو پەرت نەبونى دەنگەکان و لاواز نەبونى کورد.
لەبارەى ئەو مەترسیانەى گۆڕان دەیبینێت بۆیە هۆشدارى و پێداگرى دەکات بۆ یەک لیستى لایەنە کوردستانییەکان، سەرپەرشتیارى ژورى هەڵبژاردن دەڵێت: ئەو سیستمى هەڵبژاردنەى پڕۆسەى هەڵبژاردنى ئەنجومەنى پارێزگاکانى پێ ئەنجام دەدرێت لە خزمەتى هاوپەیمانێتى و لیستە گەورەکاندا دەبێت، بۆیە ئێمە دەمانەوێت سەرجەم لایەنەکان لە چوارچێوەى یەک لیستدا پێکەوە بن و پێگەى کورد بەهێز بێت.