وەزیرى بازرگانى و پیشەسازى: بەڵێنمان وەرگرتوە هەفتەى داهاتو تەواوى شایستەى دارایی جوتیاران بۆ (2023) رەوانە بکرێت

وەزیرى بازرگانى و پیشەسازى ئاشکراى دەکات تا ئیستا (78) ملیار دینار لە شایستە داراییەکانی جوتیاران بۆ ساڵی (2023) هاتوە کە دوابڕیان دە ملیار بوە و بەسەر جوتیاراندا دابەش دەکرێت، ئاشکراى دەکات بەپێى ئەو بەڵێنانەى لە وەزارەتى بازرگانى عێراق وەریانگرتوە هەفتەى داهاتو تەواوى شایستە داراییەکانى جوتیاران رەوانە دەکرێت.

کەمال موسلیم، وەزیرى بازرگانى و پیشەسازى حکومەتى هەرێم، لەبارەى شایستە داراییەکانى جوتیارانى هەرێم کە گەنمیان بۆ ساڵى (2023) رادەست کردوە، بە سایتى (گۆڕان)ى راگەیاند: پێشتر (68) ملیار هاتبو دابەشکراوە، ئێستاش (10) ملیار دینارى دیکە هاتوە و دراوەتە پارێزگاکان بۆئەوەى دابەشبکرێت (سلێمانی پێنج ملیار دینار، هەولێر سێ ملیار دینار و دهۆک دوو ملیار و پێنج سەد ملیۆن دینار).

هەروەک ئاشکراى کرد بەپێى ئەو بەڵێنانەى لە پەیوەندییان لەگەڵ وەزارەتى بازرگانى عێراق پێیان دراوە ئەوەیە کە هەفتەى داهاتوو تەواوى شایستە داراییەکانى جوتیاران رەوانە بکرێت و بەسەر جوتیاراندا دابەش بکرێت کە بە تێکڕا نزیکەى (400) ملیار دینارە.

ئەوە لەکاتێکدایە بۆ ئەمساڵ و دواى هەوڵى وەزارەتى بازرگانى و پیشەسازى هەرێم، بەغدا رەزامەندى دا بڕى (500) هەزار تەن گەنمى جوتیارانى هەرێم وەربگرێت کە پێشتر (375) هەزار تەن دیاریکرابو.

پەیوەست بە دابەشکردنى بەشە خۆراکى مانگانە، کەمال موسلیم رایگەیاند: پێشتر لە سەردانەکانیان بۆ بەغدا پێداگرییان کردوە لەوەى مانگانە بەشەخۆراکى هاوڵاتیانى هەرێم لە وادەى دیاریکراو رەوانە بکرێت و وتى: خۆشبەختانە بەشەخۆراک باشتر دابەشکراوە ، ئێستا (85%)ى بەشەخۆراکى مانگى شەشمان دابەشکردوە و لە هەندێک شوێنیش دابەشکردنى بەشەخۆراکى مانگى حەوتیش دەستپێکراوە، بەشەئاردى پێنجەمیش دابەشکراوە و کاردەکەین بۆئەوەى دەست بە دابەشکردنى شەشەم بکرێت".